75. сӣма̄самӯханана

‘‘сӣмам̣, бхиккхаве, самманнантена пат̣хамам̣ сама̄насам̣ва̄сасӣма̄ [сама̄насам̣ва̄са̄ сӣма̄ (сйа̄.)] самманнитабба̄, паччха̄ тичӣварена авиппава̄со самманнитаббо. сӣмам̣, бхиккхаве, самӯханантена пат̣хамам̣ тичӣварена авиппава̄со самӯхантаббо, паччха̄ сама̄насам̣ва̄сасӣма̄ самӯхантабба̄. еван̃ча пана, бхиккхаве, тичӣварена авиппава̄со самӯхантаббо. бйаттена бхиккхуна̄ пат̣ибалена сан̇гхо н̃а̄петаббо –

145. ‘‘сун̣а̄ту ме, бханте, сан̇гхо. йо со сан̇гхена тичӣварена авиппава̄со саммато, йади сан̇гхасса паттакаллам̣, сан̇гхо там̣ тичӣварена авиппава̄сам̣ самӯханеййа. еса̄ н̃атти.

‘‘сун̣а̄ту ме, бханте, сан̇гхо. йо со сан̇гхена тичӣварена авиппава̄со саммато, сан̇гхо там̣ тичӣварена авиппава̄сам̣ самӯханати. йасса̄йасмато кхамати етасса тичӣварена авиппава̄сасса самуггха̄то, со тун̣хасса; йасса наккхамати, со бха̄сеййа. самӯхато со сан̇гхена тичӣварена авиппава̄со. кхамати сан̇гхасса, тасма̄ тун̣хӣ, еваметам̣ дха̄райа̄мӣ’’ти.

еван̃ча пана, бхиккхаве, сӣма̄ [сама̄насам̣ва̄са̄ сӣма̄ (сйа̄.)]. бйаттена бхиккхуна̄ пат̣ибалена сан̇гхо н̃а̄петаббо –

146. ‘‘сун̣а̄ту ме, бханте, сан̇гхо. йа̄ са̄ сан̇гхена сӣма̄ саммата̄ сама̄насам̣ва̄са̄ екупосатха̄, йади сан̇гхасса паттакаллам̣, сан̇гхо там̣ сӣмам̣ самӯханеййа сама̄насам̣ва̄сам̣ екупосатхам̣. еса̄ н̃атти.

‘‘сун̣а̄ту ме, бханте, сан̇гхо. йа̄ са̄ сан̇гхена сӣма̄ саммата̄ сама̄насам̣ва̄са̄ екупосатха̄, сан̇гхо там̣ сӣмам̣ самӯханати сама̄насам̣ва̄сам̣ екупосатхам̣. йасса̄йасмато кхамати етисса̄ сӣма̄йа сама̄насам̣ва̄са̄йа екупосатха̄йа самуггха̄то, со тун̣хасса; йасса наккхамати, со бха̄сеййа. самӯхата̄ са̄ сӣма̄ сан̇гхена сама̄насам̣ва̄са̄ екупосатха̄. кхамати сан̇гхасса, тасма̄ тун̣хӣ, еваметам̣ дха̄райа̄мӣ’’ти.