92. а̄паттипат̣икаммавидхи

169. тена кхо пана самайена ан̃н̃атаро бхиккху тадахупосатхе а̄паттим̣ а̄панно хоти. атха кхо тасса бхиккхуно етадахоси – ‘‘бхагавата̄ пан̃н̃аттам̣ ‘на са̄паттикена упосатхо ка̄таббо’ти. ахан̃чамхи а̄паттим̣ а̄панно. катхам̣ ну кхо майа̄ пат̣ипаджджитабба’’нти? бхагавато етаматтхам̣ а̄рочесум̣. идха пана, бхиккхаве, бхиккху тадахупосатхе а̄паттим̣ а̄панно хоти. тена, бхиккхаве, бхиккхуна̄ екам̣ бхиккхум̣ упасан̇камитва̄ екам̣сам̣ уттара̄сан̇гам̣ каритва̄ уккут̣икам̣ нисӣдитва̄ ан̃джалим̣ паггахетва̄ евамасса вачанӣйо – ‘‘ахам̣, а̄вусо, иттханна̄мам̣ а̄паттим̣ а̄панно, там̣ пат̣идесемӣ’’ти. тена ваттаббо – ‘‘пассасӣ’’ти. ‘‘а̄ма пасса̄мӣ’’ти. ‘‘а̄йатим̣ сам̣вареййа̄сӣ’’ти.

идха пана, бхиккхаве, бхиккху тадахупосатхе а̄паттийа̄ вематико хоти. тена, бхиккхаве, бхиккхуна̄ екам̣ бхиккхум̣ упасан̇камитва̄ екам̣сам̣ уттара̄сан̇гам̣ каритва̄ уккут̣икам̣ нисӣдитва̄ ан̃джалим̣ паггахетва̄ евамасса вачанӣйо – ‘‘ахам̣, а̄вусо, иттханна̄ма̄йа а̄паттийа̄ вематико; йада̄ ниббематико бхависса̄ми, тада̄ там̣ а̄паттим̣ пат̣икарисса̄мӣ’’ти ватва̄ упосатхо ка̄таббо, па̄тимоккхам̣ сотаббам̣, на твева таппаччайа̄ упосатхасса антара̄йо ка̄табботи.

тена кхо пана самайена чхаббаггийа̄ бхиккхӯ сабха̄гам̣ а̄паттим̣ десенти. бхагавато етаматтхам̣ а̄рочесум̣. на, бхиккхаве, сабха̄га̄ а̄патти десетабба̄. йо десеййа, а̄патти дуккат̣асса̄ти.

тена кхо пана самайена чхаббаггийа̄ бхиккхӯ сабха̄гам̣ а̄паттим̣ пат̣игган̣ханти. бхагавато етаматтхам̣ а̄рочесум̣. на, бхиккхаве, сабха̄га̄ а̄патти пат̣иггахетабба̄. йо пат̣игган̣хеййа, а̄патти дуккат̣асса̄ти.