160. пан̃чабхесаджджакатха̄

260. тена самайена буддхо бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. тена кхо пана самайена бхиккхӯнам̣ са̄радикена а̄ба̄дхена пхут̣т̣ха̄нам̣ йа̄гупи пӣта̄ уггаччхати, бхаттампи бхуттам̣ уггаччхати. те тена киса̄ хонти, лӯкха̄, дуббан̣н̣а̄, уппан̣д̣уппан̣д̣укаджа̄та̄, дхаманисантхатагатта̄. аддаса̄ кхо бхагава̄ те бхиккхӯ кисе лӯкхе дуббан̣н̣е уппан̣д̣уппан̣д̣укаджа̄те дхаманисантхатагатте, дисва̄на а̄йасмантам̣ а̄нандам̣ а̄мантеси – ‘‘ким̣ ну кхо, а̄нанда, етарахи бхиккхӯ киса̄, лӯкха̄, дуббан̣н̣а̄, уппан̣д̣уппан̣д̣укаджа̄та̄, дхаманисантхатагатта̄’’ти? ‘‘етарахи, бханте, бхиккхӯнам̣ са̄радикена а̄ба̄дхена пхут̣т̣ха̄нам̣ йа̄гупи пӣта̄ уггаччхати, бхаттампи бхуттам̣ уггаччхати. те тена киса̄ хонти, лӯкха̄, дуббан̣н̣а̄, уппан̣д̣уппан̣д̣укаджа̄та̄, дхаманисантхатагатта̄’’ти. атха кхо бхагавато рахогатасса пат̣исаллӣнасса евам̣ четасо паривитакко удапа̄ди – ‘‘етарахи кхо бхиккхӯнам̣ са̄радикена а̄ба̄дхена пхут̣т̣ха̄нам̣ йа̄гупи пӣта̄ уггаччхати, бхаттампи бхуттам̣ уггаччхати. те тена киса̄ хонти, лӯкха̄, дуббан̣н̣а̄, уппан̣д̣уппан̣д̣укаджа̄та̄, дхаманисантхатагатта̄. ким̣ ну кхо ахам̣ бхиккхӯнам̣ бхесаджджам̣ ануджа̄неййам̣, йам̣ бхесаджджан̃чева асса бхесаджджасамматан̃ча локасса, а̄ха̄раттхан̃ча пхареййа, на ча ол̣а̄рико а̄ха̄ро пан̃н̃а̄йеййа̄’’ти? атха кхо бхагавато етадахоси – ‘‘има̄ни кхо пан̃ча бхесаджджа̄ни, сеййатхидам̣ – саппи, наванӣтам̣, телам̣, мадху, пха̄н̣итам̣; бхесаджджа̄ни чева бхесаджджасаммата̄ни ча локасса, а̄ха̄раттхан̃ча пхаранти, на ча ол̣а̄рико а̄ха̄ро пан̃н̃а̄йати. йам̣нӯна̄хам̣ бхиккхӯнам̣ има̄ни пан̃ча бхесаджджа̄ни ануджа̄неййам̣, ка̄ле пат̣иггахетва̄ ка̄ле парибхун̃джиту’’нти. атха кхо бхагава̄ са̄йанхасамайам̣ пат̣исалла̄на̄ вут̣т̣хито етасмим̣ нида̄не етасмим̣ пакаран̣е дхаммим̣ катхам̣ катва̄ бхиккхӯ а̄мантеси – ‘‘идха майхам̣, бхиккхаве, рахогатасса пат̣исаллӣнасса евам̣ четасо паривитакко удапа̄ди – ‘етарахи кхо бхиккхӯнам̣ са̄радикена а̄ба̄дхена пхут̣т̣ха̄нам̣ йа̄гупи пӣта̄ уггаччхати, бхаттампи бхуттам̣ уггаччхати. те тена киса̄ хонти, лӯкха̄, дуббан̣н̣а̄, уппан̣д̣уппан̣д̣укаджа̄та̄, дхаманисантхатагатта̄. ким̣ ну кхо ахам̣ бхиккхӯнам̣ бхесаджджам̣ ануджа̄неййам̣, йам̣ бхесаджджан̃чева асса бхесаджджасамматан̃ча локасса, а̄ха̄раттхан̃ча пхареййа, на ча ол̣а̄рико а̄ха̄ро пан̃н̃а̄йеййа̄’ти. тасса майхам̣, бхиккхаве, етадахоси ‘има̄ни кхо пан̃ча бхесаджджа̄ни, сеййатхидам̣ – саппи, наванӣтам̣, телам̣, мадху, пха̄н̣итам̣; бхесаджджа̄ни чева бхесаджджасаммата̄ни ча локасса, а̄ха̄раттхан̃ча пхаранти, на ча ол̣а̄рико а̄ха̄ро пан̃н̃а̄йати. йам̣нӯна̄хам̣ бхиккхӯнам̣ има̄ни пан̃ча бхесаджджа̄ни ануджа̄неййам̣, ка̄ле пат̣иггахетва̄ ка̄ле парибхун̃джиту’нти. ануджа̄на̄ми, бхиккхаве, та̄ни пан̃ча бхесаджджа̄ни ка̄ле пат̣иггахетва̄ ка̄ле парибхун̃джиту’’нти.

