девадаттаваттху

333. атха кхо бхагава̄ анупийа̄йам̣ йатха̄бхирантам̣ вихаритва̄ йена косамбӣ тена ча̄рикам̣ пакка̄ми. анупуббена ча̄рикам̣ чарама̄но йена косамбӣ тадавасари. татра судам̣ бхагава̄ косамбийам̣ вихарати гхосита̄ра̄ме. атха кхо девадаттасса рахогатасса пат̣исаллӣнасса евам̣ четасо паривитакко удапа̄ди – ‘‘кам̣ ну кхо ахам̣ паса̄деййам̣, йасмим̣ ме пасанне бахула̄бхасакка̄ро уппаджджеййа̄’’ти? атха кхо девадаттасса етадахоси – ‘‘айам̣ кхо аджа̄тасатту кума̄ро тарун̣о чева а̄йатим̣ бхаддо ча. йам̣нӯна̄хам̣ аджа̄тасаттум̣ кума̄рам̣ паса̄деййам̣. тасмим̣ ме пасанне бахула̄бхасакка̄ро уппаджджиссатӣ’’ти.

атха кхо девадатто сена̄санам̣ сам̣са̄метва̄ паттачӣварама̄да̄йа йена ра̄джагахам̣ тена пакка̄ми. анупуббена йена ра̄джагахам̣ тадавасари. атха кхо девадатто сакаван̣н̣ам̣ пат̣исам̣харитва̄ кума̄ракаван̣н̣ам̣ абхинимминитва̄ ахимекхалика̄йа аджа̄тасаттусса кума̄расса уччхан̇ге [уччан̇ке (сйа̄.)] па̄турахоси. атха кхо аджа̄тасатту кума̄ро бхӣто ахоси, уббигго уссан̇кӣ утрасто. атха кхо девадатто аджа̄тасаттум̣ кума̄рам̣ етадавоча – ‘‘бха̄йаси мам̣ твам̣ кума̄ра̄’’ти? ‘‘а̄ма, бха̄йа̄ми. коси тва’’нти? ‘‘ахам̣ девадатто’’ти. ‘‘саче кхо твам̣, бханте, аййо девадатто, ин̇гха сакенева ван̣н̣ена па̄тубхавассӯ’’ти. атха кхо девадатто кума̄ракаван̣н̣ам̣ пат̣исам̣харитва̄ сан̇гха̄т̣ипаттачӣварадхаро аджа̄тасаттусса кума̄расса пурато ат̣т̣ха̄си. атха кхо аджа̄тасатту кума̄ро девадаттасса имина̄ иддхипа̄т̣иха̄рийена абхиппасанно пан̃чахи ратхасатехи са̄йам̣ па̄там̣ упат̣т̣ха̄нам̣ гаччхати, пан̃ча ча тха̄липа̄касата̄ни бхатта̄бхиха̄ро абхихарӣйати. атха кхо девадаттасса ла̄бхасакка̄расилокена абхибхӯтасса парийа̄динначиттасса еварӯпам̣ иччха̄гатам̣ уппаджджи – ‘‘ахам̣ бхиккхусан̇гхам̣ парихарисса̄мӣ’’ти. саха читтуппа̄да̄ва девадатто тасса̄ иддхийа̄ париха̄йи.

[а. ни. 5.100] тена кхо пана самайена какудхо на̄ма кол̣ийапутто, а̄йасмато маха̄моггалла̄насса упат̣т̣ха̄ко, адхуна̄ ка̄лан̇като ан̃н̃атарам̣ маномайам̣ ка̄йам̣ упапанно. тасса еварӯпо аттабха̄ваппат̣ила̄бхо хоти – сеййатха̄пи на̄ма две ва̄ тӣн̣и ва̄ ма̄гадхака̄ни [ма̄гадхика̄ни (сйа̄.)] га̄маккхетта̄ни. со тена аттабха̄ваппат̣ила̄бхена нева атта̄нам̣ на парам̣ бйа̄ба̄дхети. атха кхо какудхо девапутто йена̄йасма̄ маха̄моггалла̄но тенупасан̇ками, упасан̇камитва̄ а̄йасмантам̣ маха̄моггалла̄нам̣ абхива̄детва̄ екамантам̣ ат̣т̣ха̄си. екамантам̣ т̣хито кхо какудхо девапутто а̄йасмантам̣ маха̄моггалла̄нам̣ етадавоча – ‘‘девадаттасса, бханте, ла̄бхасакка̄расилокена абхибхӯтасса парийа̄динначиттасса [парийа̄дин̣н̣ачиттасса (ка.)] еварӯпам̣ иччха̄гатам̣ уппаджджи – ‘ахам̣ бхиккхусан̇гхам̣ парихарисса̄мӣ’ти. саха читтуппа̄да̄ва бханте, девадатто тасса̄ иддхийа̄ парихӣно’’ти. идамавоча какудхо девапутто. идам̣ ватва̄ а̄йасмантам̣ маха̄моггалла̄нам̣ абхива̄детва̄ падаккхин̣ам̣ катва̄ таттхева антарадха̄йи.

атха кхо а̄йасма̄ маха̄моггалла̄но йена бхагава̄ тенупасан̇ками, упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисинно кхо а̄йасма̄ маха̄моггалла̄но бхагавантам̣ етадавоча – ‘‘какудхо на̄ма, бханте, кол̣ийапутто мама упат̣т̣ха̄ко адхуна̄ ка̄лан̇като ан̃н̃атарам̣ маномайам̣ ка̄йам̣ упапанно. тасса еварӯпо аттабха̄ваппат̣ила̄бхо – сеййатха̄пи на̄ма две ва̄ тӣн̣и ва̄ ма̄гадхака̄ни га̄маккхетта̄ни. со тена аттабха̄ваппат̣ила̄бхена нева атта̄нам̣ на парам̣ бйа̄ба̄дхети. атха кхо, бханте, какудхо девапутто йена̄хам̣ тенупасан̇ками, упасан̇камитва̄ мам̣ абхива̄детва̄ екамантам̣ ат̣т̣ха̄си. екамантам̣ т̣хито кхо, бханте, какудхо девапутто мам̣ етадавоча – ‘девадаттасса, бханте, ла̄бхасакка̄расилокена абхибхӯтасса парийа̄динначиттасса еварӯпам̣ иччха̄гатам̣ уппаджджи – ахам̣ бхиккхусан̇гхам̣ парихарисса̄мӣти. саха читтуппа̄да̄ва бханте, девадатто тасса̄ иддхийа̄ парихӣно’ти. идамавоча, бханте, какудхо девапутто. идам̣ ватва̄ мам̣ абхива̄детва̄ падаккхин̣ам̣ катва̄ таттхева антарадха̄йӣ’’ти.

‘‘ким̣ пана те, моггалла̄на, какудхо девапутто четаса̄ чето паричча видито? йам̣ кин̃чи какудхо девапутто бха̄сати саббам̣ там̣ татхева хоти, но ан̃н̃атха̄’’ти? ‘‘четаса̄ чето паричча видито ча ме, бханте, какудхо девапутто. йам̣ кин̃чи какудхо девапутто бха̄сати саббам̣ там̣ татхева хоти, но ан̃н̃атха̄’’ти. ‘‘раккхассетам̣, моггалла̄на, ва̄чам̣. раккхассетам̣, моггалла̄на, ва̄чам̣. ида̄ни со могхапурисо аттана̄ва атта̄нам̣ па̄тукариссати.