9. махаллакавиха̄расиккха̄падаван̣н̣ана̄

135. наваме ‘‘махаллако на̄ма виха̄ро саса̄мико’’ти вуттатта̄ сан̃н̃а̄чика̄йа кут̣ийа̄ ана̄патти. ‘‘ад̣д̣хатеййахаттхампӣ’’ти уккат̣т̣хапариччхедена вуттавачанам̣ па̄л̣ийа̄ саметӣти а̄ха ‘‘там̣ сувутта’’нти. ‘‘па̄л̣ийам̣ ат̣т̣хакатха̄йан̃ча уккат̣т̣хапариччхедена ад̣д̣хатеййахаттхаппама̄н̣асса ока̄сасса дасситатта̄ кава̄т̣ам̣ ад̣д̣хатеййахаттхавиттха̄рато ӯнакам̣ ва̄ хоту адхикам̣ ва̄, ад̣д̣хатеййахаттхаппама̄н̣ам̣йева ока̄со’’ти ваданти.

йасса вемаджджхети йасса виха̄расса вемаджджхе. са̄ апарипӯраупача̄ра̄пи хотӣти виварийама̄нам̣ кава̄т̣ам̣ йам̣ бхиттим̣ а̄ханати, са̄ саманта̄ кава̄т̣авиттха̄раппама̄н̣аупача̄рарахита̄пи хотӣти аттхо. а̄локам̣ сандхети пидхетӣти а̄локасандхи. ‘‘пунаппунам̣ чха̄да̄песи, пунаппунам̣ лимпа̄песӣти имасмим̣ ваттхусмим̣ уппаннадосена сиккха̄падасса пан̃н̃аттатта̄ лепам̣ ануджа̄нантена ча два̄рабандхасса саманта̄ ад̣д̣хатеййахаттхаппама̄н̣ейева падесе пунаппунам̣ лепасса анун̃н̃а̄татта̄ тато ан̃н̃аттха пунаппунам̣ лимпентасса ва̄ лимпа̄пентасса ва̄ бхиттийам̣ маттика̄йа каттаббакиччам̣ нит̣т̣ха̄петва̄ пуна чатуттхалепе динне па̄читтийена бхавитабба’’нти ваданти. ган̣т̣хипадесу пана тӣсупи ‘‘пунаппунам̣ лепада̄насса вуттаппама̄н̣ато ан̃н̃аттха пат̣иккхиттаматтам̣ т̣хапетва̄ па̄читтийасса авуттатта̄ дуккат̣ам̣ анурӯпа’’нти вуттам̣.

адхит̣т̣ха̄таббанти сам̣видха̄таббам̣. аппахаритети еттха аппа-саддо ‘‘аппиччхо’’тиа̄дӣсу вийа абха̄ваттхоти а̄ха ‘‘ахарите’’ти. патанока̄соти патанока̄сатта̄ татра т̣хитасса бхиккхуно упари патеййа̄ти адхиппа̄йо. саче харите т̣хито адхит̣т̣хети, а̄патти дуккат̣асса̄ти вачанена имаматтхам̣ дӣпети – саче виха̄расса саманта̄ вуттаппама̄н̣е париччхеде пуббан̣н̣а̄дӣни на санти, таттха виха̄ро ка̄ретаббо. йаттха пана санти, таттха ка̄ра̄пентасса дуккат̣анти.

136. екекам̣ маггам̣ уджукамева ут̣т̣хапетва̄ чха̄данам̣ маггена чха̄данам̣ на̄ма хотӣти дассетум̣ ‘‘маггена чха̄дентасса̄’’ти вуттам̣. имина̄ пана найена саббасмим̣ виха̄ре екава̄рам̣ чха̄дите там̣ чхаданам̣ екамагганти гахетва̄ ‘‘две магге’’тиа̄ди вуттам̣. ‘‘парийа̄йена чха̄данепи имина̄ва найена йоджетабба’’нти тӣсупи ган̣т̣хипадесу вуттам̣, там̣ ‘‘пунаппунам̣ чха̄да̄песӣ’’ти има̄йа па̄л̣ийа̄ ‘‘саббампи четам̣ чхаданам̣ чхаданӯпари ведитабба’’нти имина̄ ат̣т̣хакатха̄вачанена ча самети, тасма̄ две магге адхит̣т̣хахитва̄ татийа̄йа маггам̣ а̄н̣а̄петва̄ паккамитаббанти еттха две чхадана̄ни адхит̣т̣хахитва̄ татийам̣ чхаданам̣ ‘‘евам̣ чха̄дехӣ’’ти а̄н̣а̄петва̄ паккамитаббанти еваматтхо гахетаббо.

кечи пана ‘‘пат̣хамам̣ та̄ва екава̄рам̣ апарисесам̣ чха̄детва̄ пуна чхаданадан̣д̣аке бандхитва̄ дутийава̄рам̣ татхева чха̄детаббам̣, татийава̄рачатуттхава̄ре сампатте две магге адхит̣т̣хахитва̄ а̄н̣а̄петва̄ паккамитабба’’нти ваданти. апаре пана ‘‘пат̣хамава̄рейева тайопи магге адхит̣т̣ха̄тум̣ ват̣т̣ати, чатуттхато пат̣т̣ха̄йа а̄патти па̄читтийа’’нти ваданти. тадубхайампи па̄л̣ийа̄ ат̣т̣хакатха̄йа ча на самети. татийа̄йа магганти еттха татийа̄йа̄ти упайогаттхе сампада̄навачанам̣, татийам̣ магганти аттхо. тин̣н̣ам̣ магга̄нанти маггавасена чха̄дита̄нам̣ тин̣н̣ам̣ чхадана̄нам̣. тин̣н̣ам̣ парийа̄йа̄нанти еттха̄пи есева найо. чатуттхе магге ва̄ парийа̄йе ва̄ти ча татха̄ чха̄дента̄нам̣ чатуттхам̣ чха̄данамева вуттам̣. сесам̣ утта̄намева. махаллакавиха̄рата̄, аттано ва̄са̄га̄рата̄, уттари адхит̣т̣ха̄нанти има̄ни панеттха тӣн̣и ан̇га̄ни.

махаллакавиха̄расиккха̄падаван̣н̣ана̄ нит̣т̣хита̄.