261. тена кхо пана самайена бхиккхӯ та̄ни пан̃ча бхесаджджа̄ни ка̄ле пат̣иггахетва̄ ка̄ле парибхун̃джанти. тесам̣ йа̄нипи та̄ни па̄катика̄ни лӯкха̄ни бходжана̄ни та̄нипи наччха̄денти, пагева сенесита̄ни [сенесика̄ни (сӣ. сйа̄.), сенехика̄ни (йоджана̄)]. те тена чева са̄радикена а̄ба̄дхена пхут̣т̣ха̄, имина̄ ча бхатта̄ччха̄дакена [бхатта̄ччханнакена (ка.)], тадубхайена бхиййосоматта̄йа киса̄ хонти, лӯкха̄, дуббан̣н̣а̄, уппан̣д̣уппан̣д̣укаджа̄та̄, дхаманисантхатагатта̄. аддаса̄ кхо бхагава̄ те бхиккхӯ бхиййосоматта̄йа кисе лӯкхе дуббан̣н̣е уппан̣д̣уппан̣д̣укаджа̄те дхаманисантхатагатте, дисва̄на а̄йасмантам̣ а̄нандам̣ а̄мантеси – ‘‘ким̣ ну кхо, а̄нанда, етарахи бхиккхӯ бхиййосоматта̄йа киса̄, лӯкха̄, дуббан̣н̣а̄, уппан̣д̣уппан̣д̣укаджа̄та̄, дхаманисантхатагатта̄’’ти? ‘‘етарахи, бханте, бхиккхӯ та̄ни ча пан̃ча бхесаджджа̄ни ка̄ле пат̣иггахетва̄ ка̄ле парибхун̃джанти. тесам̣ йа̄нипи та̄ни па̄катика̄ни лӯкха̄ни бходжана̄ни та̄нипи наччха̄денти, пагева сенесика̄ни. те тена чева са̄радикена а̄ба̄дхена пхут̣т̣ха̄, имина̄ ча бхатта̄ччха̄дакена, тадубхайена бхиййосоматта̄йа киса̄, лӯкха̄, дуббан̣н̣а̄, уппан̣д̣уппан̣д̣укаджа̄та̄, дхаманисантхатагатта̄’’ти. атха кхо бхагава̄ етасмим̣ нида̄не етасмим̣ пакаран̣е дхаммим̣ катхам̣ катва̄ бхиккхӯ а̄мантеси – ‘‘ануджа̄на̄ми, бхиккхаве, та̄ни пан̃ча бхесаджджа̄ни пат̣иггахетва̄ ка̄лепи вика̄лепи парибхун̃джиту’’нти.

262. тена кхо пана самайена гила̄на̄нам̣ бхиккхӯнам̣ васехи бхесаджджехи аттхо хоти. бхагавато етаматтхам̣ а̄рочесум̣. ануджа̄на̄ми, бхиккхаве, васа̄ни бхесаджджа̄ни – аччхавасам̣, маччхавасам̣, сусука̄васам̣, сӯкаравасам̣, гадрабхавасам̣ – ка̄ле пат̣иггахитам̣ ка̄ле ниппаккам̣ [нипаккам̣ (ка.)] ка̄ле сам̣сат̣т̣хам̣ телапарибхогена парибхун̃джитум̣. вика̄ле че, бхиккхаве, пат̣иггахитам̣ вика̄ле ниппаккам̣ вика̄ле сам̣сат̣т̣хам̣, там̣ че парибхун̃джеййа, а̄патти тин̣н̣ам̣ дуккат̣а̄нам̣. ка̄ле че, бхиккхаве, пат̣иггахитам̣ вика̄ле ниппаккам̣ вика̄ле сам̣сат̣т̣хам̣, там̣ че парибхун̃джеййа, а̄патти двиннам̣ дуккат̣а̄нам̣. ка̄ле че, бхиккхаве, пат̣иггахитам̣ ка̄ле ниппаккам̣ вика̄ле сам̣сат̣т̣хам̣, там̣ че парибхун̃джеййа, а̄патти дуккат̣асса. ка̄ле че, бхиккхаве, пат̣иггахитам̣ ка̄ле ниппаккам̣ ка̄ле сам̣сат̣т̣хам̣, там̣ че парибхун̃джеййа, ана̄паттӣти.

пан̃чабхесаджджакатха̄ нит̣т̣хита̄.