2. ан̃н̃ава̄дакасиккха̄падаван̣н̣ана̄

94-98. дутийе ан̃н̃ам̣ вачананти йам̣ чодакена чудитакасса досавибха̄ванавачанам̣ вуттам̣, там̣ тато ан̃н̃енева вачанена пат̣ичарати. атха ва̄ ан̃н̃енан̃н̃ам̣ пат̣ичаратӣти ан̃н̃ена ка̄ран̣ена ан̃н̃ам̣ ка̄ран̣ам̣ пат̣ичаратӣти еваметтха аттхо ведитаббо, йам̣ чодакена чудитакасса досавибха̄ванака̄ран̣ам̣ вуттам̣, тато ан̃н̃ена чодана̄йа амӯлакабха̄вадӣпакена ка̄ран̣ена пат̣ичаратӣти вуттам̣ хоти. пат̣ичаратӣти ча пат̣иччха̄данавасена чарати, паваттатӣти аттхо. пат̣иччха̄данаттхо ева ва̄ чарати-саддо анекаттхатта̄ дха̄тӯнам̣. тена̄ха ‘‘пат̣иччха̄детӣ’’ти. ко а̄паннотиа̄дина̄ па̄л̣ийам̣ чоданам̣ ависсаджджетва̄ виккхепа̄паджджанавасена ан̃н̃ена ан̃н̃ам̣ пат̣ичаран̣ам̣ дасситам̣. апарампи пана чоданам̣ виссаджджетва̄ бахиддха̄ катха̄апана̄мавасена паваттам̣ па̄л̣имуттакам̣ ан̃н̃енан̃н̃ам̣ пат̣ичаран̣ам̣ ведитаббам̣. ‘‘иттханна̄мам̣ а̄паттим̣ а̄панносӣ’’ти пут̣т̣хо ‘‘па̄т̣алипуттам̣ гатомхӣ’’ти ватва̄ пуна ‘‘на тава па̄т̣алипуттагаманам̣ пуччха̄ма, а̄паттим̣ пуччха̄ма̄’’ти вутте ‘‘тато ра̄джагахам̣ гатомхӣ’’ти ватва̄ ‘‘ра̄джагахам̣ ва̄ йа̄хи бра̄хман̣агахам̣ ва̄, а̄паттим̣ а̄панносӣ’’ти вутте ‘‘таттха ме сӯкарамам̣сам̣ ладдха’’нтиа̄дӣни ватва̄ва катхам̣ бахиддха̄ виккхипантопи хи ‘‘ан̃н̃енан̃н̃ам̣ пат̣ичарати’’ччева сан̇кхам̣ гаччхати.

йадетам̣ ан̃н̃ена ан̃н̃ам̣ пат̣ичаран̣авасена паваттавачанам̣, тадева пуччхитаматтхам̣ т̣хапетва̄ ан̃н̃ам̣ вадатӣти ан̃н̃ава̄даканти а̄ха ‘‘ан̃н̃енан̃н̃ам̣ пат̣ичаран̣ассетам̣ на̄ма’’нти. тун̣хӣбхӯтассетам̣ на̄манти тун̣хӣбха̄вассетам̣ на̄мам̣, айамева ва̄ па̄т̣хо. ан̃н̃ава̄дакам̣ а̄ропетӯти ан̃н̃ава̄дакакаммам̣ а̄ропету, ан̃н̃ава̄дакаттам̣ ва̄ ида̄ни карийама̄нена каммена а̄ропетӯти аттхо. вихесакам̣ а̄ропетӯти еттха̄пи вихесакакаммам̣ вихесакабха̄вам̣ ва̄ а̄ропетӯти еваматтхо дат̣т̣хаббо.

ана̄ропите ан̃н̃ава̄даке вуттадуккат̣ам̣ па̄л̣ийам̣ а̄гатаан̃н̃енан̃н̃ам̣пат̣ичаран̣авасена йуджджати. ат̣т̣хакатха̄йам̣ а̄гатена пана па̄л̣имуттакаан̃н̃енан̃н̃ам̣пат̣ичаран̣авасена ана̄ропите ан̃н̃ава̄даке муса̄ва̄дена па̄читтийам̣, а̄ропите имина̄ва па̄читтийанти ведитаббам̣. кечи пана ‘‘а̄ропите ан̃н̃ава̄даке муса̄ва̄дена имина̄ ча па̄читтийадвайам̣ хотӣ’’ти ваданти, там̣ вӣмам̣ситва̄ гахетаббам̣. йа̄ са̄ а̄дикаммикасса ана̄патти вутта̄, са̄пи па̄л̣ийам̣ а̄гатаан̃н̃енан̃н̃ам̣пат̣ичаран̣авасена вутта̄ти дат̣т̣хабба̄, имина̄ сиккха̄падена ана̄паттидассанаттхам̣ ва̄. сесам̣ утта̄намева. дхаммакаммена а̄ропитата̄, а̄паттийа̄ ва̄ ваттхуна̄ ва̄ ануйун̃джийама̄ната̄, чха̄детука̄мата̄йа ан̃н̃енан̃н̃ам̣ пат̣ичаран̣ам̣ ва̄ тун̣хӣбха̄во ва̄ти има̄ни панеттха тӣн̣и ан̇га̄ни.

ан̃н̃ава̄дакасиккха̄падаван̣н̣ана̄ нит̣т̣хита̄.