дутийага̄тха̄сан̇ган̣икам̣

чодана̄дипуччха̄виссаджджана̄ван̣н̣ана̄

359. дутийага̄тха̄сан̇ган̣ика̄йа ‘‘чодана̄ киматтха̄йа̄’’тиа̄дика̄ пуччха̄ упа̄литтхерена ката̄. ‘‘чодана̄ са̄ран̣аттха̄йа̄’’тиа̄дивиссаджджанам̣ бхагавата̄ вуттам̣. упа̄литтхеро сайамева пуччхитва̄ виссаджджанам̣ ака̄сӣтипи ваданти.

мантаггахан̣анти тесам̣ вича̄ран̣а̄гахан̣ам̣, суттантикаттхера̄нам̣, винайадхараттхера̄нан̃ча адхиппа̄йагахан̣анти аттхо. па̄т̣еккам̣ виниччхайасаннит̣т̣ха̄панаттханти тесам̣ паччекам̣ адхиппа̄йам̣ н̃атва̄ техи самут̣т̣ха̄питанайампи гахетва̄ виниччхайапарийоса̄панаттханти адхиппа̄йо.

‘‘ма̄ кхо турито абхан̣ӣ’’тиа̄дина̄ абхимукхе т̣хитам̣ кан̃чи анувиджджакам̣ овадантена вийа тхерена анувиджджакаваттам̣ катхитам̣.

ануйун̃джанаваттанти ануйуджджанаккамам̣, там̣ пана йасма̄ саббасиккха̄падавӣтиккамависайепи там̣там̣сиккха̄пада̄нуломена каттаббам̣, тасма̄ ‘‘сиккха̄пада̄нуломика’’нти вуттам̣. аттано гатим̣ на̄сетӣти аттано сугатигаманам̣ вина̄сети.

анусандхита-саддо бха̄васа̄дханоти а̄ха ‘‘анусандхитанти катха̄нусандхӣ’’ти. ватта̄нусандхитена̄ти еттха̄пи есева найо. ватта̄нусандхитена̄ти а̄ча̄ра̄нусандхина̄, а̄ча̄рена саддхим̣ саментийа̄ пат̣ин̃н̃а̄йа̄ти аттхо. тена̄ха ‘‘йа̄ асса ваттена̄’’тиа̄ди.

па̄л̣ийам̣ сан̃чичча а̄паттинтиа̄ди аладжджиладжджилаккхан̣ам̣ бхиккхубхиккхунӣнам̣ васена вуттам̣ тесан̃н̃ева саббаппака̄рато сиккха̄пада̄дхика̄ратта̄. са̄ман̣ера̄дӣнампи са̄дха̄ран̣авасена пана сан̃чичча йатха̄сакам̣ сиккха̄падавӣтиккамана̄дикам̣ аладжджиладжджилаккхан̣ам̣ ведитаббам̣.

катха̄нусандхивачананти чудитакаанувиджджака̄нам̣ катха̄йа анусандхийуттам̣ вачанам̣ на джа̄на̄ти, техи екасмим̣ ка̄ран̣е вутте сайам̣ там̣ асаллаккхетва̄ аттано абхиручитамева асамбандхитаттханти аттхо. виниччхайа̄нусандхивачанан̃ча̄ти анувиджджакена катасса а̄патта̄на̄паттивиниччхайасса анугун̣ам̣, самбандхавачанан̃ча.

чодана̄дипуччха̄виссаджджана̄ван̣н̣ана̄ нит̣т̣хита̄.