76. га̄масӣма̄ди

147. асаммата̄йа, бхиккхаве, сӣма̄йа ат̣т̣хапита̄йа, йам̣ га̄мам̣ ва̄ нигамам̣ ва̄ упанисса̄йа вихарати, йа̄ тасса ва̄ га̄масса га̄масӣма̄, нигамасса ва̄ нигамасӣма̄, айам̣ таттха сама̄насам̣ва̄са̄ екупосатха̄. ага̄маке че, бхиккхаве, аран̃н̃е саманта̄ саттаббхантара̄, айам̣ таттха сама̄насам̣ва̄са̄ екупосатха̄. сабба̄, бхиккхаве, надӣ асӣма̄; саббо самуддо асӣмо; саббо джа̄тассаро асӣмо. надийа̄ ва̄, бхиккхаве, самудде ва̄ джа̄тассаре ва̄ йам̣ маджджхимасса пурисасса саманта̄ удакуккхепа̄, айам̣ таттха сама̄насам̣ва̄са̄ екупосатха̄ти.

148. тена кхо пана самайена чхаббаггийа̄ бхиккхӯ сӣма̄йа сӣмам̣ самбхинданти. бхагавато етаматтхам̣ а̄рочесум̣. йесам̣, бхиккхаве, сӣма̄ пат̣хамам̣ саммата̄ тесам̣ там̣ каммам̣ дхаммикам̣ акуппам̣ т̣ха̄на̄рахам̣. йесам̣, бхиккхаве, сӣма̄ паччха̄ саммата̄ тесам̣ там̣ каммам̣ адхаммикам̣ куппам̣ ат̣т̣ха̄на̄рахам̣. на, бхиккхаве, сӣма̄йа сӣма̄ самбхиндитабба̄. йо самбхиндеййа, а̄патти дуккат̣асса̄ти.

тена кхо пана самайена чхаббаггийа̄ бхиккхӯ сӣма̄йа сӣмам̣ аджджхоттхаранти. бхагавато етаматтхам̣ а̄рочесум̣. йесам̣, бхиккхаве, сӣма̄ пат̣хамам̣ саммата̄ тесам̣ там̣ каммам̣ дхаммикам̣ акуппам̣ т̣ха̄на̄рахам̣. йесам̣, бхиккхаве, сӣма̄ паччха̄ саммата̄ тесам̣ там̣ каммам̣ адхаммикам̣ куппам̣ ат̣т̣ха̄на̄рахам̣. на, бхиккхаве, сӣма̄йа сӣма̄ аджджхоттхаритабба̄. йо аджджхоттхареййа, а̄патти дуккат̣асса̄ти. ануджа̄на̄ми, бхиккхаве, сӣмам̣ самманнантена сӣмантарикам̣ т̣хапетва̄ сӣмам̣ самманнитунти.