2. ан̃н̃ава̄дакасиккха̄падаван̣н̣ана̄

94. дутийе ан̃н̃ам̣ вачананти йам̣ досавибха̄ванаттхам̣ парехи вуттавачанам̣ там̣ тасса анануччхавикена ан̃н̃ена вачанена пат̣ичарати.

98. йадетам̣ ан̃н̃енан̃н̃ам̣ пат̣ичаран̣авасена паваттавачанам̣, тадева пуччхитаматтхам̣ т̣хапетва̄ ан̃н̃ам̣ вадати пака̄сетӣти ан̃н̃ава̄даканти а̄ха ‘‘ан̃н̃енан̃н̃ам̣ пат̣ичаран̣ассетам̣ на̄ма’’нти. тун̣хӣбхӯтассетам̣ на̄манти тун̣хӣбха̄вассетам̣ на̄мам̣, айамева ва̄ па̄т̣хо. ан̃н̃ава̄дакам̣ а̄ропетунти ан̃н̃ава̄де а̄ропетум̣. вихесаканти вихесакаттам̣.

99. па̄л̣ийам̣ на уггха̄т̣етука̄моти пат̣иччха̄детука̄мо.

100. ана̄ропите ан̃н̃ава̄дакети вуттадуккат̣ам̣ па̄л̣ийам̣ а̄гатаан̃н̃енан̃н̃апат̣ичаран̣авасена йуджджати, ат̣т̣хакатха̄йам̣ а̄гатанайена пана муса̄ва̄дена ан̃н̃енан̃н̃ам̣ пат̣ичарантасса па̄читтийена саддхим̣ дуккат̣ам̣, а̄ропите имина̄ва па̄читтийам̣. кечи пана ‘‘муса̄ва̄дапа̄читтийена саддхим̣ па̄читтийадвайа’’нти ваданти, вӣмам̣ситаббам̣. а̄дикаммикассапи муса̄ва̄де имина̄ва ана̄паттӣти дат̣т̣хаббам̣. дхаммакаммена а̄ропитата̄, а̄паттийа̄ ва̄ ваттхуна̄ ва̄ ануйун̃джийама̄ната̄, чха̄детука̄мата̄йа ан̃н̃енан̃н̃ам̣ пат̣ичаран̣ам̣, тун̣хӣбха̄во ча̄ти има̄неттха тӣн̣и ан̇га̄ни.

ан̃н̃ава̄дакасиккха̄падаван̣н̣ана̄ нит̣т̣хита̄.