161. мӯла̄дибхесаджджакатха̄

263. тена кхо пана самайена гила̄на̄нам̣ бхиккхӯнам̣ мӯлехи бхесаджджехи аттхо хоти. бхагавато етаматтхам̣ а̄рочесум̣. ануджа̄на̄ми, бхиккхаве, мӯла̄ни бхесаджджа̄ни – халиддим̣, син̇гиверам̣, вачам̣, вачаттхам̣ [вачаттхам̣ (сӣ. сйа̄.)], ативисам̣, кат̣укарохин̣им̣, усӣрам̣, бхаддамуттакам̣, йа̄ни ва̄ панан̃н̃а̄нипи аттхи мӯла̄ни бхесаджджа̄ни, нева кха̄данӣйе кха̄данӣйаттхам̣ пхаранти, на бходжанӣйе бходжанӣйаттхам̣ пхаранти, та̄ни – пат̣иггахетва̄ йа̄ваджӣвам̣ парихаритум̣; сати паччайе парибхун̃джитум̣. асати паччайе парибхун̃джантасса а̄патти дуккат̣асса̄ти.

тена кхо пана самайена гила̄на̄нам̣ бхиккхӯнам̣ мӯлехи бхесаджджехи пит̣т̣хехи аттхо хоти. бхагавато етаматтхам̣ а̄рочесум̣. ануджа̄на̄ми, бхиккхаве, нисадам̣ нисадапотаканти.

тена кхо пана самайена гила̄на̄нам̣ бхиккхӯнам̣ каса̄вехи бхесаджджехи аттхо хоти. бхагавато етаматтхам̣ а̄рочесум̣. ануджа̄на̄ми, бхиккхаве, каса̄ва̄ни [каса̄вабхесаджджа̄ни (ка.)] бхесаджджа̄ни – нимбакаса̄вам̣, кут̣аджакаса̄вам̣, пат̣олакаса̄вам̣, пхаггавакаса̄вам̣, наттама̄лакаса̄вам̣, йа̄ни ва̄ панан̃н̃а̄нипи аттхи каса̄ва̄ни бхесаджджа̄ни нева кха̄данӣйе кха̄данӣйаттхам̣ пхаранти, на бходжанӣйе бходжанӣйаттхам̣ пхаранти, та̄ни – пат̣иггахетва̄ йа̄ваджӣвам̣ парихаритум̣; сати паччайе парибхун̃джитум̣. асати паччайе парибхун̃джантасса а̄патти дуккат̣асса̄ти.

тена кхо пана самайена гила̄на̄нам̣ бхиккхӯнам̣ пан̣н̣ехи бхесаджджехи аттхо хоти. бхагавато етаматтхам̣ а̄рочесум̣. ануджа̄на̄ми, бхиккхаве, пан̣н̣а̄ни бхесаджджа̄ни – нимбапан̣н̣ам̣, кут̣аджапан̣н̣ам̣, пат̣олапан̣н̣ам̣, суласипан̣н̣ам̣, каппа̄сапан̣н̣ам̣, йа̄ни ва̄ панан̃н̃а̄нипи аттхи пан̣н̣а̄ни бхесаджджа̄ни, нева кха̄данӣйе кха̄данӣйаттхам̣ пхаранти, на бходжанӣйе бходжанӣйаттхам̣ пхаранти…пе….

тена кхо пана самайена гила̄на̄нам̣ бхиккхӯнам̣ пхалехи бхесаджджехи аттхо хоти. бхагавато етаматтхам̣ а̄рочесум̣. ануджа̄на̄ми, бхиккхаве, пхала̄ни бхесаджджа̄ни – билан̇гам̣, пиппалим̣, маричам̣, харӣтакам̣, вибхӣтакам̣, а̄малакам̣, гот̣т̣хапхалам̣ [гот̣хапхалам̣ (сйа̄.), кот̣т̣хапхалам̣ (ка.)], йа̄ни ва̄ панан̃н̃а̄нипи аттхи пхала̄ни бхесаджджа̄ни, нева кха̄данӣйе кха̄данӣйаттхам̣ пхаранти, на бходжанӣйе бходжанӣйаттхам̣ пхаранти…пе….

