8. аччекачӣварасиккха̄падаван̣н̣ана̄

646. ат̣т̣хаме асаммохаттханти даса̄ха̄на̄гатападе асаммохаттхам̣. пат̣хамападасса̄ти даса̄ха̄на̄гатападасса. та̄ни диваса̄нӣти тесу дивасесу. уппаджджеййа̄ти сан̇гхато ва̄ ган̣ато ва̄ уджукам̣ аттанойева ва̄ уппаджджеййа. пан̃чамитоти еттха вассам̣ васантасса сан̇гхасса пан̃чамито пуббе уппаннам̣ аччекачӣварам̣ пан̃чамийам̣ вибхаджитва̄ гахитам̣ аччекачӣварапариха̄рамева лабхати. уджукам̣ аттанойева уппаннам̣ че, пан̃чамийам̣ уппаннамева аччекачӣварапариха̄рам̣ лабхати, на тато пуббети дат̣т̣хаббам̣.

саддха̄маттаканти дхаммассавана̄дӣхи тан̇кхан̣уппаннам̣ саддха̄маттакам̣. а̄рочитам̣ чӣваранти а̄рочетва̄ динначӣварам̣. чхат̣т̣хийам̣ уппанначӣварасса ека̄дасамо арун̣о чӣварака̄ле ут̣т̣ха̄тӣти а̄ха ‘‘чхат̣т̣хито пат̣т̣ха̄йа̄’’тиа̄ди. т̣хапитачӣварампӣти падха̄начӣварадассанамукхена саббампи атирекачӣварам̣ вуттам̣. атха ‘‘чӣварама̄сепи атирекачӣварам̣ никкхипитум̣ ват̣т̣атӣ’’ти идам̣ куто ладдханти че? ‘‘висум̣ ананун̃н̃а̄тепи имасмим̣ сиккха̄паде ‘чӣварака̄ласамайо на̄ма анаттхате катхине васса̄насса паччхимо ма̄со, аттхате катхине пан̃ча ма̄са̄’ти вадантена татийакатхинасиккха̄паде ‘ака̄лачӣварам̣ на̄ма анаттхате катхине ека̄дасама̄се уппаннам̣, аттхате катхине саттама̄се уппанна’нти вадантена ча анун̃н̃а̄тамева хотӣ’’ти ваданти. ‘‘ат̣т̣хакатха̄вачанаппама̄н̣ена гахетабба’’нти ча кечи.

650. ида̄ни пат̣хамакатхина̄дисиккха̄падехи тасса тасса чӣварасса лаббхама̄нам̣ париха̄рам̣ идхева упасам̣харитва̄ дассенто ‘‘ити атирекачӣварасса даса̄хам̣ париха̄ро’’тиа̄дима̄ха. ‘‘анаттхате катхине ека̄дасадиваса̄дхико ма̄со, аттхате катхине ека̄дасадиваса̄дхика̄ пан̃ча ма̄са̄’’ти айамева па̄т̣хо гахетаббо. кечи панеттха ‘‘ка̄ман̃чеса ‘даса̄хапарамам̣ атирекачӣварам̣ дха̄ретабба’нти имина̄ва сиддхо, ат̣т̣хуппаттивасена пана апуббам̣ вийа аттхам̣ дассетва̄ сиккха̄падам̣ т̣хапита’’нти па̄т̣хам̣ ватва̄ ‘‘дасадиваса̄дхико ма̄со, дасадиваса̄дхика̄ пан̃ча ма̄са̄ти па̄т̣хена бхавитабба’’нти ваданти, там̣ на гахетаббам̣ тасса пама̄дапа̄т̣хатта̄. на хи даса̄хена асампатта̄йа каттикатема̄сикапун̣н̣ама̄йа чӣварака̄лато пуббе даса диваса̄ адхика̄ хонти. еван̃хи сати ‘‘нава̄ха̄на̄гатам̣ каттикатема̄сикапун̣н̣ама’’нти ваттаббам̣.

ма̄тика̄т̣т̣хакатха̄йампи (кан̇кха̄. ат̣т̣ха. аччекачӣварасиккха̄падаван̣н̣ана̄) ‘‘пава̄ран̣ама̄сасса джун̣хапаккхапан̃чамито пат̣т̣ха̄йа уппаннасса чӣварасса нидха̄нака̄ло дассито хотӣ’’ти ватва̄ ‘‘ка̄ман̃чеса ‘даса̄хапарамам̣ атирекачӣварам̣ дха̄ретабба’нти имина̄ва сиддхо, ат̣т̣хуппаттивасена пана апуббам̣ вийа аттхам̣ дассетва̄ сиккха̄падам̣ т̣хапита’’нти па̄т̣хо дассито, сопи пама̄дапа̄т̣хойева. ‘‘джун̣хапаккхапан̃чамито пат̣т̣ха̄йа̄’’ти ча вуттатта̄ таттхева пубба̄паравиродхопи сийа̄, чхат̣т̣хито пат̣т̣ха̄йа̄ти ваттаббам̣. еван̃хи сати ‘‘даса̄хапарамасиккха̄паденева сиддха’’нти сакка̄ ваттум̣. имамева ча пама̄дапа̄т̣хам̣ гахетва̄ бхадантабуддхадатта̄чарийена ча –

‘‘тасса̄чча̄йикаваттхасса, катхине ту анаттхате;

париха̄рекама̄сова, даса̄хапарамо мато.

‘‘аттхате катхине тасса, пан̃ча ма̄са̄ пака̄сита̄;

париха̄ро муниндена, даса̄хапарама̄ пана̄’’ти. –

вуттам̣.

аччекачӣварака̄ле уппаннатта̄ ‘‘аччекачӣварасадисе’’ти вуттам̣. ‘‘пан̃чамийам̣ уппаннам̣ аначчекачӣварам̣ даса̄хам̣ атикка̄майато чӣварака̄лато пуббейева а̄патти хоти, на чӣварака̄ла̄тиккаме, тасма̄ чӣварака̄ла̄тиккаме пуна а̄паджджитабба̄йа а̄паттийа̄ абха̄вам̣ сандха̄йа ‘аначчекачӣваре аначчекачӣварасан̃н̃ӣ ана̄паттӣ’ти вутта’’нти тӣсупи ган̣т̣хипадесу вуттам̣. викаппанупагапаччхимаппама̄н̣асса аччекачӣварасса аттано сантаката̄, даса̄ха̄на̄гата̄йа каттикатема̄сикапун̣н̣ама̄йа уппаннабха̄во, анадхит̣т̣хитаавикаппитата̄, чӣварака̄ла̄тиккамоти има̄неттха чатта̄ри ан̇га̄ни.

аччекачӣварасиккха̄падаван̣н̣ана̄ нит̣т̣хита̄.