171. тарун̣апасаннамаха̄маттаваттху

283. ассосум̣ кхо манусса̄ бхагавата̄ кира йа̄гу анун̃н̃а̄та̄ мадхугол̣акан̃ча̄ти. те ка̄лассева, бходжджайа̄гум̣ пат̣ийа̄денти мадхугол̣акан̃ча. бхиккхӯ ка̄лассева бходжджайа̄гуйа̄ дха̄та̄ мадхугол̣акена ча бхаттагге на читтарӯпам̣ парибхун̃джанти. тена кхо пана самайена ан̃н̃атарена тарун̣апасаннена маха̄маттена сва̄тана̄йа буддхаппамукхо бхиккхусан̇гхо нимантито хоти. атха кхо тасса тарун̣апасаннасса маха̄маттасса етадахоси – ‘‘йам̣нӯна̄хам̣ ад̣д̣хателасаннам̣ бхиккхусата̄нам̣ ад̣д̣хателаса̄ни мам̣сапа̄тисата̄ни пат̣ийа̄деййам̣, екамекасса бхиккхуно екамекам̣ мам̣сапа̄тим̣ упана̄меййа’’нти. атха кхо со тарун̣апасанно маха̄матто тасса̄ раттийа̄ аччайена пан̣ӣтам̣ кха̄данӣйам̣ бходжанӣйам̣ пат̣ийа̄да̄петва̄ ад̣д̣хателаса̄ни ча мам̣сапа̄тисата̄ни, бхагавато ка̄лам̣ а̄роча̄песи – ‘‘ка̄ло, бханте, нит̣т̣хитам̣ бхатта’’нти. атха кхо бхагава̄ пуббан̣хасамайам̣ нива̄сетва̄ паттачӣварама̄да̄йа йена тасса тарун̣апасаннасса маха̄маттасса нивесанам̣ тенупасан̇ками, упасан̇камитва̄ пан̃н̃атте а̄сане нисӣди, саддхим̣ бхиккхусан̇гхена. атха кхо со тарун̣апасанно маха̄матто бхаттагге бхиккхӯ паривисати. бхиккхӯ евама̄хам̣су – ‘‘тхокам̣, а̄вусо, дехи; тхокам̣, а̄вусо, дехӣ’’ти. ‘‘ма̄ кхо тумхе, бханте, – ‘айам̣ тарун̣апасанно маха̄матто’ти – тхокам̣ тхокам̣ пат̣игган̣хатха. бахум̣ ме кха̄данӣйам̣ бходжанӣйам̣ пат̣ийаттам̣, ад̣д̣хателаса̄ни ча мам̣сапа̄тисата̄ни. екамекасса бхиккхуно екамекам̣ мам̣сапа̄тим̣ упана̄месса̄мӣти. пат̣игган̣хатха, бханте, йа̄вадаттха’’нти. ‘‘на кхо майам̣, а̄вусо, етам̣ка̄ран̣а̄ тхокам̣ тхокам̣ пат̣игган̣ха̄ма, апи ча майам̣ ка̄лассева бходжджайа̄гуйа̄ дха̄та̄ мадхугол̣акена ча. тена майам̣ тхокам̣ тхокам̣ пат̣игган̣ха̄ма̄’’ти. атха кхо со тарун̣апасанно маха̄матто уджджха̄йати кхиййати випа̄чети – ‘‘катхан̃хи на̄ма бхаданта̄ майа̄ нимантита̄ ан̃н̃асса бходжджайа̄гум̣ парибхун̃джиссанти, на ча̄хам̣ пат̣ибало йа̄вадаттхам̣ да̄ту’’нти купито анаттамано а̄са̄дана̄пеккхо бхиккхӯнам̣ патте пӯренто агама̄си – бхун̃джатха ва̄ харатха ва̄ти. атха кхо со тарун̣апасанно маха̄матто буддхаппамукхам̣ бхиккхусан̇гхам̣ пан̣ӣтена кха̄данӣйена бходжанӣйена сахаттха̄ сантаппетва̄ сампава̄ретва̄ бхагавантам̣ бхутта̄вим̣ онӣтапаттапа̄н̣им̣ екамантам̣ нисӣди. екамантам̣ нисиннам̣ кхо там̣ тарун̣апасаннам̣ маха̄маттам̣ бхагава̄ дхаммийа̄ катха̄йа сандассетва̄ сама̄дапетва̄ самуттеджетва̄ сампахам̣сетва̄ ут̣т̣ха̄йа̄сана̄ пакка̄ми.

