2. ган̣абходжанасиккха̄падаван̣н̣ана̄

209. дутийе абхима̄рети абхибхавитва̄ бхагавантам̣ ма̄ран̣аттха̄йа пайоджите дханудхаре. нану ‘‘ра̄джа̄нампи ма̄ра̄песӣ’’ти вачанато идам̣ сиккха̄падам̣ аджа̄тасаттуно ка̄ле пан̃н̃аттанти сиддхам̣, еван̃ча сати па̄л̣ийам̣ ‘‘тена кхо пана самайена ран̃н̃о ма̄гадхасса…пе… н̃а̄тиса̄лохито а̄джӣвакесу паббаджито хоти…пе… бимбиса̄рам̣ етадавоча̄’’тиа̄ди вируджджхатӣти? на вируджджхати. со кира а̄джӣвако бимбиса̄рака̄лато пабхути антарантара̄ бхиккхӯ нимантетва̄ да̄нам̣ денто аджа̄тасаттука̄лепи сиккха̄паде пан̃н̃аттепи бхиккхӯнам̣ сантике дӯтам̣ па̄хеси, бхиккхӯ ча куккучча̄йанта̄ нива̄ресум̣. тасма̄ а̄дито пат̣т̣ха̄йа там̣ ваттху дасситанти ведитаббам̣.

215. ан̃н̃аман̃н̃ам̣ висадисам̣ раджджам̣ вираджджам̣, вираджджато а̄гата̄ вераджджака̄. те ча йасма̄ джа̄тиготта̄дито на̄на̄видха̄, тасма̄ на̄на̄вераджджакетипи аттхо.

217-8. имасса сиккха̄падасса ваттхувасенева вин̃н̃аттито ган̣абходжанаттхата̄ сиддха̄ти там̣ аватва̄ падабха̄джане асиддхамева нимантанато ган̣абходжанам̣ дасситанти ведитаббам̣. тена̄ха ‘‘двӣха̄ка̄рехӣ’’тиа̄ди. ‘‘йена кеначи вевачанена̄’’ти вуттатта̄ ‘‘бходжанам̣ ган̣хатха̄’’тиа̄диса̄ман̃н̃ана̄мена̄пи ган̣абходжанам̣ хоти. йам̣ пана па̄л̣ийам̣ аддха̄нагамана̄диваттхӯсу ‘‘идхева бхун̃джатха̄’’ти вуттавачанасса куккучча̄йанам̣, тампи одана̄дина̄мам̣ гахетва̄ вуттатта̄ ева катанти ведитаббам̣. екато ган̣хантӣти ан̃н̃аман̃н̃асса два̄дасахаттхам̣ амун̃читва̄ екато т̣хатва̄ ган̣ханти.

‘‘амха̄кам̣ чатуннампи бхаттам̣ дехӣ’’ти вуттатта̄ па̄л̣и (ван̣н̣ана̄) йам̣ ‘‘твам̣ екасса бхиккхуно бхаттам̣ дехӣ’’тиа̄дино вуттатта̄ ча бходжанана̄мена вин̃н̃аттамева ган̣абходжанам̣ хоти, тан̃ча ан̃н̃ена вин̃н̃аттампи екато ган̣ханта̄нам̣ саббесампи хотӣти дат̣т̣хаббам̣. висум̣ гахитам̣ пана вин̃н̃аттам̣ бхун̃джато пан̣ӣтабходжана̄дисиккха̄падехи а̄патти ева.

а̄гантукапат̣т̣анти аччхиндитва̄ анва̄дхим̣ а̄ропетва̄ каран̣ачӣварам̣ сандха̄йа вуттам̣. т̣хапетӣти екам̣ антам̣ чӣваре бандханавасена т̣хапети. пачча̄гатам̣ сиббатӣти тассева дутийаантам̣ париваттитва̄ а̄хатам̣ сиббати. а̄гантукапат̣т̣ам̣ бандхатӣти чӣварена лаггам̣ каронто пунаппунам̣ таттха таттха суттена бандхати. гхат̣т̣етӣти пама̄н̣ена гахетва̄ дан̣д̣а̄дӣхи гхат̣т̣ети. суттам̣ каротӣти гун̣а̄дибха̄вена ват̣т̣ети. валетӣти анекагун̣асуттам̣ хаттхена ва̄ чаккадан̣д̣ена ва̄ ват̣т̣ети екаттам̣ кароти. париваттанам̣ каротӣти париваттанадан̣д̣айантакам̣ кароти, йасмим̣ суттагул̣ам̣ павесетва̄ вел̣уна̄л̣ика̄дӣсу т̣хапетва̄ париббхама̄петва̄ суттакот̣ито пат̣т̣ха̄йа а̄кад̣д̣ханти.

220. анимантитачатуттханти анимантито чатуттхо йасса бхиккхучатуккасса, там̣ анимантитачатуттхам̣. евам̣ сесесупи. тена̄ха ‘‘пан̃чаннам̣ чатукка̄на’’нти. сампавесетва̄ти техи йоджетва̄. ган̣о бхиджджатӣти нимантитасан̇гхо на хотӣти аттхо.

адхива̄сетва̄ гатесӯти еттха акаппийанимантана̄дхива̄санаккхан̣е пуббапайоге дуккат̣ампи наттхи, вин̃н̃аттито пасаване пана вин̃н̃аттиккхан̣е итарасиккха̄падехи дуккат̣ам̣ хотӣти гахетаббам̣. нимантанам̣ са̄дийатха̄ти нимантанабхаттам̣ пат̣игган̣хатха. та̄ни ча̄ти кумма̄са̄дӣни ча техи бхиккхӯхи екена паччха̄ гахитатта̄ екато на гахита̄ни.

‘‘бхаттуддесакена пан̣д̣итена бхавитаббам̣…пе… мочетабба̄’’ти етена бхаттуддесакена акаппийанимантане са̄дите саббесампи са̄дитам̣ хоти. екато ган̣ханта̄нам̣ ган̣абходжана̄патти ча хотӣти дассети. дӯтасса два̄ре а̄гантва̄ пуна ‘‘бхаттам̣ ган̣хатха̄’’ти вачанабхайена ‘‘га̄мадва̄ре ат̣т̣хатва̄’’ти вуттам̣. ган̣абходжаната̄, самайа̄бха̄во, аджджхохаран̣анти има̄неттха тӣн̣и ан̇га̄ни.

ган̣абходжанасиккха̄падаван̣н̣ана̄ нит̣т̣хита̄.