5. чӣварааччхинданасиккха̄падаван̣н̣ана̄

631. пан̃чаме йампи тйа̄ханти еттха йанти ка̄ран̣авачанам̣, тасма̄ еваметтха самбандхо ведитаббо – майа̄ саддхим̣ джанападача̄рикам̣ паккамиссатӣти йам̣ ка̄ран̣ам̣ нисса̄йа ахам̣ те, а̄вусо, чӣварам̣ ада̄сим̣, там̣ на каросӣти купито анаттамано аччхиндӣти. йанти ва̄ чӣварам̣ пара̄масати, таттха ‘‘майа̄ саддхим̣ джанападача̄рикам̣ паккамиссатӣти йампи те ахам̣ чӣварам̣ ада̄сим̣, там̣ чӣварам̣ ган̣хисса̄мӣти купито анаттамано аччхиндӣ’’ти самбандхитаббам̣.

633. а̄н̣атто бахӯни ган̣ха̄ти, екам̣ па̄читтийанти ‘‘чӣварам̣ ган̣ха̄’’ти а̄н̣аттийа̄ екачӣварависайатта̄ екамева па̄читтийам̣. ва̄ча̄йа ва̄ча̄йа дуккат̣анти еттха аччхиннесу ваттхуган̣ана̄йа па̄читтийа̄ни. екава̄ча̄йа самбахула̄ а̄паттийоти идам̣ аччхиннесу ваттхуган̣ана̄йа а̄паджджитаббам̣ па̄читтийа̄паттим̣ сандха̄йа вуттам̣. а̄н̣аттийа̄ а̄паджджитаббам̣ пана дуккат̣ам̣ екамева.

634. еванти имина̄ ‘‘ваттхуган̣ана̄йа дуккат̣а̄нӣ’’ти идам̣ пара̄масати. есева найоти ситхилам̣ га̄л̣хан̃ча паккхитта̄су а̄паттийа̄ бахуттам̣ екаттан̃ча атидиссати.

635. а̄вусо, майантиа̄дӣсу ган̣хитука̄мата̄йа евам̣ вуттепи тенева диннатта̄ ана̄патти. амха̄кам̣ сантике упаджджхам̣ ган̣хиссатӣти идам̣ са̄ман̣ерассапи да̄нам̣ дӣпети. тасма̄ кин̃ча̄пи па̄л̣ийам̣ ‘‘бхиккхусса са̄мам̣ чӣварам̣ датва̄’’ти вуттам̣, татха̄пи анупасампаннака̄ле датва̄пи упасампаннака̄ле аччхиндантасса па̄читтийамева̄ти ведитаббам̣. аччхинданасамайе упасампаннабха̄войева хеттха пама̄н̣ам̣. детӣти тут̣т̣хо ва̄ купито ва̄ дети. рундхатха̄ти нива̄ретха. евам̣ пана да̄тум̣ на ват̣т̣атӣти еттха евам̣ диннам̣ на та̄ва тасса сантаканти анадхит̣т̣хахитва̄ва парибхун̃джитаббанти ведитаббам̣. а̄хара̄петум̣ пана ват̣т̣атӣти евам̣ диннам̣ бхатисадисатта̄ а̄хара̄петум̣ ват̣т̣ати. чаджитва̄ диннанти вуттанайена адатва̄ анапеккхена хутва̄ тассева диннам̣. бхан̣д̣аггхена ка̄ретабботи сакасан̃н̃а̄йа вина̄ ган̣ханто бхан̣д̣ам̣ аггха̄петва̄ а̄паттийа̄ ка̄ретаббо. викаппанупагапаччхимачӣварата̄, са̄мам̣ динната̄, сакасан̃н̃ита̄, упасампанната̄, кодхавасена аччхинданам̣ аччхинда̄панам̣ ва̄ти има̄неттха пан̃ча ан̇га̄ни.

чӣварааччхинданасиккха̄падаван̣н̣ана̄ нит̣т̣хита̄.