3. уджджха̄панакасиккха̄падаван̣н̣ана̄

103. татийе дха̄тупа̄т̣хе джхе-саддо чинта̄йам̣ пат̣хитоти а̄ха ‘‘ла̄макато ва̄ чинта̄пентӣ’’тиа̄ди. айамева ча анекаттхатта̄ дха̄тӯнам̣ олоканаттхопи хотӣти дат̣т̣хаббам̣. ‘‘аккхара̄йа ва̄четӣ’’тиа̄дӣсу (па̄чи. 46) вийа ‘‘чханда̄йа̄’’ти лин̇гавипалла̄савасена вуттанти а̄ха ‘‘чхандена̄’’ти.

105. йена вачанена̄ти йена ‘‘чханда̄йа иттханна̄мо идам̣ на̄ма каротӣ’’тиа̄дивачанена. йена ча кхиййантӣти йена ‘‘чханда̄йа иттханна̄мо’’тиа̄дивачанена таттха таттха бхиккхӯнам̣ саванӯпача̄ре т̣хатва̄ аван̣н̣ам̣ пака̄сенти.

106. ан̃н̃ам̣ анупасампаннам̣ уджджха̄петӣти ан̃н̃ена анупасампаннена уджджха̄пети. тасса ва̄ там̣ сантике кхиййатӣти тасса анупасампаннасса сантике там̣ сан̇гхена самматам̣ упасампаннам̣ кхиййати, аван̣н̣ам̣ ваданто ва̄ пака̄сети. анупасампаннам̣ сан̇гхена самматанти еттха самматапуббо самматоти вутто. тена̄ха ‘‘кин̃ча̄пӣ’’тиа̄ди. йасма̄ уджджха̄панам̣ кхиййанан̃ча муса̄ва̄давасенева паваттам̣, тасма̄ а̄дикаммикасса ана̄паттӣти па̄читтийат̣т̣ха̄не дуккат̣ат̣т̣ха̄не ча имина̄ва ана̄паттидассанаттхам̣ вуттанти гахетаббам̣. еван̃ча катва̄ уджджха̄пентасса кхиййантасса ча екаккхан̣е две две а̄паттийо хонтӣти а̄паннам̣. атха ва̄ ӣдисам̣ сиккха̄падам̣ муса̄ва̄дато пат̣хамам̣ пан̃н̃аттанти гахетаббам̣. сесаметтха утта̄намева. дхаммакаммена самматата̄, упасампанната̄, агатигамана̄бха̄во, тасса аван̣н̣ака̄мата̄, йасса сантике вадати, тасса упасампанната̄, уджджха̄панам̣ ва̄ кхиййанам̣ ва̄ти има̄ни панеттха чха ан̇га̄ни.

уджджха̄панакасиккха̄падаван̣н̣ана̄ нит̣т̣хита̄.