2. дутийапа̄т̣идесанӣйасиккха̄падаван̣н̣ана̄

559. ‘‘нимантита̄ бхун̃джантӣти пан̃чаннам̣ бходжана̄нам̣ ан̃н̃атарена бходжанена нимантита̄ бхун̃джантӣ’’ти кин̃ча̄пи вуттам̣, атха кхо акаппийанимантанена нимантитата̄ еттха на ан̇гам̣, ма̄тика̄т̣т̣хакатха̄йам̣ ва̄ идха ва̄ ана̄паттива̄ре леса̄бха̄вато, тасма̄ ‘‘нимантита̄’’ти падасса аттхо пуббе а̄чин̣н̣авасенева вутто. апарепи тайо тикаччхеда̄ йоджетва̄ дассетабба̄ падабха̄джане вуттатта̄ти ведитаббам̣. йатха̄ татха̄ хи бхун̃джанта̄нам̣ та̄дисам̣ бхиккхуним̣ ава̄рента̄нам̣ па̄т̣идесанӣйамева. ‘‘еса̄ воса̄сати на̄ма, воса̄сантӣ’’ти ча дувидхо па̄т̣хо. ‘‘аджджхоха̄ре аджджхоха̄ре’’ти вачанена пуна ‘‘га̄райхам̣ а̄вусо дхамма’’нти екавачанам̣ вируддханти. пат̣хамам̣ аджджхоха̄рейева а̄паннам̣ сандха̄йа вуттам̣, татха̄ ан̃н̃атра̄пи а̄гаччхати ‘‘а̄паджджимха̄’’ти вачанато. екена бахӯнампи ват̣т̣атӣти кечи, там̣ на сундарам̣. ‘‘техи бхиккхӯхӣ’’тиа̄дина̄ па̄т̣хе вуттатта̄ти мама такко. екена сахева ‘‘ахам̣ а̄паджджи’’нтипи ваттаббанти екена двӣхи тӣхи десетаббато, саббехи евам̣ ваттум̣ ват̣т̣ати. ‘‘а̄паджджимха̄ти сахева̄’’ти ваданти. екена че ава̄рито, ‘‘ахам̣, а̄вусо, га̄райхам̣ дхаммам̣ а̄паджджи’’нтипи ваттаббам̣.

дутийапа̄т̣идесанӣйасиккха̄падаван̣н̣ана̄ нит̣т̣хита̄.

562-570. татийачатуттхасиккха̄пада̄ни утта̄наттха̄нийева.

па̄т̣идесанӣйакан̣д̣аван̣н̣ана̄ нит̣т̣хита̄.