1. каммаккхандхакаван̣н̣ана̄

адхаммакаммадва̄дасакакатха̄ван̣н̣ана̄

4. асаммукха̄ катам̣ хотӣтиа̄дайо тика̄ кевалам̣ десана̄маттамева. на хи тӣхи ева ан̇гехи самодха̄нехи адхаммакаммам̣ хоти, екенапи хоти ева, айаматтхо ‘‘тин̣н̣ам̣, бхиккхаве’’тиа̄дипа̄л̣ийа̄ (чӯл̣ава. 6) са̄дхетаббо. ‘‘аппат̣ин̃н̃а̄йа катам̣ хотӣ’’ти ладжджим̣ сандха̄йа вуттам̣. кан̣хапаккхе ‘‘адесана̄га̄минийа̄ а̄паттийа̄ катам̣ хотӣ’’ти суккапаккхе ‘‘десана̄га̄минийа̄ а̄паттийа̄ катам̣ хотӣ’’ти идам̣ двайам̣ парато ‘‘тӣхи, бхиккхаве, ан̇гехи саманна̄гатасса бхиккхуно а̄кан̇кхама̄но сан̇гхо таджджанӣйакаммам̣ кареййа. адхисӣле сӣлавипанно хотӣ’’ти имина̄ вируджджхати, адесана̄га̄миним̣ а̄панно хи ‘‘адхисӣле сӣлавипанно’’ти вуччатӣти. йуттаметам̣, катту адхиппа̄йо еттха чинтетаббо. еттха̄ха упатиссаттхеро ‘‘таджджанӣйакаммасса хи висесена бхан̣д̣анака̄ракаттам̣ ан̇га’нти ат̣т̣хакатха̄йам̣ вуттам̣, там̣ па̄л̣ийа̄ а̄гатанида̄нена йуджджати, тасма̄ саббаттикесупи бхан̣д̣анам̣ а̄ропетва̄ бхан̣д̣анапаччайа̄ а̄панна̄паттивасена идам̣ каммам̣ ка̄таббам̣, тасма̄ ‘адхисӣле сӣлавипанно’ти еттха̄пи пуббабха̄ге ва̄ апарабха̄ге ва̄ чодана̄са̄ран̣а̄дика̄ле бхан̣д̣анапаччайа̄ а̄панна̄паттивасенева ка̄ретаббам̣, на кевалам̣ сан̇гха̄дисесапаччайа̄ ка̄табба’’нти. ‘‘адесана̄га̄минийа̄ а̄паттийа̄ти па̄ра̄джика̄паттийа̄’ти еттакаматтам̣ ватва̄ парато ‘адхисӣле па̄ра̄джикасан̇гха̄дисесе аджджха̄ча̄ра̄’ти пора̄н̣аган̣т̣хипаде вутта’’нти ликхитам̣. ‘‘адхисӣле сӣлавипанно’ти сан̇гха̄дисесам̣ сандха̄йа̄’’ти ган̣т̣хипаде ликхитам̣. идам̣ пора̄н̣аган̣т̣хипаде пуримавачанена самети, тасма̄ таттха паччхимам̣ па̄ра̄джикападам̣ аттхуддха̄равасена вуттам̣ сийа̄, ат̣т̣хакатха̄йан̃ча ‘‘адесана̄га̄минийа̄ти па̄ра̄джика̄паттийа̄ ва̄ сан̇гха̄дисеса̄паттийа̄ ва̄’’ти вуттам̣, таттха па̄ра̄джика̄патти аттхуддха̄равасена вутта̄ сийа̄. йато ган̣т̣хипаде ‘‘адхисӣле сӣлавипанно’ти сан̇гха̄дисесам̣ сандха̄йа̄’’ти еттакамева ликхитам̣, тасма̄ саббаттха ган̣т̣хипаде сакалена найена па̄ра̄джика̄паттипаччайа̄ уппаннабхан̣д̣анахету на таджджанӣйакаммам̣ ка̄таббам̣ пайоджана̄бха̄ва̄, сан̇гха̄дисесапаччайа̄ ка̄таббанти айаматтхо сиддхо хоти. на, суккапаккхе ‘‘десана̄га̄минийа̄ а̄паттийа̄ катам̣ хотӣ’’ти (чӯл̣ава. 5) вачанатоти че? на, екена парийа̄йена сан̇гха̄дисесассапи десана̄га̄минивоха̄расамбхавато,

йена каммена сантаджджанам̣ карӣйати, там̣ таджджанӣйакаммам̣ на̄ма. йена каммена нисса̄йа те ваттхаббанти ниссийати бхаджа̄пийати нийассо, там̣ нийасакаммам̣ на̄ма. йена тато а̄ва̄сато, га̄мато ча пабба̄дженти куладӯсакам̣, там̣ пабба̄джанӣйакаммам̣ на̄ма. йена каммена аккут̣т̣хагахат̣т̣хасамаӣпамева пат̣иса̄рийати со аккосако паччха̄ песийати, там̣ пат̣иса̄ран̣ӣйакаммам̣ на̄ма. йена сама̄насам̣ва̄сакабхӯмито уккхипийати. чхад̣д̣ӣйати са̄тиса̄ро бхиккхусан̇гхена, там̣ каммам̣ уккхепанӣйакаммам̣ на̄ма̄ти ведитаббам̣.