тена кхо пана самайена гила̄на̄нам̣ бхиккхӯнам̣ джатӯхи бхесаджджехи аттхо хоти. бхагавато етаматтхам̣ а̄рочесум̣. ануджа̄на̄ми, бхиккхаве, джатӯни бхесаджджа̄ни – хин̇гум̣, хин̇гуджатум̣, хин̇гусипа̄т̣икам̣, такам̣, такапаттим̣, такапан̣н̣им̣, саджджуласам̣, йа̄ни ва̄ панан̃н̃а̄нипи аттхи джатӯни бхесаджджа̄ни, нева кха̄данӣйе кха̄данӣйаттхам̣ пхаранти…пе….

тена кхо пана самайена гила̄на̄нам̣ бхиккхӯнам̣ лон̣ехи бхесаджджехи аттхо хоти. бхагавато етаматтхам̣ а̄рочесум̣. ануджа̄на̄ми, бхиккхаве, лон̣а̄ни бхесаджджа̄ни – са̄муддам̣, ка̄л̣алон̣ам̣, синдхавам̣, уббхидам̣ [уббхирам̣ (ка.)], билам̣ [бил̣а̄лам̣ (сӣ.)], йа̄ни ва̄ панан̃н̃а̄нипи аттхи лон̣а̄ни бхесаджджа̄ни, нева кха̄данӣйе кха̄данӣйаттхам̣ пхаранти, на бходжанӣйе бходжанӣйаттхам̣ пхаранти, та̄ни – пат̣иггахетва̄ йа̄ваджӣвам̣ парихаритум̣; сати паччайе парибхун̃джитум̣. асати паччайе парибхун̃джантасса а̄патти дуккат̣асса̄ти.

264. тена кхо пана самайена а̄йасмато а̄нандасса упаджджха̄йасса а̄йасмато белат̣т̣хасӣсасса тхуллакаччха̄ба̄дхо хоти. тасса ласика̄йа чӣвара̄ни ка̄йе лагганти, та̄ни бхиккхӯ удакена теметва̄ теметва̄ апакад̣д̣ханти. аддаса̄ кхо бхагава̄ сена̄санача̄рикам̣ а̄хин̣д̣анто те бхиккхӯ та̄ни чӣвара̄ни удакена теметва̄ теметва̄ апакад̣д̣ханте, дисва̄на йена те бхиккхӯ тенупасан̇ками, упасан̇камитва̄ те бхиккхӯ етадавоча – ‘‘ким̣ имасса, бхиккхаве, бхиккхуно а̄ба̄дхо’’ти? ‘‘имасса, бханте, а̄йасмато тхуллакаччха̄ба̄дхо, ласика̄йа чӣвара̄ни ка̄йе лагганти, та̄ни майам̣ удакена теметва̄ теметва̄ апакад̣д̣ха̄ма̄’’ти. атха кхо бхагава̄ етасмим̣ нида̄не етасмим̣ пакаран̣е дхаммим̣ катхам̣ катва̄ бхиккхӯ а̄мантеси – ‘‘ануджа̄на̄ми, бхиккхаве, йасса кан̣д̣у ва̄, пил̣ака̄ ва̄, асса̄во ва̄, тхуллакаччху ва̄ а̄ба̄дхо, ка̄йо ва̄ дуггандхо, чун̣н̣а̄ни бхесаджджа̄ни; агила̄насса чхакан̣ам̣ маттикам̣ раджананиппаккам̣. ануджа̄на̄ми, бхиккхаве, удуккхалам̣ мусала’’нти.

тена кхо пана самайена гила̄на̄нам̣ бхиккхӯнам̣ чун̣н̣ехи бхесаджджехи ча̄литехи аттхо хоти. бхагавато етаматтхам̣ а̄рочесум̣. ануджа̄на̄ми, бхиккхаве, чун̣н̣ача̄лининти. сан̣хехи аттхо хоти. бхагавато етаматтхам̣ а̄рочесум̣. ануджа̄на̄ми, бхиккхаве, дуссача̄лининти.

