катхинабхедам̣
катхинааттхата̄диван̣н̣ана̄
404. катхине ана̄гатавасена̄ти удака̄харан̣а̄дипайоге уппанне паччха̄ дхована̄дипуббакаран̣асса уппаттито таппайогасса ана̄гатавасенева анантарапаччайо. паччайаттан̃часса ка̄рийабхӯтасса йасма̄ ниппха̄детаббатам̣ нисса̄йа паччайа̄ паватта̄, на вина̄ тена, тасма̄ тена парийа̄йена вуттам̣, на сабха̄вато саббаттха. тена̄ха ‘‘пайогасса хӣ’’тиа̄ди. таттха пайогасса саттавидхампи пуббакаран̣ам̣ паччайо хотӣти самбандхо. ка̄ран̣ама̄ха ‘‘йасма̄’’тиа̄ди. пуббакаран̣ассаттха̄йа̄ти пуббакаран̣асса ниппха̄данаттха̄йа. пуреджа̄тапаччайети пуреджа̄тапаччайасса висайе. еса̄ти пайого. дхована̄дидхаммесу екампи аттано пуреджа̄тапаччайабхӯтам̣ дхаммам̣ на лабхати, аттано уппаттито пуреджа̄тасса пуббакаран̣асса абха̄ва̄ти аттхо. лабхатӣти паччха̄джа̄тапаччайам̣ пуббакаран̣ам̣ лабхати, паччха̄джа̄тапаччайо хотӣти аттхо.
па̄л̣ийам̣ паннараса дхамма̄ сахаджа̄тапаччайена паччайоти еттха пуббакаран̣асса̄ти ва̄ пайогасса̄ти ва̄ ан̃н̃асса кассачи паччайуппаннасса апара̄мат̣т̣хатта̄ паннараса дхамма̄ сайам̣ ан̃н̃аман̃н̃асахаджа̄тапаччайена паччайоти еваматтхо гахетаббо, техи саха уппаджджанакасса ан̃н̃асса абха̄ва̄. евам̣ упари саббаттха. тена̄ха ‘‘сахаджа̄тапаччайам̣ пана̄’’тиа̄ди. ма̄тика̄ ча палибодха̄ ча̄ти еттха ча-саддена пан̃ча̄нисам̣са̄ни гахита̄нӣти дат̣т̣хаббам̣. евам̣ ма̄тика̄нан̃ча палибодха̄нан̃ча̄ти еттха̄пи. техипи аттхо анантарамева ма̄тика̄дӣхи саха джа̄йанти. тенева ‘‘паннараса дхамма̄ сахаджа̄тапаччайена паччайо’’ти вутта̄. а̄са̄ти чӣвара̄са̄. ваттхӯти а̄са̄йа нимиттабхӯтам̣ ануппанначӣварам̣. ‘‘дасса̄ма карисса̄ма̄’’ти хи да̄йакехи пат̣ин̃н̃а̄тачӣварам̣ нисса̄йа анантарам̣ уппаджджама̄на̄ чӣвара̄са̄ анантарапаччайа̄дибха̄вена вутта̄. а̄са̄нан̃ча ана̄са̄нан̃ча̄ти лаббхама̄накачӣваре уппаджджанакачӣвара̄са̄нан̃чева алаббхама̄не чӣваре уппаджджанакаана̄са̄нан̃ча, а̄са̄нам̣, таббигама̄нан̃ча̄ти аттхо. кхан̣е кхан̣е уппаттибхедам̣ сандха̄йа ‘‘а̄са̄на’’нти бахувачанам̣ катам̣, а̄са̄йа, ана̄са̄йа ча̄ти аттхо. тена̄ха ‘‘а̄са̄ ча ана̄са̄ ча̄’’ти.
катхинааттхата̄диван̣н̣ана̄ нит̣т̣хита̄.
