172. белат̣т̣хакачча̄наваттху

284. атха кхо бхагава̄ андхакавинде йатха̄бхирантам̣ вихаритва̄ йена ра̄джагахам̣ тена ча̄рикам̣ пакка̄ми, махата̄ бхиккхусан̇гхена саддхим̣, ад̣д̣хателасехи бхиккхусатехи. тена кхо пана самайена белат̣т̣хо качча̄но ра̄джагаха̄ андхакавиндам̣ аддха̄намаггаппат̣ипанно хоти, пан̃чаматтехи сакат̣асатехи, саббехева гул̣акумбхапӯрехи. аддаса̄ кхо бхагава̄ белат̣т̣хам̣ качча̄нам̣ дӯратова а̄гаччхантам̣, дисва̄на магга̄ оккамма ан̃н̃атарасмим̣ руккхамӯле нисӣди. атха кхо белат̣т̣хо качча̄но йена бхагава̄ тенупасан̇ками, упасан̇камитва̄ бхагавантам̣ абхива̄детва̄ екамантам̣ ат̣т̣ха̄си. екамантам̣ т̣хито кхо белат̣т̣хо качча̄но бхагавантам̣ етадавоча – ‘‘иччха̄махам̣, бханте, екамекасса бхиккхуно екамекам̣ гул̣акумбхам̣ да̄ту’’нти. ‘‘тена хи твам̣, качча̄на, екам̣йева гул̣акумбхам̣ а̄хара̄’’ти. ‘‘евам̣, бханте’’ти кхо белат̣т̣хо качча̄но бхагавато пат̣иссун̣итва̄ екам̣йева гул̣акумбхам̣ а̄да̄йа йена бхагава̄ тенупасан̇ками, упасан̇камитва̄ бхагавантам̣ етадавоча – ‘‘а̄бхато [а̄хат̣о (сӣ. сйа̄. ка.)], бханте, гул̣акумбхо; катха̄хам̣, бханте, пат̣ипаджджа̄мӣ’’ти? ‘‘тена хи твам̣, качча̄на, бхиккхӯнам̣ гул̣ам̣ дехӣ’’ти. ‘‘евам̣, бханте’’ти кхо белат̣т̣хо качча̄но бхагавато пат̣иссун̣итва̄ бхиккхӯнам̣ гул̣ам̣ датва̄ бхагавантам̣ етадавоча – ‘‘динно, бханте, бхиккхӯнам̣ гул̣о, баху ча̄йам̣ гул̣о авасит̣т̣хо. катха̄хам̣, бханте, пат̣ипаджджа̄мӣ’’ти? ‘‘тена хи твам̣, качча̄на, бхиккхӯнам̣ гул̣ам̣ йа̄вадаттхам̣ дехӣ’’ти. ‘‘евам̣, бханте’’ти кхо белат̣т̣хо качча̄но бхагавато пат̣иссун̣итва̄ бхиккхӯнам̣ гул̣ам̣ йа̄вадаттхам̣ датва̄ бхагавантам̣ етадавоча – ‘‘динно, бханте, бхиккхӯнам̣ гул̣о йа̄вадаттхо, баху ча̄йам̣ гул̣о авасит̣т̣хо. катха̄хам̣, бханте, пат̣ипаджджа̄мӣ’’ти? ‘‘тена хи твам̣, качча̄на, бхиккхӯ гул̣ехи сантаппехӣ’’ти. ‘‘евам̣, бханте’’ти кхо белат̣т̣хо качча̄но бхагавато пат̣иссун̣итва̄ бхиккхӯ гул̣ехи сантаппеси. екачче бхиккхӯ паттепи пӯресум̣ парисса̄вана̄нипи тхавика̄йопи пӯресум̣. атха кхо белат̣т̣хо качча̄но бхиккхӯ гул̣ехи сантаппетва̄ бхагавантам̣ етадавоча – ‘‘сантаппита̄, бханте, бхиккхӯ гул̣ехи, баху ча̄йам̣ гул̣о авасит̣т̣хо. катха̄хам̣, бханте, пат̣ипаджджа̄мӣ’’ти? ‘‘тена хи твам̣, качча̄на, вигха̄са̄да̄нам̣ гул̣ам̣ дехӣ’’ти. ‘‘евам̣, бханте’’ти кхо белат̣т̣хо качча̄но бхагавато пат̣иссун̣итва̄ вигха̄са̄да̄нам̣ гул̣ам̣ датва̄ бхагавантам̣ етадавоча – ‘‘динно, бханте, вигха̄са̄да̄нам̣ гул̣о, баху ча̄йам̣ гул̣о авасит̣т̣хо. катха̄хам̣, бханте, пат̣ипаджджа̄мӣ’’ти? ‘‘тена хи твам̣, качча̄на, вигха̄са̄да̄нам̣ гул̣ам̣ йа̄вадаттхам̣ дехӣ’’ти. ‘‘евам̣, бханте’’ти кхо белат̣т̣хо качча̄но бхагавато пат̣иссун̣итва̄ вигха̄са̄да̄нам̣ гул̣ам̣ йа̄вадаттхам̣ датва̄ бхагавантам̣ етадавоча – ‘‘динно, бханте, вигха̄са̄да̄нам̣ гул̣о йа̄вадаттхо, баху ча̄йам̣ гул̣о авасит̣т̣хо. катха̄хам̣, бханте, пат̣ипаджджа̄мӣ’’ти? ‘‘тена хи твам̣, качча̄на, вигха̄са̄де гул̣ехи сантаппехӣ’’ти. ‘‘евам̣, бханте’’ти кхо белат̣т̣хо качча̄но бхагавато пат̣иссун̣итва̄ вигха̄са̄де гул̣ехи сантаппеси. екачче вигха̄са̄да̄ коламбепи гхат̣епи пӯресум̣, пит̣ака̄нипи уччхан̇гепи пӯресум̣. атха кхо белат̣т̣хо качча̄но вигха̄са̄де гул̣ехи сантаппетва̄ бхагавантам̣ етадавоча – ‘‘сантаппита̄, бханте, вигха̄са̄да̄ гул̣ехи, баху ча̄йам̣ гул̣о авасит̣т̣хо. катха̄хам̣, бханте, пат̣ипаджджа̄мӣ’’ти? ‘‘на̄хам̣ там̣, качча̄на, пасса̄ми садеваке локе сама̄раке сабрахмаке сассаман̣абра̄хман̣ийа̄ паджа̄йа садеваманусса̄йа йасса со гул̣о парибхутто самма̄ парин̣а̄мам̣ гаччхеййа, ан̃н̃атра татха̄гатасса ва̄ татха̄гатаса̄вакасса ва̄. тена хи твам̣, качча̄на, там̣ гул̣ам̣ аппахарите ва̄ чхад̣д̣ехи, аппа̄н̣аке ва̄ удаке опила̄пехӣ’’ти. ‘‘евам̣, бханте’’ти кхо белат̣т̣хо качча̄но бхагавато пат̣иссун̣итва̄ там̣ гул̣ам̣ аппа̄н̣аке удаке опила̄пети. атха кхо со гул̣о удаке паккхитто чиччит̣а̄йати чит̣ичит̣а̄йати падхӯпа̄йати [сандхӯпа̄йати (сӣ. сйа̄.)] сампадхӯпа̄йати. сеййатха̄пи на̄ма пха̄ло дивасам̣сантатто удаке паккхитто чиччит̣а̄йати чит̣ичит̣а̄йати падхӯпа̄йати сампадхӯпа̄йати, евамева со гул̣о удаке паккхитто чиччит̣а̄йати чит̣ичит̣а̄йати падхӯпа̄йати сампадхӯпа̄йати.