тена кхо пана самайена ан̃н̃атарасса бхиккхуно амануссика̄ба̄дхо хоти. там̣ а̄чарийупаджджха̄йа̄ упат̣т̣хаханта̄ на̄саккхим̣су арогам̣ ка̄тум̣. со сӯкарасӯнам̣ гантва̄ а̄макамам̣сам̣ кха̄ди, а̄макалохитам̣ пиви. тасса со амануссика̄ба̄дхо пат̣иппассамбхи. бхагавато етаматтхам̣ а̄рочесум̣. ануджа̄на̄ми, бхиккхаве, амануссика̄ба̄дхе а̄макамам̣сам̣ а̄макалохитанти.

265. тена кхо пана самайена ан̃н̃атарасса бхиккхуно чаккхурога̄ба̄дхо хоти. там̣ бхиккхӯ париггахетва̄ учча̄рампи пасса̄вампи никкха̄менти. аддаса̄ кхо бхагава̄ сена̄санача̄рикам̣ а̄хин̣д̣анто те бхиккхӯ там̣ бхиккхум̣ париггахетва̄ учча̄рампи пасса̄вампи никкха̄менте, дисва̄на йена те бхиккхӯ тенупасан̇ками, упасан̇камитва̄ те бхиккхӯ етадавоча – ‘‘ким̣ имасса, бхиккхаве, бхиккхуно а̄ба̄дхо’’ти? ‘‘имасса, бханте, а̄йасмато чаккхурога̄ба̄дхо. имам̣ майам̣ париггахетва̄ учча̄рампи пасса̄вампи никкха̄мема̄’’ти. атха кхо бхагава̄ етасмим̣ нида̄не етасмим̣ пакаран̣е дхаммим̣ катхам̣ катва̄ бхиккхӯ а̄мантеси – ‘‘ануджа̄на̄ми, бхиккхаве, ан̃джанам̣ – ка̄л̣ан̃джанам̣, расан̃джанам̣, сотан̃джанам̣, герукам̣, капалла’’нти. ан̃джанӯпаписанехи аттхо хоти. бхагавато етаматтхам̣ а̄рочесум̣. ануджа̄на̄ми, бхиккхаве, чанданам̣, тагарам̣, ка̄л̣а̄нуса̄рийам̣, та̄лӣсам̣, бхаддамуттаканти. тена кхо пана самайена бхиккхӯ пит̣т̣ха̄ни ан̃джана̄ни чарукесупи [тха̄лакесупи (сӣ. сйа̄.)] сара̄вакесупи никкхипанти; тин̣ачун̣н̣ехипи пам̣сукехипи окирийанти. бхагавато етаматтхам̣ а̄рочесум̣. ануджа̄на̄ми, бхиккхаве, ан̃джанинти.

тена кхо пана самайена чхаббаггийа̄ бхиккхӯ учча̄вача̄ ан̃джанийо дха̄ренти – сован̣н̣амайам̣, рӯпийамайам̣. манусса̄ уджджха̄йанти кхиййанти випа̄ченти – ‘‘сеййатха̄пи гихӣ ка̄мабхогино’’ти. бхагавато етаматтхам̣ а̄рочесум̣. на, бхиккхаве, учча̄вача̄ ан̃джанӣ дха̄ретабба̄. йо дха̄реййа, а̄патти дуккат̣асса. ануджа̄на̄ми, бхиккхаве, ат̣т̣химайам̣, дантамайам̣, виса̄н̣амайам̣, нал̣амайам̣, вел̣умайам̣, кат̣т̣хамайам̣, джатумайам̣, пхаламайам̣, лохамайам̣, сан̇кхана̄бхимайанти.

