10. патхавӣкхан̣анасиккха̄падаван̣н̣ана̄

86. дасаме аппапам̣суматтика̄йа патхавийа̄ ана̄паттиваттхубха̄вена вуттатта̄ упад̣д̣хапам̣суматтика̄йапи па̄читтийамева̄ти гахетаббам̣. на хетам̣ дуккат̣аваттхӯти сакка̄ ваттум̣ джа̄та̄джа̄тавинимутта̄йа татийапатхавийа̄ абха̄вато.

ват̣т̣атӣти имасмим̣ т̣ха̄не поккхаран̣им̣ кхан̣а̄ти ока̄сасса анийамитатта̄ ват̣т̣ати. имам̣ валлим̣ кхан̣а̄ти патхавӣкхан̣анам̣ сандха̄йа вуттатта̄ имина̄ва сиккха̄падена а̄патти, на бхӯтага̄масиккха̄падена. убхайампи сандха̄йа вутте пана двепи па̄читтийа̄ хонти. удакапаппат̣акоти удаке антобхӯмийам̣ павит̣т̣хе тасса упарибха̄гам̣ чха̄детва̄ танукапам̣су ва̄ маттика̄ ва̄ пат̣алам̣ хутва̄ патама̄на̄ тит̣т̣хати, тасмим̣ удаке суккхепи там̣ пат̣алам̣ ва̄тена чалама̄на̄ тит̣т̣хати, там̣ удакапаппат̣ако на̄ма.

акатапаббха̄рети авал̣ан̃джанат̣т̣ха̄надассанаттхам̣ вуттам̣. та̄дисе ева хи ваммикасса самбхавоти. мӯсикуккарам̣ на̄ма мӯсика̄хи кханитва̄ бахи катапам̣сура̄си. аччхаданантиа̄дивуттатта̄ уджукам̣ а̄ка̄сато патитавассодакена оват̣т̣хамева джа̄тапатхавӣ хоти, на чхадана̄дӣсу патитва̄ тато паваттаудакена тинтанти ведитаббам̣. ман̣д̣апаттхамбханти са̄кха̄ман̣д̣апаттхамбхам̣. учча̄летва̄ти уккхипитва̄. татоти пура̄н̣асена̄санато.

88. маха̄маттиканти бхиттилепанам̣. джа̄тапатхавита̄, татха̄сан̃н̃ита̄, кхан̣анакхан̣а̄пана̄нам̣ ан̃н̃атаранти има̄неттха тӣн̣и ан̇га̄ни.

патхавӣкхан̣анасиккха̄падаван̣н̣ана̄ нит̣т̣хита̄.

нит̣т̣хито муса̄ва̄давагго пат̣хамо.