6. суттавин̃н̃аттисиккха̄падаван̣н̣ана̄

636. чхат̣т̣хе па̄л̣ийам̣ чӣварака̄расамайети имина̄ вассам̣вуттхабхиккхӯнам̣ чӣваракаммасамайатта̄ чӣварама̄со вутто, атхан̃н̃опи пана чӣваракаммака̄ло чӣварака̄расамайоти ваттум̣ ват̣т̣ати.

638. пан̃чахипи миссетва̄ти кхома̄дӣхи пан̃чахи миссетва̄. вӣтавӣтат̣т̣ха̄нам̣ йаттха сам̣харитва̄ т̣хапенти, тасса турӣти адхивачанам̣. суттам̣ павесетва̄ йена а̄кот̣ента̄ гханабха̄вам̣ сампа̄денти, там̣ веманти вуччати. йам̣ йанти йам̣ йам̣ пайогам̣. тантӯнам̣ аттано сантакатта̄ вӣтавӣтат̣т̣ха̄нам̣ пат̣иладдхамева хотӣти а̄ха ‘‘дӣгхато…пе… вӣте ниссаггийам̣ па̄читтийа’’нти. па̄л̣ийампи хи имина̄ва адхиппа̄йена ‘‘пат̣ила̄бхена ниссаггийа’’нти вуттам̣, тасма̄ йа̄ва чӣварам̣ вад̣д̣хати, та̄ва имина̄ пама̄н̣ена а̄паттийо вад̣д̣ханти.

сесо каппийоти еттха хаттхакаммайа̄чанавасена. пуббе вуттанайена ниссаггийанти дӣгхасо видаттхиматте тирийам̣ хаттхаматте ча вӣте ниссаггийам̣. тенева̄ти акаппийатантава̄йена. татхева дуккат̣анти париччхеде париччхеде дуккат̣ам̣. кеда̄рабаддха̄дӣхӣти а̄ди-саддена аччхиман̣д̣алабаддха̄ди гахитам̣. танте т̣хитам̣йева адхит̣т̣ха̄таббанти еттха ‘‘паччха̄ вӣтат̣т̣ха̄нам̣ адхит̣т̣хитагатикамева хоти, пуна адхит̣т̣ха̄накиччам̣ наттхи. саче пана париччхедам̣ дассетва̄ антарантара̄ авӣтам̣ хоти, пуна адхит̣т̣ха̄табба’’нти ваданти. есева найоти викаппанупагаппама̄н̣аматте вӣте танте т̣хитам̣йева адхит̣т̣ха̄таббанти аттхо. чӣвараттха̄йа вин̃н̃а̄питасуттам̣, аттуддесиката̄, акаппийатантава̄йена ва̄йа̄пананти има̄неттха тӣн̣и ан̇га̄ни.

ма̄тика̄т̣т̣хакатха̄йам̣ (кан̇кха̄. ат̣т̣ха. суттавин̃н̃аттисиккха̄падаван̣н̣ана̄) пана ва̄йа̄пеййа̄ти еттха ‘‘чӣварам̣ ме, а̄вусо, ва̄йатха̄ти акаппийавин̃н̃аттийа̄ ва̄йа̄пеййа̄’’ти аттхам̣ ватва̄ ан̇гесупи ‘‘акаппийатантава̄йена акаппийавин̃н̃аттийа̄ ва̄йа̄пана’’нти висесетва̄ вуттам̣, татха̄видхам̣ пана висесавачанам̣ нева па̄л̣ийам̣, на ат̣т̣хакатха̄йам̣ упалаббхати. па̄л̣ийампи ‘‘н̃а̄така̄нам̣ пава̄рита̄на’’нти еттакамева ана̄паттива̄ре вуттам̣, ат̣т̣хакатха̄йан̃ча суттатантава̄йа̄намева каппийа̄каппийабха̄вена бахудха̄ найо дассито, на каппийа̄каппийавин̃н̃аттивасена̄ти. ‘‘акаппийавин̃н̃аттийа̄ ва̄йа̄пеййа̄’’ти ча висесетва̄ вадантена айам̣ на̄ма каппийавин̃н̃аттӣти висум̣ на дасситам̣, тасма̄ вӣмам̣ситва̄ гахетаббам̣.

суттавин̃н̃аттисиккха̄падаван̣н̣ана̄ нит̣т̣хита̄.