тена кхо пана самайена ан̃джанийо апа̄рута̄ хонти, тин̣ачун̣н̣ехипи пам̣сукехипи окирийанти. бхагавато етаматтхам̣ а̄рочесум̣. ануджа̄на̄ми, бхиккхаве, апидха̄нанти. апидха̄нам̣ нипатати. бхагавато етаматтхам̣ а̄рочесум̣. ануджа̄на̄ми, бхиккхаве, суттакена бандхитва̄ ан̃джанийа̄ бандхитунти. ан̃джанӣ пхалати [нипатати (ка.)]. бхагавато етаматтхам̣ а̄рочесум̣. ануджа̄на̄ми, бхиккхаве, суттакена сиббетунти.

тена кхо пана самайена бхиккхӯ ан̇гулийа̄ ан̃джанти, аккхӣни дуккха̄ни хонти. бхагавато етаматтхам̣ а̄рочесум̣. ануджа̄на̄ми, бхиккхаве, ан̃джанисала̄канти.

тена кхо пана самайена чхаббаггийа̄ бхиккхӯ учча̄вача̄ ан̃джанисала̄ка̄йо дха̄ренти – сован̣н̣амайам̣ рӯпийамайам̣. манусса̄ уджджха̄йанти кхиййанти випа̄ченти, ‘‘сеййатха̄пи гихӣ ка̄мабхогино’’ти. бхагавато етаматтхам̣ а̄рочесум̣. на, бхиккхаве, учча̄вача̄ ан̃джанисала̄ка̄ дха̄ретабба̄. йо дха̄реййа, а̄патти дуккат̣асса. ануджа̄на̄ми, бхиккхаве, ат̣т̣химайам̣…пе… сан̇кхана̄бхимайанти.

тена кхо пана самайена ан̃джанисала̄ка̄ бхӯмийам̣ патита̄ пхаруса̄ хоти. бхагавато етаматтхам̣ а̄рочесум̣. ануджа̄на̄ми, бхиккхаве, сала̄кат̣ха̄нийанти [сала̄кодха̄нийанти (сӣ. сйа̄.)].

тена кхо пана самайена бхиккхӯ ан̃джанимпи ан̃джанисала̄кампи хаттхена парихаранти. бхагавато етаматтхам̣ а̄рочесум̣. ануджа̄на̄ми, бхиккхаве, ан̃джаниттхавиканти. ам̣сабаддхако на хоти. бхагавато етаматтхам̣ а̄рочесум̣. ануджа̄на̄ми, бхиккхаве, ам̣сабаддхакам̣ бандханасуттаканти.

266. тена кхо пана самайена а̄йасмато пилиндаваччхасса сӣса̄бхита̄по хоти. бхагавато етаматтхам̣ а̄рочесум̣. ануджа̄на̄ми, бхиккхаве, муддхани телаканти. наккхаманийо хоти. бхагавато етаматтхам̣ а̄рочесум̣. ануджа̄на̄ми, бхиккхаве, наттхукамманти. наттху галати. бхагавато етаматтхам̣ а̄рочесум̣. ануджа̄на̄ми, бхиккхаве, наттхукаран̣инти.

тена кхо пана самайена чхаббаггийа̄ бхиккхӯ учча̄вача̄ наттхукаран̣ийо дха̄ренти – сован̣н̣амайам̣ рӯпийамайам̣. манусса̄ уджджха̄йанти кхиййанти випа̄ченти, ‘‘сеййатха̄пи гихӣ ка̄мабхогино’’ти. бхагавато етаматтхам̣ а̄рочесум̣. на, бхиккхаве, учча̄вача̄ наттхукаран̣ӣ дха̄ретабба̄. йо дха̄реййа, а̄патти дуккат̣асса. ануджа̄на̄ми, бхиккхаве, ат̣т̣химайам̣…пе… сан̇кхана̄бхимайанти. наттхум̣ висамам̣ а̄син̃чанти [наттху висамам̣ а̄син̃чийати (сӣ. сйа̄.)]. бхагавато етаматтхам̣ а̄рочесум̣. ануджа̄на̄ми, бхиккхаве, йамаканаттхукаран̣инти. наккхаманийо хоти. бхагавато етаматтхам̣ а̄рочесум̣. ануджа̄на̄ми, бхиккхаве, дхӯмам̣ па̄тунти. тан̃н̃ева ват̣т̣им̣ а̄лимпетва̄ пиванти, кан̣т̣хо дахати. бхагавато етаматтхам̣ а̄рочесум̣. ануджа̄на̄ми, бхиккхаве, дхӯманеттанти.

