9. рӯпийасам̣воха̄расиккха̄падаван̣н̣ана̄

587. рӯпийасам̣воха̄расиккха̄паде джа̄тарӯпа̄дичатуббидхампи ниссаггийаваттху идха рӯпийаггахан̣енева гахитанти а̄ха ‘‘джа̄тарӯпараджатапариваттана’’нти. пат̣иггахитапариваттанети са̄дитарӯпийасса париваттане, аса̄дийитва̄ ва̄ каппийена га̄хена пат̣иггахитарӯпийапариваттане.

589. га-ка̄расса ка-ка̄рам̣ катва̄ ‘‘сӣсӯпака’’нти ликхитам̣, падабха̄джане гханакатанти пин̣д̣ам̣ катам̣. саттхуван̣н̣отиа̄дӣсу ‘‘саттхуван̣н̣о ча каха̄пан̣о ча…пе… йе ча воха̄рам̣ гаччхантӣ’’ти евам̣ саббаттха самуччайо ведитаббо. рӯпийе рӯпийасан̃н̃ӣти сакасантакам̣ вадати. рӯпийам̣ чета̄петӣти парасантакам̣ вадати. ‘‘ниссаггийаваттхуна̄ дуккат̣аваттхум̣ ва̄ каппийаваттхум̣ ва̄ чета̄пентассапи есева найо’’ти идам̣ касма̄ вуттам̣. на хи ‘‘рӯпийе рӯпийасан̃н̃ӣ арӯпийам̣ чета̄пети, ниссаггийам̣ па̄читтийа’’нтиа̄диттико па̄л̣ийам̣ вуттоти а̄ха ‘‘йо хӣ’’тиа̄ди. тасса̄нуломатта̄ти еттха̄йамадхиппа̄йо – рӯпийасам̣воха̄ро на̄ма на кевалам̣ рӯпийена рӯпийапариваттанамева, атха кхо ‘‘арӯпийе рӯпийасан̃н̃ӣ рӯпийам̣ чета̄петӣ’’ти вуттатта̄ арӯпийена рӯпийачета̄панампи рӯпийасам̣воха̄ро на̄ма хотӣти етасмим̣ паккхепи рӯпийе сати рӯпийасам̣воха̄ройева хотӣти айаматтхо авуттопи вин̃н̃а̄йатӣти. арӯпийам̣ на̄ма дуккат̣аваттхукаппийаваттхӯни. екантена рӯпийапаккхети екена антена рӯпийапаккхети айам̣ аттхо гахетаббо. ‘‘екато рӯпийапаккхе’’ти ва̄ па̄т̣хо ведитаббо. ‘‘екарӯпийапаккхе’’типи пат̣ханти, таттха̄пи екато рӯпийапаккхети айамеваттхо гахетаббо.

каппийаваттхуна̄ каппийаваттхуно кайавиккайепи та̄ва ниссаггийам̣ хоти, дуккат̣аваттхуна̄ дуккат̣аваттхуно кайавиккайе касма̄ на хотӣти андхакат̣т̣хакатха̄йа адхиппа̄йо. идам̣ сиккха̄падам̣…пе… арӯпийена ча рӯпийачета̄панам̣ сандха̄йа вуттанти самбандхо. идха̄ти имасмим̣ рӯпийасам̣воха̄расиккха̄паде. таттха̄ти кайавиккайасиккха̄паде. тенева̄ти каппийаваттхуна̄йева.

пуна каппийабха̄вам̣ нетум̣ асаккун̣еййатта̄ ‘‘маха̄акаппийо на̄ма̄’’ти вуттам̣. ‘‘на сакка̄ кеначи упа̄йена каппийо ка̄тунти идам̣ пан̃чаннам̣йева сахадхаммика̄нам̣ антаре париваттанам̣ сандха̄йа вуттам̣, гихӣхи пана гахетва̄ аттано сантакам̣ катва̄ диннам̣ саббесам̣ каппатӣ’’ти ваданти. ‘‘на сакка̄ кеначи упа̄йена каппийо ка̄ту’’нти пана имина̄ва пат̣иггахитарӯпийам̣ аниссаджджитва̄ва тена чета̄питам̣ каппийабхан̣д̣ампи сан̇гхасса ниссат̣т̣хам̣ парибхун̃джитум̣ на ват̣т̣атӣти сиддхам̣.

