153. йа̄на̄дипат̣иккхепо

253. тена кхо пана самайена чхаббаггийа̄ бхиккхӯ йа̄нена йа̄йанти, иттхийуттенапи пурисантарена, пурисайуттенапи иттхантарена. манусса̄ уджджха̄йанти кхиййанти випа̄ченти – ‘‘сеййатха̄пи ган̇га̄махийа̄йа̄’’ти. бхагавато етаматтхам̣ а̄рочесум̣. на, бхиккхаве, йа̄нена йа̄йитаббам̣. йо йа̄йеййа, а̄патти дуккат̣асса̄ти. тена кхо пана самайена ан̃н̃атаро бхиккху косалесу джанападе са̄ваттхим̣ гаччханто бхагавантам̣ дассана̄йа антара̄магге гила̄но хоти. атха кхо со бхиккху магга̄ оккамма ан̃н̃атарасмим̣ руккхамӯле нисӣди. манусса̄ там̣ бхиккхум̣ дисва̄ етадавочум̣ – ‘‘кахам̣, бханте, аййо гамиссатӣ’’ти? ‘‘са̄ваттхим̣ кхо ахам̣, а̄вусо, гамисса̄ми бхагавантам̣ дассана̄йа̄’’ти. ‘‘ехи, бханте, гамисса̄ма̄’’ти. ‘‘на̄хам̣, а̄вусо, саккоми, гила̄номхӣ’’ти. ‘‘ехи, бханте, йа̄нам̣ абхируха̄’’ти. ‘‘алам̣, а̄вусо, пат̣иккхиттам̣ бхагавата̄ йа̄на’’нти куккучча̄йанто йа̄нам̣ на̄бхирухи. атха кхо со бхиккху са̄ваттхим̣ гантва̄ бхиккхӯнам̣ етаматтхам̣ а̄рочеси. бхиккхӯ бхагавато етаматтхам̣ а̄рочесум̣. ануджа̄на̄ми, бхиккхаве, гила̄насса йа̄нанти. атха кхо бхиккхӯнам̣ етадахоси – ‘‘иттхийуттам̣ ну кхо пурисайуттам̣ ну кхо’’ти? бхагавато етаматтхам̣ а̄рочесум̣. ануджа̄на̄ми, бхиккхаве, пурисайуттам̣ хаттхават̣т̣аканти.

тена кхо пана самайена ан̃н̃атарасса бхиккхуно йа̄нуггха̄тена ба̄л̣хатарам̣ апха̄су ахоси. бхагавато етаматтхам̣ а̄рочесум̣. ануджа̄на̄ми, бхиккхаве, сивикам̣ па̄т̣ан̇кинти.

йа̄на̄дипат̣иккхепо нит̣т̣хито.