тена кхо пана самайена чхаббаггийа̄ бхиккхӯ учча̄вача̄ни дхӯманетта̄ни дха̄ренти – сован̣н̣амайам̣ рӯпийамайам̣. манусса̄ уджджха̄йанти кхиййанти випа̄ченти – сеййатха̄пи гихӣ ка̄мабхогиноти. бхагавато етаматтхам̣ а̄рочесум̣. на, бхиккхаве, учча̄вача̄ни дхӯманетта̄ни дха̄ретабба̄ни. йо дха̄реййа, а̄патти дуккат̣асса. ануджа̄на̄ми, бхиккхаве, ат̣т̣химайам̣…пе… сан̇кхана̄бхимайанти.

тена кхо пана самайена дхӯманетта̄ни апа̄рута̄ни хонти, па̄н̣ака̄ пависанти. бхагавато етаматтхам̣ а̄рочесум̣. ануджа̄на̄ми, бхиккхаве, апидха̄нанти.

тена кхо пана самайена бхиккхӯ дхӯманетта̄ни хаттхена парихаранти. бхагавато етаматтхам̣ а̄рочесум̣. ануджа̄на̄ми, бхиккхаве, дхӯманеттатхавиканти. екато гхам̣сийанти. бхагавато етаматтхам̣ а̄рочесум̣. ануджа̄на̄ми, бхиккхаве, йамакатхавиканти. ам̣сабаддхако на хоти. бхагавато етаматтхам̣ а̄рочесум̣. ануджа̄на̄ми, бхиккхаве, ам̣сабаддхакам̣ бандханасуттаканти.

267. тена кхо пана самайена а̄йасмато пилиндаваччхасса ва̄та̄ба̄дхо хоти. веджджа̄ евама̄хам̣су – ‘‘телам̣ пачитабба’’нти. бхагавато етаматтхам̣ а̄рочесум̣. ануджа̄на̄ми, бхиккхаве, телапа̄канти. тасмим̣ кхо пана телапа̄ке маджджам̣ паккхипитаббам̣ хоти. бхагавато етаматтхам̣ а̄рочесум̣. ануджа̄на̄ми, бхиккхаве, телапа̄ке маджджам̣ паккхипитунти.

тена кхо пана самайена чхаббаггийа̄ бхиккхӯ атипаккхиттамаджджа̄ни [атикхиттамаджджа̄ни (ка.)] тела̄ни пачанти, та̄ни пивитва̄ маджджанти. бхагавато етаматтхам̣ а̄рочесум̣. на, бхиккхаве, атипаккхиттамаджджам̣ телам̣ па̄таббам̣. йо пивеййа, йатха̄дхаммо ка̄ретаббо. ануджа̄на̄ми, бхиккхаве, йасмим̣ телапа̄ке маджджасса на ван̣н̣о на гандхо на расо пан̃н̃а̄йати, еварӯпам̣ маджджапаккхиттам̣ телам̣ па̄тунти.

тена кхо пана самайена бхиккхӯнам̣ бахум̣ атипаккхиттамаджджам̣ телам̣ паккам̣ хоти. атха кхо бхиккхӯнам̣ етадахоси – ‘‘катхам̣ ну кхо атипаккхиттамадждже теле пат̣ипаджджитабба’’нти? бхагавато етаматтхам̣ а̄рочесум̣. ануджа̄на̄ми, бхиккхаве, аббхан̃джанам̣ адхит̣т̣ха̄тунти.

