154. учча̄сайанамаха̄сайанапат̣иккхепо

254. тена кхо пана самайена чхаббаггийа̄ бхиккхӯ учча̄сайанамаха̄сайана̄ни дха̄ренти, сеййатхидам̣ – а̄сандим̣, паллан̇кам̣, гонакам̣, читтакам̣, пат̣икам̣, пат̣аликам̣, тӯликам̣, викатикам̣, уддхаломим̣ [ундаломим̣ (ка.), уддаломим̣ (ка.)], еканталомим̣, кат̣т̣иссам̣, косеййам̣, куттакам̣, хаттхаттхарам̣, ассаттхарам̣, ратхаттхарам̣, аджинапавен̣им̣, кадалимигапаварапаччаттхаран̣ам̣, сауттараччхадам̣, убхатолохитакӯпадха̄нанти. манусса̄ виха̄рача̄рикам̣ а̄хин̣д̣анта̄ пасситва̄ уджджха̄йанти кхиййанти випа̄ченти – ‘‘сеййатха̄пи гихӣ ка̄мабхогино’’ти. бхагавато етаматтхам̣ а̄рочесум̣. на, бхиккхаве, учча̄сайанамаха̄сайана̄ни дха̄ретабба̄ни, сеййатхидам̣ – а̄санди, паллан̇ко, гонако, читтако, пат̣ика̄, пат̣алика̄, тӯлика̄, викатика̄, уддхаломи, еканталоми, кат̣т̣иссам̣, косеййам̣, куттакам̣, хаттхаттхарам̣, ассаттхарам̣, ратхаттхарам̣, аджинапавен̣и, кадалимигапаварапаччаттхаран̣ам̣, сауттараччхадам̣, убхатолохитакӯпадха̄нам̣. йо дха̄реййа, а̄патти дуккат̣асса̄ти.

учча̄сайанамаха̄сайанапат̣иккхепо нит̣т̣хито.