7. маха̄песака̄расиккха̄падаван̣н̣ана̄

642. саттаме кин̃чиматтам̣ анупададжджеййа̄ти идам̣ тасса каттабба̄ка̄раматтадассанам̣, да̄нам̣ панеттха ан̇гам̣ на хоти суттавад̣д̣ханавасенева а̄паджджитаббатта̄. тенева падабха̄джанепи ‘‘тасса вачанена а̄йатам̣ ва̄ виттхатам̣ ва̄ аппитам̣ ва̄ кароти, пайоге дуккат̣ам̣, пат̣ила̄бхена ниссаггийа’’нти суттавад̣д̣хана̄ка̄рамева дассетва̄ а̄патти вутта̄. ма̄тика̄т̣т̣хакатха̄йампи (кан̇кха̄. ат̣т̣ха. маха̄песака̄расиккха̄падаван̣н̣ана̄) вуттам̣ ‘‘на бхиккхуно пин̣д̣апа̄тада̄наматтена там̣ ниссаггийам̣ хоти. саче пана те тасса вачанена чӣвараса̄мика̄нам̣ хаттхато суттам̣ гахетва̄ ӣсакампи а̄йатам̣ ва̄ виттхатам̣ ва̄ аппитам̣ ва̄ каронти, атха тесам̣ пайоге бхиккхуно дуккат̣ам̣, пат̣ила̄бхена ниссаггийам̣ хотӣ’’ти. а̄йата̄дӣсу саттасу а̄ка̄ресу а̄димхи тайо а̄ка̄ре суттавад̣д̣ханена вина̄ на сакка̄ ка̄тунти а̄ха ‘‘суттавад̣д̣ханаа̄ка̄рамева дассетӣ’’ти. сувӣта̄дайо хи а̄ка̄ре вина̄пи суттавад̣д̣ханена сакка̄ ка̄тум̣. сесаметтха утта̄намева. ан̃н̃а̄такааппава̄рита̄нам̣ тантава̄йе упасан̇камитва̄ викаппама̄паджджаната̄, чӣварасса аттуддесиката̄, тасса вачанена суттавад̣д̣ханам̣, чӣварасса пат̣ила̄бхоти има̄неттха чатта̄ри ан̇га̄ни.

маха̄песака̄расиккха̄падаван̣н̣ана̄ нит̣т̣хита̄.