11. ‘‘нисса̄йа те ваттхабба’’нти гаруниссайам̣ сандха̄йа вуттам̣, на итаранти.

21. ассаджипунаббасукаваттхусмим̣ ‘‘тесу виббхантесупи каммам̣ пат̣иппассамбхетум̣ анун̃н̃а̄тампи самма̄ваттанта̄нам̣йева̄’’ти ликхитам̣. саммукха̄ вуттамева гихипат̣исам̣йуттам̣ на̄ма. параммукха̄ вуттам̣ десанам̣ гаччхати.

41. кхама̄пентена ‘‘кхама̄хӣ’’ти ваттаббаматтамева, на уккут̣ика̄диса̄мӣчина̄ пайоджананти. анудӯтанти саха̄йанти аттхо.

50. адассанейева уккхепанӣйам̣ ка̄таббам̣, на ан̃н̃атха̄. ‘‘таджджанӣйа̄дикаран̣ака̄ле а̄паттим̣ ропетва̄ тасса̄ адассане, аппат̣икамме ва̄ бхан̣д̣анака̄рака̄диан̇гехи ка̄табба’’нти ликхитам̣.

таджджанӣйакамма̄дӣсу айам̣ пакин̣н̣акавиниччхайоти ведитаббо. ким̣ таджджанӣйакаммам̣, таджджанӣйакаммасса ким̣ мӯлам̣, ким̣ ваттху, ким̣ парийоса̄нам̣, касма̄ ‘‘таджджанӣйакамма’’нти вуччатӣти? ким̣ таджджанӣйакамманти ваттхусмим̣ сати каран̣асампатти. таджджанӣйакаммасса ким̣ мӯланти сан̇гхо мӯлам̣. таджджанӣйакаммасса ким̣ ваттхӯти калахаджа̄та̄паттиваттху. ким̣ парийоса̄нанти бха̄вана̄парийоса̄нам̣. касма̄ таджджанӣйакамманти вуччатӣти сан̇гхо калахака̄ракапуггалам̣ калахе ча бхеде ча бхайам̣ дассетва̄ кхантийа̄ джанети, упасаме джанети, тасма̄ ‘‘таджджанӣйакамма’’нти вуччати. катхам̣ таджджанӣйакаммам̣ катам̣ хоти, катхам̣ акатам̣. кинти ча таджджанӣйакаммам̣ катам̣ хоти, кинти ча акатам̣. кена ча таджджанӣйакаммам̣ катам̣ хоти, кена ча акатам̣. каттха ча таджджанӣйакаммам̣ катам̣ хоти, каттха ча акатам̣. ка̄йа вела̄йа таджджанӣйакаммам̣ катам̣ хоти, ка̄йа вела̄йа акатам̣ хоти? катхам̣ таджджанӣйакаммам̣ катам̣ хотӣти самаггена сан̇гхена н̃аттичатуттхена каммена. катхам̣ акатам̣ хотӣти ваггена сан̇гхена н̃аттичатуттхена каммена. кинти ча катам̣ хотӣти каран̣асампаттийа̄. кинти ча акатам̣ хотӣти каран̣авипаттийа̄. кена ча катам̣ хотӣти сан̇гхена. кена ча акатам̣ хотӣти ган̣ена пуггалена. каттха ча катам̣ хотӣти йасса пуггаласса сан̇гхо таджджанӣйакаммам̣ кароти, тасса пуггаласса саммукхӣбхӯте. каттха ча акатам̣ хотӣти йасса пуггаласса сан̇гхо таджджанӣйакаммам̣ кароти, тасса пуггаласса асаммукхӣбхӯте. ка̄йа вела̄йа катам̣ хотӣти йада̄ калахаджа̄та̄патти сам̣виджджати. ка̄йа вела̄йа акатам̣ хотӣти йада̄ калахаджа̄та̄патти на сам̣виджджати. катиха̄ка̄рехи таджджанӣйакаммасса паттакаллам̣ хоти, катиха̄ка̄рехи апаттакаллам̣? саттаха̄ка̄рехи таджджанӣйакаммасса паттакаллам̣ хоти, саттаха̄ка̄рехи апаттакаллам̣. катамехи саттаха̄ка̄рехи паттакаллам̣, катамехи саттаха̄ка̄рехи апаттакаллам̣ хоти? калахаджа̄та̄патти на сам̣виджджати, со ва̄ пуггало асаммукхӣбхӯто хоти, сан̇гхо ва̄ вагго хоти, асам̣ва̄сико ва̄ пуггало тассам̣ париса̄йам̣ сам̣виджджати, ачодито ва̄ хоти аса̄рито ва̄, а̄паттим̣ ва̄ ана̄ропито. имехи саттаха̄ка̄рехи таджджанӣйакаммасса апаттакаллам̣ хоти, итарехи саттаха̄ка̄рехи паттакаллам̣ хоти. евам̣ сесакаммесӯти.

каммаккхандхакаван̣н̣ана̄ нит̣т̣хита̄.