91. сан̇гхупосатха̄диппабхедам̣

168. тена кхо пана самайена ан̃н̃атарасмим̣ а̄ва̄се тадахупосатхе чатта̄ро бхиккхӯ вихаранти. атха кхо тесам̣ бхиккхӯнам̣ етадахоси – ‘‘бхагавата̄ пан̃н̃аттам̣ ‘упосатхо ка̄таббо’ти, майан̃чамха̄ чатта̄ро джана̄, катхам̣ ну кхо амхехи упосатхо ка̄таббо’’ти? бхагавато етаматтхам̣ а̄рочесум̣. ануджа̄на̄ми, бхиккхаве, чатуннам̣ па̄тимоккхам̣ уддиситунти.

тена кхо пана самайена ан̃н̃атарасмим̣ а̄ва̄се тадахупосатхе тайо бхиккхӯ вихаранти. атха кхо тесам̣ бхиккхӯнам̣ етадахоси – ‘‘бхагавата̄ анун̃н̃а̄там̣ чатуннам̣ па̄тимоккхам̣ уддиситум̣, майан̃чамха̄ тайо джана̄, катхам̣ ну кхо амхехи упосатхо ка̄таббо’’ти? бхагавато етаматтхам̣ а̄рочесум̣. ануджа̄на̄ми, бхиккхаве, тин̣н̣ам̣ па̄рисуддхиупосатхам̣ ка̄тум̣. еван̃ча пана, бхиккхаве, ка̄таббо. бйаттена бхиккхуна̄ пат̣ибалена те бхиккхӯ н̃а̄петабба̄ –

‘‘сун̣анту ме а̄йасманта̄. аджджупосатхо паннарасо. йада̄йасманта̄нам̣ паттакаллам̣, майам̣ ан̃н̃аман̃н̃ам̣ па̄рисуддхиупосатхам̣ кареййа̄ма̄’’ти.

тхерена бхиккхуна̄ екам̣сам̣ уттара̄сан̇гам̣ каритва̄ уккут̣икам̣ нисӣдитва̄ ан̃джалим̣ паггахетва̄ те бхиккхӯ евамассу вачанӣйа̄ – ‘‘парисуддхо ахам̣, а̄вусо; парисуддхоти мам̣ дха̄ретха. парисуддхо ахам̣, а̄вусо; парисуддхоти мам̣ дха̄ретха. парисуддхо ахам̣, а̄вусо; парисуддхоти мам̣ дха̄ретха̄’’ти.

навакена бхиккхуна̄ екам̣сам̣ уттара̄сан̇гам̣ каритва̄ уккут̣икам̣ нисӣдитва̄ ан̃джалим̣ паггахетва̄ те бхиккхӯ евамассу вачанӣйа̄ – ‘‘парисуддхо ахам̣, бханте; парисуддхоти мам̣ дха̄ретха. парисуддхо ахам̣, бханте; парисуддхоти мам̣ дха̄ретха. парисуддхо ахам̣, бханте; парисуддхоти мам̣ дха̄ретха̄’’ти.

тена кхо пана самайена ан̃н̃атарасмим̣ а̄ва̄се тадахупосатхе две бхиккхӯ вихаранти. атха кхо тесам̣ бхиккхӯнам̣ етадахоси – ‘‘бхагавата̄ анун̃н̃а̄там̣ чатуннам̣ па̄тимоккхам̣ уддиситум̣, тин̣н̣аннам̣ па̄рисуддхиупосатхам̣ ка̄тум̣. майан̃чамха̄ две джана̄. катхам̣ ну кхо амхехи упосатхо ка̄таббо’’ти? бхагавато етаматтхам̣ а̄рочесум̣. ануджа̄на̄ми, бхиккхаве, двиннам̣ па̄рисуддхиупосатхам̣ ка̄тум̣. еван̃ча пана, бхиккхаве, ка̄таббо. тхерена бхиккхуна̄ екам̣сам̣ уттара̄сан̇гам̣ каритва̄ уккут̣икам̣ нисӣдитва̄ ан̃джалим̣ паггахетва̄ наво бхиккху евамасса вачанӣйо – ‘‘парисуддхо ахам̣, а̄вусо; парисуддхоти мам̣ дха̄рехи. парисуддхо ахам̣, а̄вусо; парисуддхоти мам̣ дха̄рехи. парисуддхо ахам̣, а̄вусо; парисуддхоти мам̣ дха̄рехӣ’’ти.

навакена бхиккхуна̄ екам̣сам̣ уттара̄сан̇гам̣ каритва̄ уккут̣икам̣ нисӣдитва̄ ан̃джалим̣ паггахетва̄ тхеро бхиккху евамасса вачанӣйо – ‘‘парисуддхо ахам̣, бханте; парисуддхоти мам̣ дха̄ретха. парисуддхо ахам̣, бханте; парисуддхоти мам̣ дха̄ретха. парисуддхо ахам̣, бханте; парисуддхоти мам̣ дха̄ретха̄’’ти.

тена кхо пана самайена ан̃н̃атарасмим̣ а̄ва̄се тадахупосатхе еко бхиккху вихарати. атха кхо тасса бхиккхуно етадахоси – ‘‘бхагавата̄ анун̃н̃а̄там̣ чатуннам̣ па̄тимоккхам̣ уддиситум̣, тин̣н̣аннам̣ па̄рисуддхиупосатхам̣ ка̄тум̣, двиннам̣ па̄рисуддхиупосатхам̣ ка̄тум̣. ахан̃чамхи екако. катхам̣ ну кхо майа̄ упосатхо ка̄таббо’’ти? бхагавато етаматтхам̣ а̄рочесум̣. идха пана, бхиккхаве, ан̃н̃атарасмим̣ а̄ва̄се тадахупосатхе еко бхиккху вихарати. тена, бхиккхаве, бхиккхуна̄ йаттха бхиккхӯ пат̣иккаманти упат̣т̣ха̄наса̄ла̄йа ва̄, ман̣д̣апе ва̄, руккхамӯле ва̄, со десо саммаджджитва̄ па̄нӣйам̣ парибходжанӣйам̣ упат̣т̣ха̄петва̄ а̄санам̣ пан̃н̃апетва̄ падӣпам̣ катва̄ нисӣдитаббам̣. саче ан̃н̃е бхиккхӯ а̄гаччханти, техи саддхим̣ упосатхо ка̄таббо. но че а̄гаччханти, аджджа ме упосатхоти адхит̣т̣ха̄таббо. но че адхит̣т̣хахеййа, а̄патти дуккат̣асса.

татра, бхиккхаве, йаттха чатта̄ро бхиккхӯ вихаранти, на екасса па̄рисуддхим̣ а̄харитва̄ тӣхи па̄тимоккхам̣ уддиситаббам̣. уддисеййум̣ че, а̄патти дуккат̣асса. татра, бхиккхаве, йаттха тайо бхиккхӯ вихаранти, на екасса па̄рисуддхим̣ а̄харитва̄ двӣхи па̄рисуддхиупосатхо ка̄таббо. кареййум̣ че, а̄патти дуккат̣асса. татра, бхиккхаве, йаттха две бхиккхӯ вихаранти, на екасса па̄рисуддхим̣ а̄харитва̄ екена адхит̣т̣ха̄таббо. адхит̣т̣хахеййа че, а̄патти дуккат̣асса̄ти.