атха кхо белат̣т̣хо качча̄но сам̣вигго ломахат̣т̣хаджа̄то йена бхагава̄ тенупасан̇ками, упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисиннасса кхо белат̣т̣хасса качча̄насса бхагава̄ анупуббим̣ катхам̣ катхеси, сеййатхидам̣ – ‘‘да̄накатхам̣ сӣлакатхам̣ саггакатхам̣, ка̄ма̄нам̣ а̄дӣнавам̣ ока̄рам̣ сам̣килесам̣, неккхамме а̄нисам̣сам̣ пака̄сеси. йада̄ бхагава̄ ан̃н̃а̄си белат̣т̣хам̣ качча̄нам̣ каллачиттам̣, мудучиттам̣, винӣваран̣ачиттам̣, удаггачиттам̣, пасанначиттам̣, атха йа̄ буддха̄нам̣ са̄муккам̣сика̄ дхаммадесана̄, там̣ пака̄сеси…пе… евамева белат̣т̣хасса качча̄насса тасмим̣йева а̄сане вираджам̣ вӣтамалам̣ дхаммачаккхум̣ удапа̄ди – йам̣ кин̃чи самудайадхаммам̣ саббам̣ там̣ ниродхадхамманти. атха кхо белат̣т̣хо качча̄но дит̣т̣хадхаммо паттадхаммо видитадхаммо парийога̄л̣хадхаммо тин̣н̣авичикиччхо вигатакатхам̣катхо веса̄раджджаппатто апараппаччайо саттхуса̄сане бхагавантам̣ етадавоча – ‘‘абхиккантам̣, бханте. абхиккантам̣, бханте. сеййатха̄пи, бханте, никкуджджитам̣ ва̄ уккуджджеййа…пе… евамевам̣ кхо бхагавата̄ анекапарийа̄йена дхаммо пака̄сито. еса̄хам̣, бханте, бхагавантам̣ саран̣ам̣ гаччха̄ми, дхамман̃ча, бхиккхусан̇гхан̃ча. упа̄сакам̣ мам̣ бхагава̄ дха̄рету аджджатагге па̄н̣упетам̣ саран̣агата’’нти.

атха кхо бхагава̄ анупуббена ча̄рикам̣ чарама̄но йена ра̄джагахам̣ тадавасари. татра судам̣ бхагава̄ ра̄джагахе вихарати вел̣уване каландаканива̄пе. тена кхо пана самайена ра̄джагахе гул̣о уссанно хоти. бхиккхӯ – гила̄нассева бхагавата̄ гул̣о анун̃н̃а̄то, но агила̄насса̄ти – куккучча̄йанта̄ гул̣ам̣ на бхун̃джанти. бхагавато етаматтхам̣ а̄рочесум̣. ануджа̄на̄ми, бхиккхаве, гила̄насса гул̣ам̣, агила̄насса гул̣одаканти.

белат̣т̣хакачча̄наваттху нит̣т̣хитам̣.