169. хаттхимам̣са̄дипат̣иккхепакатха̄

281. тена кхо пана самайена ран̃н̃о хаттхӣ маранти. манусса̄ дуббхиккхе хаттхимам̣сам̣ парибхун̃джанти, бхиккхӯнам̣ пин̣д̣а̄йа чаранта̄нам̣ хаттхимам̣сам̣ денти. бхиккхӯ хаттхимам̣сам̣ парибхун̃джанти. манусса̄ уджджха̄йанти кхиййанти випа̄ченти – ‘‘катхан̃хи на̄ма саман̣а̄ сакйапуттийа̄ хаттхимам̣сам̣ парибхун̃джиссанти. ра̄джан̇гам̣ хаттхӣ, саче ра̄джа̄ джа̄неййа, на несам̣ аттамано асса̄’’ти. бхагавато етаматтхам̣ а̄рочесум̣. на, бхиккхаве, хаттхимам̣сам̣ парибхун̃джитаббам̣. йо парибхун̃джеййа, а̄патти дуккат̣асса̄ти.

тена кхо пана самайена ран̃н̃о асса̄ маранти. манусса̄ дуббхиккхе ассамам̣сам̣ парибхун̃джанти, бхиккхӯнам̣ пин̣д̣а̄йа чаранта̄нам̣ ассамам̣сам̣ денти. бхиккхӯ ассамам̣сам̣ парибхун̃джанти. манусса̄ уджджха̄йанти кхиййанти випа̄ченти – ‘‘катхан̃хи на̄ма саман̣а̄ сакйапуттийа̄ ассамам̣сам̣ парибхун̃джиссанти. ра̄джан̇гам̣ асса̄, саче ра̄джа̄ джа̄неййа, на несам̣ аттамано асса̄’’ти. бхагавато етаматтхам̣ а̄рочесум̣. на, бхиккхаве, ассамам̣сам̣ парибхун̃джитаббам̣. йо парибхун̃джеййа, а̄патти дуккат̣асса̄ти.

тена кхо пана самайена манусса̄ дуббхиккхе сунакхамам̣сам̣ парибхун̃джанти, бхиккхӯнам̣ пин̣д̣а̄йа чаранта̄нам̣ сунакхамам̣сам̣ денти. бхиккхӯ сунакхамам̣сам̣ парибхун̃джанти. манусса̄ уджджха̄йанти кхиййанти випа̄ченти – ‘‘катхан̃хи на̄ма саман̣а̄ сакйапуттийа̄ сунакхамам̣сам̣ парибхун̃джиссанти, джегуччхо сунакхо пат̣икӯло’’ти. бхагавато етаматтхам̣ а̄рочесум̣. на, бхиккхаве, сунакхамам̣сам̣ парибхун̃джитаббам̣. йо парибхун̃джеййа, а̄патти дуккат̣асса̄ти.

тена кхо пана самайена манусса̄ дуббхиккхе ахимам̣сам̣ парибхун̃джанти, бхиккхӯнам̣ пин̣д̣а̄йа чаранта̄нам̣ ахимам̣сам̣ денти. бхиккхӯ ахимам̣сам̣ парибхун̃джанти. манусса̄ уджджха̄йанти кхиййанти випа̄ченти – ‘‘катхан̃хи на̄ма саман̣а̄ сакйапуттийа̄ ахимам̣сам̣ парибхун̃джиссанти, джегуччхо ахи пат̣икӯло’’ти. супассопи [супхассо (сӣ.)] на̄гара̄джа̄ йена бхагава̄ тенупасан̇ками, упасан̇камитва̄ бхагавантам̣ абхива̄детва̄ екамантам̣ ат̣т̣ха̄си. екамантам̣ т̣хито кхо супассо на̄гара̄джа̄ бхагавантам̣ етадавоча – ‘‘санти, бханте, на̄га̄ ассаддха̄ аппасанна̄. те аппаматтакехипи бхиккхӯ вихет̣хеййум̣. са̄дху, бханте, аййа̄ ахимам̣сам̣ на парибхун̃джеййу’’нти. атха кхо бхагава̄ супассам̣ на̄гара̄джа̄нам̣ дхаммийа̄ катха̄йа сандассеси…пе… падаккхин̣ам̣ катва̄ пакка̄ми. атха кхо бхагава̄ етасмим̣ нида̄не етасмим̣ пакаран̣е дхаммим̣ катхам̣ катва̄ бхиккхӯ а̄мантеси – ‘‘на, бхиккхаве, ахимам̣сам̣ парибхун̃джитаббам̣. йо парибхун̃джеййа, а̄патти дуккат̣асса̄’’ти.

тена кхо пана самайена луддака̄ сӣхам̣ хантва̄ сӣхамам̣сам̣ [мам̣сам̣ (ка.)] парибхун̃джанти, бхиккхӯнам̣ пин̣д̣а̄йа чаранта̄нам̣ сӣхамам̣сам̣ денти. бхиккхӯ сӣхамам̣сам̣ парибхун̃джитва̄ аран̃н̃е вихаранти. сӣха̄ сӣхамам̣сагандхена бхиккхӯ парипа̄тенти. бхагавато етаматтхам̣ а̄рочесум̣. на, бхиккхаве, сӣхамам̣сам̣ парибхун̃джитаббам̣. йо парибхун̃джеййа, а̄патти дуккат̣асса̄ти.

тена кхо пана самайена луддака̄ бйаггхам̣ хантва̄…пе… дӣпим̣ хантва̄…пе… аччхам̣ хантва̄…пе… тараччхам̣ хантва̄ тараччхамам̣сам̣ парибхун̃джанти, бхиккхӯнам̣ пин̣д̣а̄йа чаранта̄нам̣ тараччхамам̣сам̣ денти. бхиккхӯ тараччхамам̣сам̣ парибхун̃джитва̄ аран̃н̃е вихаранти. тараччха̄ тараччхамам̣сагандхена бхиккхӯ парипа̄тенти. бхагавато етаматтхам̣ а̄рочесум̣. на, бхиккхаве, тараччхамам̣сам̣ парибхун̃джитаббам̣. йо парибхун̃джеййа, а̄патти дуккат̣асса̄ти.

хаттхимам̣са̄дипат̣иккхепакатха̄ нит̣т̣хита̄.

суппийабха̄н̣ава̄ро нит̣т̣хито дутийо.