5. пат̣хамасахасеййасиккха̄падаван̣н̣ана̄

50. ‘‘на сахасеййам̣ каппетабба’’нти бха̄вавасена вуттам̣, кесучи ‘‘на сахасеййа̄ каппетабба̄’’ти па̄т̣хо, на каппетабба̄ бхиккхуна̄ти пан̃н̃аттанти адхиппа̄йо. ‘‘апассенам̣ ва̄ти ва̄йимаман̃чакамева хотӣ’’ти ликхитам̣. йам̣ етесам̣ на каппати, там̣ тесампӣти упаджджха̄йа̄дӣнам̣ сантикам̣ агантва̄ сахасеййам̣ каппеййа̄ти па̄т̣хасесо.

52. ‘‘анупасампанно на̄ма бхиккхум̣ т̣хапетва̄ авасесо’ти вуттатта̄ ма̄туга̄мо анупасампанноти чатуттхараттийам̣ ма̄туга̄мо двепи сахасеййа̄паттийо джанетӣти апаре’’ти вуттам̣, ‘‘бхиккхум̣ т̣хапетва̄…пе… панноти па̄ра̄джикаваттхубхӯто тираччха̄напурисо адхиппето’’ти ча, убхайампи вӣмам̣ситаббам̣. дутийасиккха̄паде ма̄туга̄мо на̄ма̄ти манусситтхим̣йева гахетва̄ йаккхӣ петӣ тираччха̄нагата̄ па̄ра̄джикаваттхубхӯта̄ на гахита̄ тесу дуккат̣атта̄. ‘‘саче пана аттанопи сиккха̄паде дуккат̣ам̣ бхавеййа, атха касма̄ пат̣хамасиккха̄паде па̄читтийа’’нти ча вуттам̣. ‘‘апариккхитте памукхе ана̄паттӣ’’ти сӣхал̣ат̣т̣хакатха̄вачанам̣, тассаттхам̣ дӣпетум̣ андхакат̣т̣хакатха̄йам̣ ‘‘бхӯмийам̣ вина̄ джагатийа̄ памукхам̣ сандха̄йа катхита’’нти вуттам̣. пуна васатӣти чатуттхадивасе васати. бхиккхунипаннети бхиккхумхи нипанне. саннипатитаман̣д̣апам̣ на̄ма маха̄виха̄ре саннипа̄тат̣т̣ха̄нам̣. ‘‘тӣн̣и ча диваса̄ни дуккат̣акхетте васитва̄ чатуттхе дивасе сахасеййа̄паттипахонаке сайати, па̄читтийева̄’’ти екачче ваданти кира, там̣ на йуттам̣.

пат̣хамасахасеййасиккха̄падаван̣н̣ана̄ нит̣т̣хита̄.