181. пан̃чагораса̄диануджа̄нана̄

299. атха кхо бхагава̄ бхаддийе йатха̄бхирантам̣ вихаритва̄ мен̣д̣акам̣ гахапатим̣ ана̄пуччха̄ йена ан̇гуттара̄по тена ча̄рикам̣ пакка̄ми махата̄ бхиккхусан̇гхена саддхим̣ ад̣д̣хателасехи бхиккхусатехи. ассоси кхо мен̣д̣ако гахапати – ‘‘бхагава̄ кира йена ан̇гуттара̄по тена ча̄рикам̣ пакканто махата̄ бхиккхусан̇гхена саддхим̣ ад̣д̣хателасехи бхиккхусатехӣ’’ти. атха кхо мен̣д̣ако гахапати да̄се ча каммакаре ча а̄н̣а̄песи – ‘‘тена хи, бхан̣е, бахум̣ лон̣ампи, телампи, тан̣д̣улампи, кха̄данӣйампи сакат̣есу а̄ропетва̄ а̄гаччхатха, ад̣д̣хателаса̄ни ча гопа̄лакасата̄ни ад̣д̣хателаса̄ни ча дхенусата̄ни а̄да̄йа а̄гаччханту, йаттха бхагавантам̣ пассисса̄ма таттха тарун̣ена [дха̄рун̣хена (сӣ. сйа̄.)] кхӣрена бходжесса̄ма̄’’ти. атха кхо мен̣д̣ако гахапати бхагавантам̣ антара̄магге канта̄ре самбха̄веси. атха кхо мен̣д̣ако гахапати йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ ат̣т̣ха̄си. екамантам̣ т̣хито кхо мен̣д̣ако гахапати бхагавантам̣ етадавоча – ‘‘адхива̄сету ме, бханте, бхагава̄ сва̄тана̄йа бхаттам̣ саддхим̣ бхиккхусан̇гхена̄’’ти. адхива̄сеси бхагава̄ тун̣хӣбха̄вена. атха кхо мен̣д̣ако гахапати бхагавато адхива̄санам̣ видитва̄ бхагавантам̣ абхива̄детва̄ падаккхин̣ам̣ катва̄ пакка̄ми.

атха кхо мен̣д̣ако гахапати тасса̄ раттийа̄ аччайена пан̣ӣтам̣ кха̄данӣйам̣ бходжанӣйам̣ пат̣ийа̄да̄петва̄ бхагавато ка̄лам̣ а̄роча̄песи – ‘‘ка̄ло, бханте, нит̣т̣хитам̣ бхатта’’нти. атха кхо бхагава̄ пуббан̣хасамайам̣ нива̄сетва̄ паттачӣварама̄да̄йа йена мен̣д̣акасса гахапатисса паривесана̄ тенупасан̇ками; упасан̇камитва̄ пан̃н̃атте а̄сане нисӣди саддхим̣ бхиккхусан̇гхена. атха кхо мен̣д̣ако гахапати ад̣д̣хателаса̄ни гопа̄лакасата̄ни а̄н̣а̄песи – ‘‘тенахи, бхан̣е, екамекам̣ дхенум̣ гахетва̄ екамекасса бхиккхуно упатит̣т̣хатха тарун̣ена кхӣрена бходжесса̄ма̄’’ти. атха кхо мен̣д̣ако гахапати буддхаппамукхам̣ бхиккхусан̇гхам̣ пан̣ӣтена кха̄данӣйена бходжанӣйена сахаттха̄ сантаппеси сампава̄реси, тарун̣ена ча кхӣрена. бхиккхӯ куккучча̄йанта̄ кхӣрам̣ на пат̣игган̣ханти. пат̣игган̣хатха, бхиккхаве, парибхун̃джатха̄ти. атха кхо мен̣д̣ако гахапати буддхаппамукхам̣ бхиккхусан̇гхам̣ пан̣ӣтена кха̄данӣйена бходжанӣйена сахаттха̄ сантаппетва̄ сампава̄ретва̄ тарун̣ена ча кхӣрена бхагавантам̣ бхутта̄вим̣ онӣтапаттапа̄н̣им̣ екамантам̣ нисӣди. екамантам̣ нисинно кхо мен̣д̣ако гахапати бхагавантам̣ етадавоча – ‘‘санти, бханте, магга̄ канта̄ра̄, апподака̄ аппабхаккха̄, на сукара̄ апа̄тхеййена гантум̣. са̄дху, бханте, бхагава̄ бхиккхӯнам̣ па̄тхеййам̣ ануджа̄на̄тӯ’’ти. атха кхо бхагава̄ мен̣д̣акам̣ гахапатим̣ дхаммийа̄ катха̄йа сандассетва̄ сама̄дапетва̄ самуттеджетва̄ сампахам̣сетва̄ ут̣т̣ха̄йа̄сана̄ пакка̄ми. атха кхо бхагава̄ етасмим̣ нида̄не етасмим̣ пакаран̣е дхаммим̣ катхам̣ катва̄ бхиккхӯ а̄мантеси – ‘‘ануджа̄на̄ми, бхиккхаве, пан̃ча горасе – кхӣрам̣, дадхим̣, таккам̣, наванӣтам̣, саппим̣. санти, бхиккхаве, магга̄ канта̄ра̄ апподака̄ аппабхаккха̄, на сукара̄ апа̄тхеййена гантум̣. ануджа̄на̄ми, бхиккхаве, па̄тхеййам̣ парийеситум̣ тан̣д̣уло тан̣д̣улаттхикена, мугго муггаттхикена, ма̄со ма̄саттхикена, лон̣ам̣ лон̣аттхикена, гул̣о гул̣аттхикена, телам̣ телаттхикена, саппи саппиттхикена. санти, бхиккхаве, манусса̄, саддха̄ пасанна̄, те каппийака̄рака̄нам̣ хаттхе хиран̃н̃ам̣ упаниккхипанти – ‘имина̄ аййасса йам̣ каппийам̣ там̣ детха̄’ти. ануджа̄на̄ми, бхиккхаве, йам̣ тато каппийам̣ там̣ са̄дитум̣; на твева̄хам̣, бхиккхаве, кеначи парийа̄йена джа̄тарӯпараджатам̣ са̄дитаббам̣ парийеситаббанти вада̄мӣ’’ти.

пан̃чагораса̄диануджа̄нана̄ нит̣т̣хита̄.