пуббакаран̣анида̄на̄дивибха̄гаван̣н̣ана̄
406-7. чха чӣвара̄нӣти кхома̄дӣсу чхасу ан̃н̃атарам̣ сандха̄йа вуттам̣. саббасан̇га̄хикавасена пана ‘‘чӣвара̄нӣ’’ти бахувачанам̣ катам̣. па̄л̣ийам̣ панеттха ваттху, а̄са̄ ча ана̄са̄ ча̄тиа̄дӣсу аттхате катхине а̄нисам̣савасена уппаджджанакапачча̄са̄чӣварам̣ ‘‘ваттхӯ’’ти вуттам̣. катхиначӣварам̣ хетупаччайа-саддехи вуттанти ведитаббам̣.
408. паччуддха̄ро тӣхи дхаммехӣтиа̄ди катхинаттха̄раттха̄йа тичӣварато ан̃н̃ам̣ вассикаса̄т̣ика̄дим̣ паччуддхаритум̣, адхит̣т̣хахитва̄ аттхаритун̃ча на ват̣т̣атӣти дассанаттхам̣ вуттам̣. ‘‘вачӣбхедена̄’’ти етена кевалам̣ ка̄йена катхинаттха̄ро на рухатӣти дассети.
пуббакаран̣анида̄на̄дивибха̄гаван̣н̣ана̄ нит̣т̣хита̄.
катхина̄диджа̄нитаббавибха̄гаван̣н̣ана̄
412. йесу рӯпа̄дидхаммесӯти ‘‘пуримавассам̣вуттха̄ бхиккхӯ, пан̃чахи анӯно сан̇гхо, чӣварама̄со, дхаммена самена самуппаннам̣ чӣвара’’нти евама̄дӣсу йесу рӯпа̄рӯпадхаммесу. сатӣти сантесу. миссӣбха̄воти сам̣саггата̄ самӯхапан̃н̃аттиматтам̣. тена̄ха ‘‘на параматтхато еко дхаммо аттхӣ’’ти.
416. екато уппаджджантӣти катхинуддха̄рена саха уппаджджама̄на̄раха̄ хонтӣти аттхо. катхинаттха̄рато хи пабхути саббе катхинуддха̄ра̄ там̣ там̣ ка̄ран̣антарама̄гамма уппаджджанти, тасма̄ саббе екуппа̄да̄ на̄ма джа̄та̄. тесу антаруббха̄расахуббха̄ра̄ две ева там̣ виха̄рам̣ анаттхатакатхинавиха̄расадисам̣ каронта̄ сайам̣ сакалена катхинаттха̄рена саха нируджджханти уддха̄рабха̄вам̣ па̄пун̣анти. авасеса̄ пана там̣ там̣ па̄т̣ипуггаликамева катхинаттха̄рам̣ двиннам̣ палибодха̄нам̣ упаччхинданавасена ниродхента̄ сайам̣ уддха̄рабха̄вам̣ па̄пун̣анти, на сакалам̣ катхинаттха̄рам̣. катхинуддха̄ра̄нан̃ча ниродхо на̄ма там̣ там̣ ка̄ран̣ама̄гамма уддха̄рабха̄ваппатти, еван̃ча уппатти на̄ма катхинуддха̄ро ева. тена̄ха ‘‘саббепи аттха̄рена саддхим̣ екато уппаджджантӣ’’тиа̄ди. таттха пурима̄ двети ‘‘екуппа̄да̄ еканиродха̄’’ти па̄л̣ийам̣ пат̣хамам̣ вутта̄ антаруббха̄расахуббха̄ра̄ две. тесӯти паккаманантика̄дӣсу. уддха̄рабха̄вам̣ паттесӯти уддха̄рабха̄ваппаттисан̇кха̄таниродхам̣ паттесӯти аттхо. аттха̄ро тит̣т̣хатӣти катачӣварам̣ а̄да̄йа пакканта̄дипуггалам̣ т̣хапетва̄ тадавасеса̄нам̣ палибодхасаббха̄вато катхинаттха̄ро тит̣т̣хати.
катхина̄диджа̄нитаббавибха̄гаван̣н̣ана̄ нит̣т̣хита̄.
пан̃н̃аттиваггаван̣н̣ана̄найо нит̣т̣хито.