2. ган̣абходжанасиккха̄падаван̣н̣ана̄

209-218. гул̣хапат̣иччханноти апа̄кат̣ова. еко путтена̄ти екассекам̣ бхаттам̣ ‘‘ахам̣ ан̃н̃ена нимантито’’ти на вуччати. ‘‘саче екато ган̣ханти , ган̣абходжанам̣ хотӣ’’ти (па̄чи. ат̣т̣ха. 217-218) вуттатта̄ чатта̄ро упа̄сака̄ чатта̄ро бхиккхӯ висум̣ висум̣ нимантетва̄ хаттхапа̄се т̣хита̄нам̣ че денти, ган̣абходжанам̣ хоти ева̄ти еке, там̣ на йуттам̣ вийа. ‘‘вин̃н̃аттито пасаване ган̣асса екато гахан̣е имина̄ сиккха̄падена а̄патти, висум̣ гахан̣е пан̣ӣтабходжанасӯподанавин̃н̃аттӣхӣ’’ти ликхитам̣. ‘‘вин̃н̃аттито пасаванам̣ ат̣т̣хуппаттивасена ат̣т̣хакатха̄йам̣ анун̃н̃а̄там̣. сӯподана̄дивасена таттха а̄патти ева̄’’ти вуттам̣, там̣ на йуттам̣. касма̄? парива̄ре (пари. 168) ева двиннам̣ а̄ка̄ра̄нам̣ а̄гататта̄, тасма̄ ат̣т̣хакатха̄йам̣ ‘‘анун̃н̃а̄та’’нти дувуттам̣. ат̣т̣хуппаттийам̣йева па̄кат̣анти ‘‘падабха̄джане на вутта’’нти ваттаббам̣. екато ган̣хантӣти гахитабхатта̄пи ан̃н̃е йа̄ва ган̣ханти, та̄ва че тит̣т̣ханти, екато ган̣хантийева на̄ма. ‘‘гаччхати че, ана̄паттӣ’’ти ваданти.

еттха̄ха – ‘‘пат̣иггахан̣амева хеттха пама̄н̣а’’нти вуттам̣, атха касма̄ па̄л̣ийам̣ ‘‘ган̣абходжанам̣ на̄ма йаттха чатта̄ро…пе… бхун̃джанти, етам̣ ган̣абходжанам̣ на̄ма̄’’ти (па̄чи. 218) вуттанти? вуччати – йаттха̄ти упайогаттхе бхуммавачанам̣. чатта̄роти ган̣асса хет̣т̣химапариччхеданидассанам̣. пан̃чаннам̣ бходжана̄нанти а̄паттиппахонакабходжананидассанам̣. ан̃н̃атарена бходжанена нимантита̄ти акаппийанимантананидассанам̣. нимантанавасенева пана ган̣абходжанасса вуттатта̄ ‘‘нимантита̄ бхун̃джантӣти вутта’’нти вуттам̣. ‘‘ан̃н̃атарам̣ бходжанам̣ вин̃н̃а̄петва̄ бхун̃джантӣ’’ти пана на вуттам̣ ат̣т̣хуппаттийам̣йева па̄кат̣атта̄. йам̣ бхун̃джантӣти евам̣ самбандхо ведитаббо. таттха бхун̃джантӣти пат̣игга̄хаканийамавачанам̣. на хи аппат̣иггахитакам̣ бхиккхӯ бхун̃джанти. идам̣ вуттам̣ хоти ‘‘ган̣асса йато пат̣иггахита̄ха̄рабходжанахету па̄читтийа’’нти. а̄гантукапат̣т̣ам̣ могхасуттена сиббитва̄ т̣хапенти, таттха анува̄те йатха̄ екаталам̣ хоти, татха̄ хаттхехи гхат̣т̣ети. валетӣти а̄ват̣т̣ети. париваттананти суттам̣ ган̣ханта̄нам̣ сукхаггахан̣аттхам̣ суттапариваттанам̣ кароти, пат̣т̣ам̣ сиббанта̄нам̣ сукхасиббанаттхам̣ пат̣т̣апариваттанан̃ча. навачӣварака̄рако идха̄дхиппето, на итароти. ‘‘бимбиса̄рам̣ а̄пуччхитва̄ самбха̄ре кайирама̄нейева ка̄ла̄ атикканта̄, паччха̄ ган̣абходжанасиккха̄паде пан̃н̃атте бхагавантам̣ упасан̇камитва̄ пуччхӣ’’ти ваданти, ан̃н̃атха̄ ат̣т̣хакатха̄йа вируджджханато.

220. ‘‘две тайо екатоти йепи акаппийанимантанам̣ са̄дийитва̄’’тиа̄дивачанена акаппийанимантанапаччайа̄ ева ана̄патти, вин̃н̃аттито а̄паттийева̄ти дӣпети. анимантито чатуттхо йасса тадетам̣ анимантитачатуттхам̣. еса найо саббаттха. павесетва̄ти нисӣда̄петва̄. чӣварада̄насамайаладдхакачатуккам̣ чӣварака̄расамайаладдхакачатукканти евама̄дӣни. та̄ни ча̄ти йехи бходжанехи висан̇кето наттхи, та̄ни. маха̄тхерети упасампанне. ат̣т̣хатва̄ти т̣хитена нимиттам̣ дасситам̣ хоти. таттха таттха гантва̄ти ратхика̄дӣсу бхиккхусамӣпе гантва̄. имасмим̣ пана сиккха̄паде каттхачи поттхаке ‘‘ануджа̄на̄ми, бхиккхаве, чӣварада̄насамайе ган̣абходжанам̣ бхун̃джитум̣. еван̃чидам̣ бхагавата̄ бхиккхӯна’’нти па̄т̣хо диссати. каттхачи ‘‘бхун̃джиту’’нти ватва̄ ‘‘еван̃ча пана, бхиккхаве, имам̣ сиккха̄падам̣ уддисеййа̄тха̄’’ти па̄т̣хо, айам̣ собхано.

ган̣абходжанасиккха̄падаван̣н̣ана̄ нит̣т̣хита̄.