4. падасодхаммасиккха̄падаван̣н̣ана̄

45. чатуттхе екатоти анупасампаннена саддхим̣. пуримабйан̃джанена садисам̣ паччха̄бйан̃джананти ‘‘рӯпам̣ аничча’’нти еттха аничча-саддена садисам̣ ‘‘ведана̄ аничча̄’’ти еттха аничча-саддам̣ вадати. аккхарасамӯхоти авибхаттико аккхарасамӯхо. аккхара̄нубйан̃джанасамӯхо паданти вибхаттиантам̣ падама̄ха. вибхаттиантамева падам̣ гахетва̄ ‘‘пат̣хамападам̣ падамева, дутийам̣ анупада’’нти вуттам̣.

екам̣ паданти га̄тха̄падам̣ сандха̄йа вадати. падаган̣ана̄йа̄ти га̄тха̄падаган̣ана̄йа. апа̄пун̣итва̄ти саддхим̣ акатхетва̄. рунти опа̄тетӣти еттха ануна̄сико а̄гамавасена вутто, сам̣йогапуббасса рассаттам̣ катанти ведитаббам̣. тена̄ха ‘‘рӯ-ка̄раматтамева̄’’ти. еттха ча ‘‘рӯпам̣ аниччанти бхан̣а са̄ман̣ера̄’’ти вуччама̄но саче рӯ-ка̄рам̣ аватва̄ ру-ити рассам̣ катва̄ вадати, ан̃н̃ам̣ бхан̣итам̣ на̄ма хоти, тасма̄ ана̄патти. еван̃ча катва̄ ‘‘ведана̄ аничча̄’’ти еттха̄пи аничча-саддаматтенева а̄патти хотӣти ведитаббам̣. еса найоти екамеваккхарам̣ ватва̄ т̣ха̄нам̣. ‘‘манопуббан̇гама̄ дхамма̄’’ти вуччама̄но хи ма-ка̄раматтамева ватва̄ тит̣т̣хати. ‘‘евам̣ ме сута’’нтиа̄дисуттам̣ бхан̣а̄пийама̄но е-ка̄рам̣ ватва̄ тит̣т̣хати че, анваккхарена па̄читтийам̣, апарипун̣н̣ападам̣ ватва̄ т̣хите анубйан̃джанена. падесу екам̣ пат̣хамападам̣ вираджджхати, дутийена анупадена па̄читтийам̣.

анан̇ган̣асуттам̣ (ма. ни. 1.57 а̄дайо) самма̄дит̣т̣хисуттам̣ (ма. ни. 1.89 а̄дайо) маха̄ведаллан̃ча (ма. ни. 1.449 а̄дайо) дхаммасена̄патина̄ бха̄ситам̣, анума̄насуттам̣ (ма. ни. 1.181 а̄дайо) маха̄моггалла̄наттхерена, чӯл̣аведалласуттам̣ (ма. ни. 1.460 а̄дайо) дхаммадинна̄йа тхерийа̄ бха̄ситам̣. паччекабуддхабха̄ситампи буддхабха̄ситейева сан̇гахам̣ гаччхати. ат̣т̣хакатха̄нисситоти пуббе магадхабха̄са̄йа вуттам̣ дхаммасан̇гаха̄рул̣хам̣ ат̣т̣хакатхам̣ сандха̄йа вадати. ида̄нипи ‘‘йатха̄пи дӣпико на̄ма, нилӣйитва̄ ган̣хате миге’’ти (ми. па. 6.1.5) евама̄дикам̣ сан̇гаха̄рул̣хам̣ ат̣т̣хакатха̄вачанам̣ гахетаббанти ваданти. па̄л̣инисситоти ‘‘маккат̣ӣ ваджджипутта̄ ча̄’’тиевама̄дина̄ (па̄ра̄. 66) па̄л̣ийам̣йева а̄гато. виват̣т̣ӯпанисситанти нибба̄нупанисситам̣. виват̣т̣анисситам̣ пана са̄ман̃н̃ато гахетаббанти а̄ха ‘‘кин̃ча̄пӣ’’тиа̄ди. тхерасса̄ти на̄гасенаттхерасса. маггакатха̄дӣни пакаран̣а̄ни. ‘‘аккхарена ва̄чети, аккхараккхаре а̄патти па̄читтийасса̄’’ти ваттаббе ‘‘аккхара̄йа ва̄чети, аккхараккхара̄йа а̄патти па̄читтийасса̄’’ти па̄л̣ийам̣ вуттам̣.

48. анупасампаннена саддхим̣ ган̣хантасса ана̄паттӣти анупасампаннена саха нисӣдитва̄ уддесам̣ ган̣хантасса ана̄патти вутта̄. дахарабхиккху нисинно…пе… бхан̣ато ана̄паттӣти еттха двӣсупи т̣хитесу нисиннесу ва̄ упасампаннасса бхан̣а̄мӣти бхан̣антасса ана̄паттийева. упача̄рам̣ мун̃читва̄ти парисапарийантато два̄дасахаттхам̣ мун̃читва̄. ‘‘нисинне ва̄чемӣ’’ти бхан̣антассапи упача̄рам̣ мун̃читва̄ нисиннатта̄ ана̄патти. саче пана дӯре нисиннампи ва̄чемӣти висум̣ саллаккхетва̄ бхан̣ати, а̄паттийева. еко па̄до на а̄гаччхатӣти пуббе пагун̣ойева паччха̄ асарантасса на а̄гаччхати, там̣ ‘‘евам̣ бхан̣а̄хӣ’’ти екато бхан̣антасса ана̄патти. опа̄тетӣти саддхим̣ катхети. сесаметтха утта̄намева. анупасампанната̄, вутталаккхан̣адхаммам̣ падасо ва̄чаната̄, екато бхан̣анан̃ча̄ти има̄неттха тӣн̣и ан̇га̄ни.

падасодхаммасиккха̄падаван̣н̣ана̄ нит̣т̣хита̄.