атха кхо тасса тарун̣апасаннасса маха̄маттасса ачирапаккантасса бхагавато ахудева куккуччам̣, аху виппат̣иса̄ро – ‘‘ала̄бха̄ вата ме, на вата ме ла̄бха̄; дулладдхам̣ вата ме, на вата ме суладдхам̣; йохам̣ купито анаттамано а̄са̄дана̄пеккхо бхиккхӯнам̣ патте пӯренто агама̄сим̣ – ‘бхун̃джатха ва̄ харатха ва̄’ти. ким̣ ну кхо майа̄ бахум̣ пасутам̣ пун̃н̃ам̣ ва̄ апун̃н̃ам̣ ва̄’’ти? атха кхо со тарун̣апасанно маха̄матто йена бхагава̄ тенупасан̇ками, упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисинно кхо со тарун̣апасанно маха̄матто бхагавантам̣ етадавоча – ‘‘идха майхам̣, бханте, ачирапаккантасса бхагавато ахудева куккуччам̣, аху виппат̣иса̄ро ‘ала̄бха̄ вата ме, на вата ме ла̄бха̄; дулладдхам̣ вата ме, на вата ме суладдхам̣; йохам̣ купито анаттамано а̄са̄дана̄пеккхо бхиккхӯнам̣ патте пӯренто агама̄сим̣ – бхун̃джатха ва̄ харатха ва̄ти. ким̣ ну кхо майа̄ бахум̣ пасутам̣, пун̃н̃ам̣ ва̄ апун̃н̃ам̣ ва̄’ти. ким̣ ну кхо майа̄, бханте, бахум̣ пасутам̣, пун̃н̃ам̣ ва̄ апун̃н̃ам̣ ва̄’’ти? ‘‘йадаггена тайа̄, а̄вусо, сва̄тана̄йа буддхаппамукхо бхиккхусан̇гхо нимантито тадаггена те бахум̣ пун̃н̃ам̣ пасутам̣. йадаггена те екамекена бхиккхуна̄ екамекам̣ ситтхам̣ пат̣иггахитам̣ тадаггена те бахум̣ пун̃н̃ам̣ пасутам̣, сагга̄ те а̄раддха̄’’ти. атха кхо со тарун̣апасанно маха̄матто – ‘‘ла̄бха̄ кира ме, суладдхам̣ кира ме, бахум̣ кира майа̄ пун̃н̃ам̣ пасутам̣, сагга̄ кира ме а̄раддха̄’’ти – хат̣т̣хо удагго ут̣т̣ха̄йа̄сана̄ бхагавантам̣ абхива̄детва̄ падаккхин̣ам̣ катва̄ пакка̄ми. атха кхо бхагава̄ етасмим̣ нида̄не етасмим̣ пакаран̣е бхиккхусан̇гхам̣ саннипа̄та̄петва̄ бхиккхӯ пат̣ипуччхи – ‘‘саччам̣ кира, бхиккхаве, бхиккхӯ ан̃н̃атра нимантита̄ ан̃н̃асса бходжджайа̄гум̣ парибхун̃джантӣ’’ти? ‘‘саччам̣, бхагава̄’’ти. вигарахи буддхо бхагава̄…пе… катхан̃хи на̄ма те, бхиккхаве, могхапуриса̄ ан̃н̃атра нимантита̄ ан̃н̃асса бходжджайа̄гум̣ парибхун̃джиссанти. нетам̣, бхиккхаве, аппасанна̄нам̣ ва̄ паса̄да̄йа…пе… вигарахитва̄ дхаммим̣ катхам̣ катва̄ бхиккхӯ а̄мантеси – ‘‘на, бхиккхаве, ан̃н̃атра нимантитена ан̃н̃асса бходжджайа̄гу парибхун̃джитабба̄. йо парибхун̃джеййа, йатха̄дхаммо ка̄ретаббо’’ти.

тарун̣апасаннамаха̄маттаваттху нит̣т̣хитам̣.