10. саппа̄н̣акасиккха̄падаван̣н̣ана̄

140. дасаме имасса сиккха̄падасса ‘‘син̃чеййа ва̄ син̃ча̄пеййа ва̄’’ти ба̄хирапарибхогавасена пат̣хамам̣ пан̃н̃аттатта̄ ‘‘саппа̄н̣акам̣ удакам̣ парибхун̃джеййа̄’’ти сиккха̄падам̣ аттано наха̄напа̄на̄дипарибхогавасена пан̃н̃аттанти ведитаббам̣. тасмим̣ ва̄ пат̣хамам̣ пан̃н̃аттепи аттано парибхогавасенева пан̃н̃аттатта̄ пуна имам̣ сиккха̄падам̣ ба̄хирапарибхогавасенева пан̃н̃аттанти гахетаббам̣.

саппа̄н̣акасан̃н̃исса ‘‘парибхогена па̄н̣ака̄ мариссантӣ’’ти пуббабха̄ге джа̄нантассапи син̃чанасин̃ча̄панам̣ ‘‘падӣпе нипатитва̄ пат̣ан̇га̄дипа̄н̣ака̄ мариссантӣ’’ти джа̄нантасса падӣпуджджаланам̣ вийа вина̄пи вадхакачетана̄йа хотӣти а̄ха ‘‘пан̣н̣аттиваджджа’’нти. сесам̣ утта̄наттхамева. удакасса саппа̄н̣аката̄, ‘‘син̃чанена па̄н̣ака̄ мариссантӣ’’ти джа̄нанам̣, та̄дисамева ча удакам̣, вина̄ вадхакачетана̄йа кеначидева каран̣ӣйена тин̣а̄дӣнам̣ син̃чананти има̄ни панеттха чатта̄ри ан̇га̄ни.

саппа̄н̣акасиккха̄падаван̣н̣ана̄ нит̣т̣хита̄.

нит̣т̣хито сена̄санавагго дутийо.

бхӯтага̄мавагготипи имассева на̄мам̣.