тена кхо пана самайена а̄йасмато пилиндаваччхасса бахутарам̣ телам̣ паккам̣ хоти, телабха̄джанам̣ на виджджати. бхагавато етаматтхам̣ а̄рочесум̣. ануджа̄на̄ми, бхиккхаве, тӣн̣и тумба̄ни – лохатумбам̣, кат̣т̣хатумбам̣, пхалатумбанти.

тена кхо пана самайена а̄йасмато пилиндаваччхасса ан̇гава̄то хоти. бхагавато етаматтхам̣ а̄рочесум̣. ануджа̄на̄ми, бхиккхаве, седакамманти. наккхаманийо хоти. бхагавато етаматтхам̣ а̄рочесум̣. ануджа̄на̄ми, бхиккхаве, самбха̄раседанти. наккхаманийо хоти. бхагавато етаматтхам̣ а̄рочесум̣. ануджа̄на̄ми, бхиккхаве, маха̄седанти. наккхаманийо хоти. бхагавато етаматтхам̣ а̄рочесум̣. ануджа̄на̄ми, бхиккхаве, бхан̇годаканти. наккхаманийо хоти. бхагавато етаматтхам̣ а̄рочесум̣. ануджа̄на̄ми, бхиккхаве, удакакот̣т̣хаканти.

тена кхо пана самайена а̄йасмато пилиндаваччхасса паббава̄то хоти. бхагавато етаматтхам̣ а̄рочесум̣. ануджа̄на̄ми, бхиккхаве, лохитам̣ мочетунти. наккхаманийо хоти. бхагавато етаматтхам̣ а̄рочесум̣. ануджа̄на̄ми, бхиккхаве, лохитам̣ мочетва̄ виса̄н̣ена га̄хетунти [гахетунти (сӣ. сйа̄.)].

тена кхо пана самайена а̄йасмато пилиндаваччхасса па̄да̄ пхалита̄ [пха̄лита̄ (ка.)] хонти. бхагавато етаматтхам̣ а̄рочесум̣. ануджа̄на̄ми, бхиккхаве, па̄даббхан̃джананти. наккхаманийо хоти. бхагавато етаматтхам̣ а̄рочесум̣. ануджа̄на̄ми, бхиккхаве, паджджам̣ абхисан̇кхаритунти.

тена кхо пана самайена ан̃н̃атарасса бхиккхуно ган̣д̣а̄ба̄дхо хоти. бхагавато етаматтхам̣ а̄рочесум̣. ануджа̄на̄ми, бхиккхаве, саттхакамманти. каса̄водакена аттхо хоти. бхагавато етаматтхам̣ а̄рочесум̣. ануджа̄на̄ми, бхиккхаве, каса̄водаканти. тилакаккена аттхо хоти. бхагавато етаматтхам̣ а̄рочесум̣. ануджа̄на̄ми, бхиккхаве, тилакакканти. кабал̣ика̄йа аттхо хоти. бхагавато етаматтхам̣ а̄рочесум̣. ануджа̄на̄ми, бхиккхаве, кабал̣иканти. ван̣абандханачол̣ена аттхо хоти. бхагавато етаматтхам̣ а̄рочесум̣. ануджа̄на̄ми, бхиккхаве, ван̣абандханачол̣анти. ван̣о кан̣д̣увати. бхагавато етаматтхам̣ а̄рочесум̣. ануджа̄на̄ми, бхиккхаве, са̄сапакут̣т̣ена [са̄сапакуд̣д̣ена (сӣ. сйа̄.)] пхоситунти. ван̣о килиджджиттха. бхагавато етаматтхам̣ а̄рочесум̣. ануджа̄на̄ми, бхиккхаве, дхӯмам̣ ка̄тунти. вад̣д̣хамам̣сам̣ вут̣т̣ха̄ти. бхагавато етаматтхам̣ а̄рочесум̣. ануджа̄на̄ми, бхиккхаве, лон̣асаккхарика̄йа чхиндитунти. ван̣о на рухати. бхагавато етаматтхам̣ а̄рочесум̣. ануджа̄на̄ми, бхиккхаве, ван̣ателанти. телам̣ галати. бхагавато етаматтхам̣ а̄рочесум̣. ануджа̄на̄ми, бхиккхаве, вика̄сикам̣ саббам̣ ван̣апат̣икамманти.

