1. паттасиккха̄падаван̣н̣ана̄

598-602. паттаваггасса пат̣хаме бхан̣д̣анти виккетаббабхан̣д̣ам̣. йасма̄ ван̣н̣асаддо сан̣т̣ха̄наджа̄тирӯпа̄йатанака̄ран̣апама̄н̣агун̣апасам̣са̄дӣсу диссати. ‘‘махантам̣ саппара̄джаван̣н̣ам̣ абхинимминитва̄’’тиа̄дӣсу (сам̣. ни. 1.142) хи сан̣т̣ха̄нам̣ вуччати. ‘‘бра̄хман̣ова сет̣т̣хо ван̣н̣о, хӣно ан̃н̃о ван̣н̣о’’тиа̄дӣсу (ма. ни. 2.402) джа̄ти. ‘‘парама̄йа ван̣н̣апоккхарата̄йа саманна̄гато’’тиа̄дӣсу (дӣ. ни. 1.303) рӯпа̄йатанам̣.

‘‘на хара̄ми на бхан̃джа̄ми, а̄ра̄ син̇гха̄ми ва̄риджам̣;

атха кена ну ван̣н̣ена, гандхаттхеноти вуччатӣ’’ти. (сам̣. ни. 1.234; джа̄. 1.6.116) –

а̄дӣсу ка̄ран̣ам̣. ‘‘тайо паттасса ван̣н̣а̄’’тиа̄дӣсу (па̄ра̄. 602) пама̄н̣ам̣. ‘‘када̄ сан̃н̃ул̣ха̄ пана те гахапати име саман̣асса готамасса ван̣н̣а̄’’тиа̄дӣсу (ма. ни. 2.77) гун̣о. ‘‘ван̣н̣а̄рахасса ван̣н̣ам̣ бха̄сатӣ’’тиа̄дӣсу (а. ни. 4.3) пасам̣са̄. тасма̄ вуттам̣ ‘‘тайо паттасса ван̣н̣а̄ти тӣн̣и паттасса пама̄н̣а̄нӣ’’ти.

ад̣д̣хатерасапала̄ хотӣти еттха ‘‘ма̄са̄нам̣ ад̣д̣хатерасапала̄ни ган̣ха̄тӣ’’ти ваданти. ‘‘магадхана̄л̣и на̄ма чхапасата̄ на̄л̣ӣ’’ти кечи. ‘‘ат̣т̣хапасата̄’’ти апаре. таттха пурима̄нам̣ матена типасата̄йа на̄л̣ийа̄ две на̄л̣ийо ека̄ магадхана̄л̣и хоти, паччхима̄нам̣ чатупасата̄йа на̄л̣ийа̄ две на̄л̣ийо ека̄ магадхана̄л̣и. а̄чарийадхаммапа̄латтхерена пана ‘‘пакатийа̄ чатумут̣т̣хикам̣ куд̣увам̣, чатукуд̣увам̣ на̄л̣икам̣, та̄йа на̄л̣ийа̄ сол̣аса на̄л̣ийо дон̣ам̣, там̣ пана магадхана̄л̣ийа̄ два̄даса на̄л̣ийо хонтӣ’’ти вуттам̣, тасма̄ тена найена ‘‘магадхана̄л̣и на̄ма пан̃ча куд̣ува̄ни екан̃ча мут̣т̣хим̣ ека̄йа мут̣т̣хийа̄ татийан̃ча бха̄гам̣ ган̣ха̄тӣ’’ти ведитаббам̣.

саббасамбха̄расан̇кхатоти джӣрака̄дисаббасамбха̄рехи сан̇кхато. а̄лопасса а̄лопасса анурӯпанти еттха ‘‘бйан̃джанасса матта̄ на̄ма оданачатуттхо бха̄го’’ти брахма̄йусуттасса ат̣т̣хакатха̄йам̣ (ма. ни. ат̣т̣ха. 2.387) вуттатта̄ а̄лопасса чатуттхабха̄гаппама̄н̣ам̣ бйан̃джанам̣ а̄лопасса анурӯпанти гахетаббам̣. идха пана сӯпассева оданачатуттхабха̄гаппама̄н̣атам̣ дассетва̄ етасса лаккхан̣е дассите итарассапи дасситамева хотӣти бйан̃джанасса татха̄ висесетва̄ пама̄н̣ам̣ на дасситам̣.

магадхана̄л̣ийа̄ упад̣д̣хаппама̄н̣о идха паттхоти а̄ха ‘‘паттходананти магадхана̄л̣ийа̄ упад̣д̣хана̄л̣икодана’’нти. имина̄ ча ‘‘паттхадвайам̣ магадхана̄л̣ӣ’’ти дасситам̣ хоти. паттхо ча ‘‘чатупало куд̣уво, чатукуд̣уво паттхо’’ти имина̄ локийавоха̄рена ведитаббо. бха̄джанапарибхогена̄ти удака̄харан̣а̄дина̄ бха̄джанапарибхогена.

607. дхотети парибхога̄васа̄надассанаттхам̣ вуттам̣, на пана дхотейева дуккат̣ам̣ а̄паджджати тато пуретарам̣ парибхогака̄лейева а̄паджджанато.

608. пан̃чахи двӣхӣти идам̣ ‘‘етта̄вата̄ ка̄л̣аван̣н̣ата̄ сампаджджатӣ’’ти дассанаттхам̣ вуттам̣. ‘‘йади пана екенапи па̄кена ка̄л̣аван̣н̣о хоти, адхит̣т̣ха̄нупагойева̄’’ти ваданти. хаттха̄на̄гатассапи адхит̣т̣ха̄таббабха̄вадассанаттхам̣ ‘‘йадихӣ’’тиа̄ди вуттам̣. имина̄ ча дӯре т̣хитампи адхит̣т̣ха̄тум̣ викаппетун̃ча лабхати, т̣хапитат̣т̣ха̄насаллаккхан̣ан̃ча на пама̄н̣анти ведитаббам̣. сутва̄ ва̄ти паттака̄ракена песитабхиккхуна̄ ана̄н̣атто кевалам̣ тасса катхентасса вачанаматтам̣ сутва̄. на пама̄н̣анти тена апеситатта̄. са̄мантавиха̄рети идам̣ упача̄раматтам̣, тато дӯре т̣хитампи адхит̣т̣ха̄тум̣ ват̣т̣атийева. т̣хапитат̣т̣ха̄нам̣ саллаккхетва̄ти идампи упача̄раматтам̣, паттасаллаккхан̣амеветтха пама̄н̣ам̣. патте ва̄ чхиддам̣ хотӣти мукхават̣т̣ито хет̣т̣ха̄ дван̇гуламаттока̄сато пат̣т̣ха̄йа йаттха каттхачи чхиддам̣ хоти. сесаметтха пат̣хамакатхине вуттанайамева.

паттасиккха̄падаван̣н̣ана̄ нит̣т̣хита̄.