йе пана ‘‘пат̣иггахитарӯпийам̣ аниссаджджитва̄пи тена париваттитам̣ каппийабхан̣д̣ам̣ сан̇гхасса ниссат̣т̣хам̣ парибхун̃джитум̣ ват̣т̣атӣ’’ти ваданти, тесам̣ ‘‘на сакка̄ кеначи упа̄йена каппийо ка̄ту’’нти идам̣ на йуджджати. те панеттха евам̣ ваданти ‘‘йасма̄ ниссаджджитаббаваттхум̣ аниссаджджитва̄ва упарӯпари ан̃н̃ам̣ ан̃н̃ам̣йева катам̣, тасма̄ париччхеда̄бха̄вато идха ниссаджджитум̣ аватва̄ ‘на сакка̄ кеначи упа̄йена каппийо ка̄ту’нти вуттам̣, париччхеда̄бха̄ватойева ‘мӯле мӯласа̄мика̄нам̣, патте ча паттаса̄мика̄нам̣ динне каппийо хотӣ’ти ча на вутта’’нти. йади пат̣иггахитарӯпийам̣ аниссаджджитва̄ чета̄питам̣ каппийабхан̣д̣ампи сан̇гхасса ниссат̣т̣хам̣ парибхун̃джитум̣ ват̣т̣ати, евам̣ санте идха̄пи аваса̄наваттхум̣ гахетва̄ сан̇гхасса ниссат̣т̣хам̣ касма̄ на ват̣т̣ати, ‘‘йо пана рӯпийам̣ угган̣хитва̄…пе… патте ча паттаса̄мика̄нам̣ динне каппийо хотӣ’’ти имина̄пи пат̣иггахитарӯпийам̣ аниссаджджитва̄ чета̄питам̣ каппийабхан̣д̣ампи сан̇гхасса ниссат̣т̣хам̣ парибхун̃джитум̣ на ват̣т̣атӣти сиддхам̣. йади там̣ ниссат̣т̣хам̣ парибхун̃джитум̣ ват̣т̣еййа, ‘‘мӯле мӯласа̄мика̄нам̣, патте ча паттаса̄мика̄нам̣ динне каппийо хотӣ’’ти на вадеййа. апаре панеттха евам̣ ваданти ‘‘йади сан̇гхасса ниссат̣т̣хам̣ хоти, рӯпийапат̣игга̄хакасса на ват̣т̣ати, тасма̄ тассапи йатха̄ ват̣т̣ати, татха̄ дассанаттхам̣ ‘мӯле мӯласа̄мика̄на’нтиа̄ди вутта’’нти.

дутийапаттасадисойева̄ти имина̄ пан̃чаннампи сахадхаммика̄нам̣ на каппатӣти дассети. таттха ка̄ран̣ама̄ха ‘‘мӯласса сампат̣иччхитатта̄’’ти. атха мӯласса сампат̣иччхитатта̄ рӯпийапат̣игга̄хакасса та̄ва акаппийо хоту, сеса̄нам̣ пана касма̄ на каппатӣти ман̃н̃ама̄но пуччхати ‘‘касма̄ сеса̄нам̣ на каппатӣ’’ти. ка̄ран̣ама̄ха ‘‘мӯласса аниссат̣т̣хатта̄’’ти. паттасса каппийабха̄вепи сампат̣иччхитамӯласса ниссаджджитаббасса аниссат̣т̣хатта̄ тена гахитапатто сеса̄нампи на каппати. йади хи тена сампат̣иччхитамӯлам̣ сан̇гхамаджджхе ниссат̣т̣хам̣ сийа̄, тена каппийена каммена а̄ра̄мика̄дӣхи гахетва̄ диннапатто рӯпийапат̣игга̄хакам̣ т̣хапетва̄ сеса̄нам̣ ват̣т̣ати. апаре пана ‘‘мӯлам̣ сампат̣иччхитва̄ гахитапаттопи йади сан̇гхасса ниссат̣т̣хо, сеса̄нам̣ каппатӣ’’ти ваданти. евам̣ санте ‘‘мӯласса аниссат̣т̣хатта̄’’ти на ваттаббам̣, ‘‘сан̇гхасса аниссат̣т̣хатта̄’’ти евамева ваттаббам̣.

