пан̃часаттхукатха̄

334. [а. ни. 5.100] ‘‘пан̃чиме, моггалла̄на, саттха̄ро санто сам̣виджджама̄на̄ локасмим̣. катаме пан̃ча? ‘‘идха, моггалла̄на, екаччо саттха̄ апарисуддхасӣло сама̄но ‘парисуддхасӣломхӣ’ти пат̣иджа̄на̄ти ‘парисуддхам̣ ме сӣлам̣ парийода̄там̣ асам̣килит̣т̣ха’нти. таменам̣ са̄вака̄ евам̣ джа̄нанти – ‘айам̣ кхо бхавам̣ саттха̄ апарисуддхасӣло сама̄но ‘парисуддхасӣломхӣ’ти пат̣иджа̄на̄ти ‘парисуддхам̣ ме сӣлам̣ парийода̄там̣ асам̣килит̣т̣ха’нти ча. майан̃чева кхо пана гихӣнам̣ а̄рочеййа̄ма, на̄ссасса мана̄пам̣. йам̣ кхо панасса амана̄пам̣, катхам̣ нам̣ майам̣ тена самуда̄чареййа̄ма? самманнати кхо пана чӣварапин̣д̣апа̄тасена̄санагила̄наппаччайабхесаджджапариккха̄рена – йам̣ тумо кариссати, тумова тена пан̃н̃а̄йиссатӣ’ти. еварӯпам̣ кхо, моггалла̄на, саттха̄рам̣ са̄вака̄ сӣлато раккханти; еварӯпо ча пана саттха̄ са̄вакехи сӣлато раккхам̣ пачча̄сӣсати [пачча̄сим̣сати (сӣ. сйа̄.)].

‘‘пуна чапарам̣, моггалла̄на, идхекаччо саттха̄ апарисуддха̄джӣво сама̄но ‘парисуддха̄джӣвомхӣ’ти пат̣иджа̄на̄ти ‘парисуддхо ме а̄джӣво парийода̄то асам̣килит̣т̣хо’ти ча. таменам̣ са̄вака̄ евам̣ джа̄нанти – ‘айам̣ кхо бхавам̣ саттха̄ апарисуддха̄джӣво сама̄но ‘парисуддха̄джӣвомхӣ’ти пат̣иджа̄на̄ти ‘парисуддхо ме а̄джӣво парийода̄то асам̣килит̣т̣хо’ти ча. майан̃чева кхо пана гихӣнам̣ а̄рочеййа̄ма, на̄ссасса мана̄пам̣. йам̣ кхо панасса амана̄пам̣, катхам̣ на майам̣ тена самуда̄чареййа̄ма? самманнати кхо пана чӣварапин̣д̣апа̄тасена̄санагила̄наппаччайабхесаджджапариккха̄рена – йам̣ тумо кариссати, тумова тена пан̃н̃а̄йиссатӣ’ти. еварӯпам̣ кхо, моггалла̄на, саттха̄рам̣ са̄вака̄ а̄джӣвато раккханти; еварӯпо ча пана саттха̄ са̄вакехи а̄джӣвато раккхам̣ пачча̄сӣсати.

‘‘пуна чапарам̣, моггалла̄на, идхекаччо саттха̄ апарисуддхадхаммадесано сама̄но ‘парисуддхадхаммадесаномхӣ’ти пат̣иджа̄на̄ти ‘парисуддха̄ ме дхаммадесана̄ парийода̄та̄ асам̣килит̣т̣ха̄’ти ча. таменам̣ са̄вака̄ евам̣ джа̄нанти – ‘айам̣ кхо бхавам̣ саттха̄ апарисуддхадхаммадесано сама̄но ‘парисуддхадхаммадесаномхӣ’ти пат̣иджа̄на̄ти ‘парисуддха̄ ме дхаммадесана̄ парийода̄та̄ асам̣килит̣т̣ха̄’ти ча. майан̃чева кхо пана гихӣнам̣ а̄рочеййа̄ма, на̄ссасса мана̄пам̣. йам̣ кхо панасса амана̄пам̣, катхам̣ нам̣ майам̣ тена самуда̄чареййа̄ма? самманнати кхо пана чӣварапин̣д̣апа̄тасена̄санагила̄наппаччайабхесаджджапариккха̄рена – йам̣ тумо кариссати, тумова тена пан̃н̃а̄йиссатӣ’ти. еварӯпам̣ кхо, моггалла̄на, саттха̄рам̣ са̄вака̄ дхаммадесанато раккханти; еварӯпо ча пана саттха̄ са̄вакехи дхаммадесанато раккхам̣ пачча̄сӣсати.

