10. кайавиккайасиккха̄падаван̣н̣ана̄

593. кайавиккайасиккха̄паде па̄л̣ийам̣ джа̄на̄хӣти еттха упадха̄рехӣти аттхо, сут̣т̣ху упадха̄ретва̄ ган̣ха, идам̣ на мана̄панти пуна да̄тум̣ на саккхиссасӣти адхиппа̄йо.

594-595. кайанти парабхан̣д̣асса гахан̣ам̣. виккайанти аттано бхан̣д̣асса да̄нам̣. тена̄ха ‘‘имина̄ имам̣ дехӣ’’тиа̄ди. йасма̄ кайитам̣ на̄ма парасса хаттхато гахитам̣ вуччати, виккӣтан̃ча парасса хаттхе диннам̣, тасма̄ ‘‘кайитан̃ча хоти парабхан̣д̣ам̣ аттано хаттхагатам̣ каронтена, виккӣтан̃ча аттано бхан̣д̣ам̣ парахаттхагатам̣ каронтена̄’’ти вуттам̣. йади евам̣ па̄л̣ийам̣ парато ‘‘кайитан̃ча хоти виккайитан̃ча̄’’ти ватва̄ ‘‘аттано бхан̣д̣ам̣ парахаттхагатам̣ парабхан̣д̣ам̣ аттано хаттхагата’’нти касма̄ вуттанти а̄ха ‘‘имина̄ имантиа̄дивачана̄нурӯпато пана̄’’тиа̄ди. имина̄ти хи сакасантакам̣ вуттам̣. таданурӯпато па̄л̣ийам̣ пат̣хамам̣ аттано бхан̣д̣ам̣ дасситам̣, на кайавиккайапада̄нурӯпато. тан̃хи випарӣтато парасантакаггахан̣ам̣ пураккхатва̄ т̣хитам̣.

ка̄мам̣ сесан̃а̄такепи ‘‘имам̣ дехӣ’’ти вадато вин̃н̃атти на хоти, саддха̄деййавинипа̄танассапи пана абха̄вам̣ дассетука̄мо ‘‘ма̄тарам̣ пана питарам̣ ва̄’’ти а̄ха. вин̃н̃атти на хотӣти идам̣ висум̣ вин̃н̃а̄панам̣ сандха̄йа вуттам̣. ан̃н̃ам̣ кин̃чи аватва̄ евам̣ ваданто ан̃н̃а̄такам̣ вин̃н̃а̄пети на̄ма̄ти а̄ха – ‘‘ан̃н̃а̄такам̣ ‘имам̣ дехӣ’ти вадато вин̃н̃аттӣ’’ти. ан̃н̃ам̣ кин̃чи аватва̄ ‘‘имам̣ ган̣ха̄хӣ’’ти диннам̣ ан̃н̃а̄такасса диннам̣ на̄ма хотӣти вуттам̣ ‘‘саддха̄деййавинипа̄тана’’нти. тиссо а̄паттийоти ан̃н̃а̄такавин̃н̃аттисаддха̄деййавинипа̄танакайавиккайа̄паттисан̇кха̄та̄ тиссо а̄паттийо.

имам̣ на̄ма карохӣти вадати, ват̣т̣атӣти еттха бхуттоси, ида̄ни касма̄ на каросӣти ваттхумпи ват̣т̣ати. ‘‘ниссаггийам̣ па̄читтийа’’нти кин̃ча̄пи сатийева ниссаггийаваттхумхи па̄читтийам̣ вуттам̣, асатипи пана тасмим̣ па̄читтийанти идам̣ ат̣т̣хакатха̄пама̄н̣ена гахетаббанти дассетум̣ ‘‘кин̃ча̄пӣ’’тиа̄ди вуттам̣. парибхуттети саппиа̄дим̣ сандха̄йа вуттам̣. йам̣ аттано дханена париваттети, йена ча париваттети, тесам̣ каппийаваттхута̄, асахадхаммиката̄, кайавиккайа̄паджджанан̃ча̄ти има̄неттха тӣн̣и ан̇га̄ни.

кайавиккайасиккха̄падаван̣н̣ана̄ нит̣т̣хита̄.

нит̣т̣хито косийавагго дутийо.