дуббича̄ритатта̄ти имина̄ рӯпийасам̣воха̄ро анена катоти дассети. ан̃н̃есам̣ пана ват̣т̣атӣти йасма̄нена рӯпийасам̣воха̄раматтамева катам̣, на мӯлам̣ сампат̣иччхитам̣, тасма̄ винайакаммавасена сан̇гхасса ниссат̣т̣хака̄лато пат̣т̣ха̄йа ан̃н̃есам̣ ват̣т̣ати. имасмим̣йева ча аттхе пама̄н̣ам̣ дассенто ‘‘маха̄суматтхерасса кира̄’’тиа̄дима̄ха. апаре пана ‘‘дуббича̄ритатта̄ти имина̄ кевалам̣ гихисантакабха̄вена т̣хите дуббича̄ритаматтам̣ вуттам̣, на рӯпийасам̣воха̄ра̄паджджанам̣, тасма̄ рӯпийасам̣воха̄ра̄бха̄вато со патто ниссаджджитум̣ на сакка̄ти тасса на каппати, аниссат̣т̣хопи ан̃н̃есам̣ каппати. аниссат̣т̣хассева ча ан̃н̃есам̣ каппийабха̄вадассанаттхам̣ ‘маха̄суматтхерасса кира̄’тиа̄диваттхӯни уда̄хат̣а̄ни. сан̇гхасса ниссаджджӣти идан̃ча ан̃н̃есам̣ каппийатта̄ кевалам̣ сан̇гхасса париччаттабха̄вам̣ сандха̄йа вуттам̣, на пана винайакаммавасена сан̇гхасса ниссат̣т̣хабха̄вам̣. имасса ча аттхасса сапписса пӯретва̄ти идам̣ вачанам̣ са̄дхака’’нти ваданти.

591. рӯпийапат̣иггахан̣арӯпийасам̣воха̄ресу йена екекамева катам̣, тена таттха таттха вуттанайенева ниссаджджитаббам̣. йена пана пат̣иггахитарӯпийенева сам̣воха̄ро като, тена катхам̣ ниссаджджитаббанти? найидам̣ дуккарам̣, ‘‘ахам̣, бханте, на̄наппака̄ракам̣ рӯпийасам̣воха̄рам̣ сама̄паджджи’’нти евамева ниссаджджитаббам̣. ‘‘имасмим̣ сиккха̄падепи ‘арӯпийе рӯпийасан̃н̃ӣ, а̄патти дуккат̣асса̄’тиа̄диттикасса аваса̄нападе ана̄паттийа̄ вуттатта̄ каппийаваттхувасенева идам̣ тикам̣ вутта’’нти тӣсупи ган̣т̣хипадесу вуттам̣. кечи пана ‘‘арӯпийаггахан̣ена каппийаваттхудуккат̣аваттхӯнам̣ сан̇гахоти пуримапададвайам̣ каппийаваттхудуккат̣аваттхӯнам̣ васена вуттам̣, аваса̄нападамева каппийаваттхувасена вутта’’нти ваданти, там̣ на йуджджати ана̄паттимиссите аваса̄наттике сан̃н̃а̄на̄наттам̣ т̣хапетва̄ ваттхуна̄наттасса абха̄вато. дуккат̣аваттхуна̄ пана дуккат̣аваттхуно чета̄панам̣ нева идха, на таттха па̄л̣ийам̣ вуттанти вачанаметтха са̄дхакам̣. йам̣ аттано дханена париваттати, тасса ва̄ дханасса ва̄ рӯпийабха̄во чева, париваттанан̃ча̄ти има̄неттха две ан̇га̄ни.

рӯпийасам̣воха̄расиккха̄падаван̣н̣ана̄ нит̣т̣хита̄.