7. сам̣видха̄насиккха̄падаван̣н̣ана̄

181. та̄ бхиккхунийо дӯсайим̣сӯти випарин̣а̄мо ка̄таббо.

182-4. сампадантӣти падаса̄ гаччханти. вуттанайенева̄ти ‘‘сампатанти еттха̄ти сампа̄то’’тиа̄дина̄. падагате упача̄ро на лаббхати, ачча̄саннатта̄ миссам̣ вийа хотӣти. куккут̣авасситапариччхинно маха̄ат̣т̣хакатха̄йам̣. ‘‘тампи воха̄рена̄’’ти ликхитам̣. ‘‘йебхуййена татха̄ саннивесо хотӣти катва̄ ат̣т̣хакатха̄йам̣ вуттам̣, тасма̄ на пама̄далекхо’’ти ча, ‘‘уккат̣т̣хапариччхедена вуттам̣ ат̣т̣хакатха̄йам̣, тато уддхам̣ аддхайоджаналаккхан̣асампаттам̣ на̄ма хотӣти гахетабба’’нти ча вуттам̣. ‘‘каппийабхӯми кира̄йам̣…пе… на вадантӣ’’ти вуттам̣. дуддасан̃хеттха ка̄ран̣ам̣. катарам̣ пана танти? ‘‘гаччха̄ма̄ти сам̣видахати, а̄патти дуккат̣асса̄’’ти вуттам̣. таттха ‘‘гаччха̄ма̄’’ти ваттама̄навачанантан̃ча, амагге бхиккхунупассайа̄димхи на самбхаватийева манусса̄нам̣ антарагхара̄димхи маггасан̇кхепагаманато, учча̄сайана̄диуппаттит̣т̣ха̄натта̄ ча. на титтхийасеййа̄йа ва̄ паббаджита̄ва̄сатта̄. два̄рети самӣпаттхе бхуммам̣, тасма̄ там̣ дассетум̣ пуна ‘‘ратхика̄йа̄’’ти а̄ха. сесаат̣т̣хакатха̄йам̣ ‘‘еттхантаре сам̣видахитепи бхиккхуно дуккат̣а’’нти а̄гататта̄ на самети. ‘‘га̄мантаре’’ти вачанато ан̃н̃ага̄масса упача̄роккамане ева а̄патти. ‘‘аддхайоджане’’ти вачанато атиккаманейева йуттам̣.

185. рат̣т̣хабхедети вилопе. пора̄н̣аган̣т̣хипаде ‘‘тайопи сан̇кета̄ ка̄ладивасамаггавасена, таттха паччхименева а̄паттӣ’’ти вуттам̣. ‘‘имина̄ маггена̄’’ти виссаджджетва̄ ан̃н̃ена гаччханти че, а̄паттийева̄ти аттхо.

сам̣видха̄насиккха̄падаван̣н̣ана̄ нит̣т̣хита̄.