‘‘пуна чапарам̣, моггалла̄на, идхекаччо саттха̄ апарисуддхавеййа̄каран̣о сама̄но ‘парисуддхавеййа̄каран̣омхӣ’ти пат̣иджа̄на̄ти ‘парисуддхам̣ ме веййа̄каран̣ам̣ парийода̄там̣ асам̣килит̣т̣ха’нти ча. таменам̣ са̄вака̄ евам̣ джа̄нанти – ‘айам̣ кхо бхавам̣ саттха̄ апарисуддхавеййа̄каран̣о сама̄но ‘парисуддхавеййа̄каран̣омхӣ’ти пат̣иджа̄на̄ти ‘парисуддхам̣ ме веййа̄каран̣ам̣ парийода̄там̣ асам̣килит̣т̣ха’нти ча. майан̃чева кхо пана гихӣнам̣ а̄рочеййа̄ма, на̄ссасса мана̄пам̣. йам̣ кхо панасса амана̄пам̣, катхам̣ нам̣ майам̣ тена самуда̄чареййа̄ма? самманнати кхо пана чӣварапин̣д̣апа̄тасена̄санагила̄наппаччайабхесаджджапариккха̄рена – йам̣ тумо кариссати, тумова тена пан̃н̃а̄йиссатӣ’ти. еварӯпам̣ кхо, моггалла̄на, саттха̄рам̣ са̄вака̄ веййа̄каран̣ато раккханти; еварӯпо ча пана саттха̄ са̄вакехи веййа̄каран̣ато раккхам̣ пачча̄сӣсати.

‘‘пуна чапарам̣, моггалла̄на, идхекаччо саттха̄ апарисуддхан̃а̄н̣адассано сама̄но ‘парисуддхан̃а̄н̣адассаномхӣ’ти пат̣иджа̄на̄ти ‘парисуддхам̣ ме н̃а̄н̣адассанам̣ парийода̄там̣ асам̣килит̣т̣ха’нти ча. таменам̣ са̄вака̄ евам̣ джа̄нанти – ‘айам̣ кхо бхавам̣ саттха̄ апарисуддхан̃а̄н̣адассано сама̄но ‘парисуддхан̃а̄н̣адассаномхӣ’ти пат̣иджа̄на̄ти ‘парисуддхам̣ ме н̃а̄н̣адассанам̣ парийода̄там̣ асам̣килит̣т̣ха’нти ча. майан̃чева кхо пана гихӣнам̣ а̄рочеййа̄ма, на̄ссасса мана̄пам̣. йам̣ кхо панасса амана̄пам̣, катхам̣ нам̣ майам̣ тена самуда̄чареййа̄ма? самманнати кхо пана чӣварапин̣д̣апа̄тасена̄санагила̄наппаччайабхесаджджапариккха̄рена – йам̣ тумо кариссати, тумова тена пан̃н̃а̄йиссатӣ’ти. еварӯпам̣ кхо, моггалла̄на, саттха̄рам̣ са̄вака̄ н̃а̄н̣адассанато раккханти; еварӯпо ча пана саттха̄ са̄вакехи н̃а̄н̣адассанато раккхам̣ пачча̄сӣсатӣти. име кхо, моггалла̄на, пан̃ча саттха̄ро санто сам̣виджджама̄на̄ локасмим̣.

‘‘ахам̣ кхо пана, моггалла̄на, парисуддхасӣло сама̄но ‘парисуддхасӣломхӣ’ти пат̣иджа̄на̄ми ‘парисуддхам̣ ме сӣлам̣ парийода̄там̣ асам̣килит̣т̣ха’нти ча. на ча мам̣ са̄вака̄ сӣлато раккханти; на ча̄хам̣ са̄вакехи сӣлато раккхам̣ пачча̄сӣса̄ми. парисуддха̄джӣво сама̄но…пе… парисуддхадхаммадесано сама̄но…пе… парисуддхавеййа̄каран̣о сама̄но…пе… парисуддхан̃а̄н̣адассано сама̄но ‘парисуддхан̃а̄н̣адассаномхӣ’ти пат̣иджа̄на̄ми ‘парисуддхам̣ ме н̃а̄н̣адассанам̣ парийода̄там̣ асам̣килит̣т̣ха’нти ча. на ча мам̣ са̄вака̄ н̃а̄н̣адассанато раккханти; на ча̄хам̣ са̄вакехи н̃а̄н̣адассанато раккхам̣ пачча̄сӣса̄мӣ’’ти.