268. тена кхо пана самайена ан̃н̃атаро бхиккху ахина̄ дат̣т̣хо хоти. бхагавато етаматтхам̣ а̄рочесум̣. ануджа̄на̄ми, бхиккхаве, чатта̄ри маха̄викат̣а̄ни да̄тум̣ – гӯтхам̣, муттам̣, чха̄рикам̣, маттиканти. атха кхо бхиккхӯнам̣ етадахоси – ‘‘аппат̣иггахита̄ни ну кхо уда̄ху пат̣иггахетабба̄нӣ’’ти. бхагавато етаматтхам̣ а̄рочесум̣. ануджа̄на̄ми, бхиккхаве, сати каппийака̄раке пат̣иггаха̄петум̣, асати каппийака̄раке са̄мам̣ гахетва̄ парибхун̃джитунти.

тена кхо пана самайена ан̃н̃атарена бхиккхуна̄ висам̣ пӣтам̣ хоти. бхагавато етаматтхам̣ а̄рочесум̣. ануджа̄на̄ми бхиккхаве гӯтхам̣ па̄йетунти. атха кхо бхиккхӯнам̣ етадахоси – ‘‘аппат̣иггахитам̣ ну кхо уда̄ху пат̣иггахетаббо’’ти? бхагавато етаматтхам̣ а̄рочесум̣. ануджа̄на̄ми, бхиккхаве, йам̣ каронто пат̣игган̣ха̄ти, свева пат̣иггахо като, на пуна [като пана (?)] пат̣иггахетабботи.

269. тена кхо пана самайена ан̃н̃атарасса бхиккхуно гхарадиннака̄ба̄дхо хоти. бхагавато етаматтхам̣ а̄рочесум̣. ануджа̄на̄ми, бхиккхаве, сӣта̄лол̣им̣ па̄йетунти.

тена кхо пана самайена ан̃н̃атаро бхиккху дут̣т̣хагахан̣ико хоти. бхагавато етаматтхам̣ а̄рочесум̣. ануджа̄на̄ми, бхиккхаве, а̄мисакха̄рам̣ па̄йетунти.

тена кхо пана самайена ан̃н̃атарасса бхиккхуно пан̣д̣урога̄ба̄дхо хоти. бхагавато етаматтхам̣ а̄рочесум̣. ануджа̄на̄ми, бхиккхаве, муттахарӣтакам̣ па̄йетунти.

тена кхо пана самайена ан̃н̃атарасса бхиккхуно чхавидоса̄ба̄дхо хоти. бхагавато етаматтхам̣ а̄рочесум̣. ануджа̄на̄ми, бхиккхаве, гандха̄лепам̣ ка̄тунти.

тена кхо пана самайена ан̃н̃атаро бхиккху абхисаннака̄йо хоти. бхагавато етаматтхам̣ а̄рочесум̣. ануджа̄на̄ми, бхиккхаве, виречанам̣ па̄тунти. аччхакан̃джийа̄ аттхо хоти. бхагавато етаматтхам̣ а̄рочесум̣. ануджа̄на̄ми, бхиккхаве, аччхакан̃джинти. акат̣айӯсена аттхо хоти. бхагавато етаматтхам̣ а̄рочесум̣. ануджа̄на̄ми, бхиккхаве, акат̣айӯсанти. кат̣а̄кат̣ена аттхо хоти. бхагавато етаматтхам̣ а̄рочесум̣. ануджа̄на̄ми, бхиккхаве, кат̣а̄кат̣анти. пат̣иччха̄данӣйена аттхо хоти. бхагавато етаматтхам̣ а̄рочесум̣. ануджа̄на̄ми, бхиккхаве, пат̣иччха̄данӣйанти.

мӯла̄дибхесаджджакатха̄ нит̣т̣хита̄.