335. атха кхо бхагава̄ косамбийам̣ йатха̄бхирантам̣ вихаритва̄ йена ра̄джагахам̣ тена ча̄рикам̣ пакка̄ми. анупуббена ча̄рикам̣ чарама̄но йена ра̄джагахам̣ тадавасари. татра судам̣ бхагава̄ ра̄джагахе вихарати вел̣уване каландаканива̄пе. атха кхо самбахула̄ бхиккхӯ йена бхагава̄ тенупасан̇камим̣су, упасан̇камитва̄ бхагавантам̣ абхива̄детва̄ екамантам̣ нисӣдим̣су. екамантам̣ нисинна̄ кхо те бхиккхӯ бхагавантам̣ етадавочум̣ – ‘‘девадаттасса, бханте, аджа̄тасатту кума̄ро пан̃чахи ратхасатехи са̄йам̣ па̄там̣ упат̣т̣ха̄нам̣ гаччхати; пан̃ча ча тха̄липа̄касата̄ни бхатта̄бхиха̄ро абхихарӣйатӣ’’ти. ‘‘ма̄, бхиккхаве, девадаттасса ла̄бхасакка̄расилокам̣ пихайиттха. йа̄вакӣван̃ча, бхиккхаве, девадаттасса аджа̄тасатту кума̄ро пан̃чахи ратхасатехи са̄йам̣ па̄там̣ упат̣т̣ха̄нам̣ гамиссати, пан̃ча ча тха̄липа̄касата̄ни бхатта̄бхиха̄ро абхихарӣйиссати, ха̄нийева, бхиккхаве, девадаттасса па̄т̣икан̇кха̄ кусалесу дхаммесу, но вуд̣д̣хи.

‘‘сеййатха̄пи, бхиккхаве, чан̣д̣асса куккурасса на̄са̄йа питтам̣ бхиндеййум̣, еван̃хи со, бхиккхаве, куккуро бхиййосоматта̄йа чан̣д̣атаро асса, евамева кхо, бхиккхаве, йа̄вакӣван̃ча девадаттасса аджа̄тасатту кума̄ро пан̃чахи ратхасатехи са̄йам̣ па̄там̣ упат̣т̣ха̄нам̣ гамиссати, пан̃ча ча тха̄липа̄касата̄ни бхатта̄бхиха̄ро абхихарӣйиссати, ха̄нийева, бхиккхаве, девадаттасса па̄т̣икан̇кха̄ кусалесу дхаммесу, но вуд̣д̣хи.

[сам̣. ни. 2.184; а. ни. 4.68] ‘‘аттавадха̄йа, бхиккхаве, девадаттасса ла̄бхасакка̄расилоко удапа̄ди, пара̄бхава̄йа девадаттасса ла̄бхасакка̄расилоко удапа̄ди.

‘‘сеййатха̄пи, бхиккхаве, кадалӣ аттавадха̄йа пхалам̣ дети, пара̄бхава̄йа пхалам̣ дети, евамева кхо, бхиккхаве, аттавадха̄йа девадаттасса ла̄бхасакка̄расилоко удапа̄ди, пара̄бхава̄йа девадаттасса ла̄бхасакка̄расилоко удапа̄ди.

‘‘сеййатха̄пи, бхиккхаве, вел̣у аттавадха̄йа пхалам̣ дети, пара̄бхава̄йа пхалам̣ дети, евамева кхо, бхиккхаве, аттавадха̄йа девадаттасса ла̄бхасакка̄расилоко удапа̄ди, пара̄бхава̄йа девадаттасса ла̄бхасакка̄расилоко удапа̄ди.

‘‘сеййатха̄пи, бхиккхаве, нал̣о аттавадха̄йа пхалам̣ дети, пара̄бхава̄йа пхалам̣ дети, евамева кхо, бхиккхаве, аттавадха̄йа девадаттасса ла̄бхасакка̄расилоко удапа̄ди, пара̄бхава̄йа девадаттасса ла̄бхасакка̄расилоко удапа̄ди.

‘‘сеййатха̄пи, бхиккхаве, ассатарӣ аттавадха̄йа габбхам̣ ган̣ха̄ти, пара̄бхава̄йа габбхам̣ ган̣ха̄ти, евамева кхо, бхиккхаве, аттавадха̄йа девадаттасса ла̄бхасакка̄расилоко удапа̄ди, пара̄бхава̄йа девадаттасса ла̄бхасакка̄расилоко удапа̄дӣ’’ти.

[сам̣. ни. 1.183, 1.2.184, нетти. 90] ‘‘пхалам̣ ве кадалим̣ ханти, пхалам̣ вел̣ум̣ пхалам̣ нал̣ам̣;

сакка̄ро ка̄пурисам̣ ханти, габбхо ассатарим̣ йатха̄’’ти.

пат̣хамабха̄н̣ава̄ро нит̣т̣хито.