9. рӯпийасам̣воха̄расиккха̄падаван̣н̣ана̄

587. ‘‘джа̄тарӯпараджатапариваттана’’нти уккат̣т̣хапариччхедена вуттам̣, татха̄ ‘‘рӯпийам̣ на̄ма саттхуван̣н̣о каха̄пан̣о’’тиа̄ди па̄л̣ивачанан̃ча. ‘‘арӯпийе рӯпийасан̃н̃ӣ рӯпийам̣ чета̄петӣ’’тиа̄ди тикавачанато, ‘‘дуккат̣аваттхуна̄ пана ниссаггийаваттхум̣ чета̄пентасса…пе… ниссаггийам̣ па̄читтийам̣ гарукасса чета̄питатта̄’’ти ат̣т̣хакатха̄вачанато ча пана ануккат̣т̣хапариччхедопеттха лаббхатӣти сиддхам̣. саттхуван̣н̣о ча каха̄пан̣о ча тато йе чан̃н̃е воха̄рам̣ гаччхантӣти еваметтха самуччайо ведитаббо. имасмим̣ пана сиккха̄паде ‘‘на̄наппака̄ракам̣ на̄ма катампи акатампи ката̄катампӣ’’ти еттха вибхатта̄нам̣ тин̣н̣ам̣ рӯпийа̄рӯпийа̄нан̃ча двиннам̣ васена пан̃ча тика̄ вутта̄, ат̣т̣хакатха̄чарийехи тадануломато еко тико дасситоти саббе чха хонти.

еттха̄ха – ан̃н̃асмим̣ сиккха̄паде екасмим̣ тикаччхеде дассите сатипи самбхаве итаре на дассӣйанти, идхева касма̄ дасситоти? ‘‘на̄наппака̄рака’’нти ма̄тика̄йам̣ вуттатта̄ идхева на̄наппака̄рабха̄вадассанаттханти. на кайавиккайасиккха̄падепи ваттаббаппасан̇гатоти че? на, идха дасситанайатта̄. атха ча рӯпийасса вибхан̇ге ‘‘йе воха̄рам̣ гаччхантӣ’’ти анте вуттатта̄ саттхуван̣н̣а̄дайо вал̣ан̃джанупага̄ ева̄ти сиддхам̣. тато авал̣ан̃джанупагехи джа̄тарӯпараджатехи воха̄рена на ниссаггийанти а̄паджджати, тасма̄ там̣ а̄паджджанаттханти дассентена ‘‘катена катам̣ чета̄петӣ’’тиа̄дайо тика̄ вутта̄ти, евам̣ санте рӯпийавибхан̇ге ‘‘йе ча воха̄рам̣ гаччхантӣ’’ти на ваттаббам̣, тасмим̣ паде авутте авал̣ан̃джанупага̄пи сан̇гахам̣ гата̄ва хонтӣти ката̄дӣхи тикаттайасса ваттаббапайоджанам̣ на бхависсатӣти че? на, каппийабхан̣д̣ена каппийабхан̣д̣апааваттанасса̄пи рӯпийасам̣воха̄рабха̄ваппасан̇гато. ‘‘йе воха̄рам̣ гаччхантӣ’’ти вачаненапи камука катхала кам̣сабха̄джана са̄т̣ака̄дипариваттанассапи рӯпийасам̣воха̄рабха̄ваппасан̇го ева̄ти че? на, ката̄дивачанена джа̄тарӯпа̄диакаппийаваттхӯнан̃н̃ева адхиппетабха̄вадӣпанато, тасма̄ убхайенапи йадетам̣ ката̄ката̄дибхедам̣ па̄катикарӯпийам̣ йан̃ча каха̄пан̣ама̄сакасан̇кхепам̣, йан̃ча каха̄пан̣а̄дивоха̄рӯпагам̣, убхайампетам̣ идха ча анантара̄тӣтасиккха̄паде ча рӯпийам̣ на̄ма̄ти адхиппетаттхасиддхи хоти, на тан̣д̣ула̄дӣни, таттха ката̄дивоха̄ра̄самбхавато. етта̄вата̄ ката̄дитикаттайаппайоджанам̣ вуттам̣.

ида̄ни сесаттика̄ни вуччати – еттха хи йатха̄вуттаппабхедам̣ ниссаггийаваттху рӯпийам̣ на̄ма, сесам̣ дуккат̣аваттхупи каппийаваттхупи на рӯпийанти арӯпийам̣ на̄ма хотӣти катва̄ ‘‘арӯпийе арӯпийасан̃н̃ӣ пан̃чаннам̣ сахадхаммика̄нам̣ ана̄паттӣ’’ти идам̣ на екам̣сикам̣ а̄паджджати дуккат̣аваттхумхи дуккат̣а̄паджджанато. идха вачанаппама̄н̣ато ниссаггийаваттхуто ан̃н̃ам̣ антамасо мутта̄дипи арӯпийамева на̄ма. таттха пан̃чаннам̣ сахадхаммика̄нам̣ ана̄паттӣти че? на, ра̄джасиккха̄падавиродхато. таттха хи ‘‘мутта̄ ва̄ ман̣и ва̄’’ти вуттам̣, тасма̄ мутта̄ди акаппийам̣ дуккат̣аваттхӯти ча сиддхам̣ ниссаггийаваттхӯсу абха̄ва̄. евам̣ санте ‘‘арӯпийе арӯпийасан̃н̃ӣ пан̃чаннам̣ сахадхаммика̄нам̣ ана̄паттӣ’’ти суддхакаппийабхан̣д̣ам̣ сандха̄йа вуттам̣, на саббам̣ арӯпийам̣. тато ан̃н̃аттха пана ‘‘арӯпийе рӯпийасан̃н̃ӣ’’тиа̄дитикадуккат̣е ча ат̣т̣хакатха̄йам̣ дасситатике ча саббам̣ арӯпийам̣ на̄ма̄ти ведитаббам̣, тасма̄ арӯпийабха̄вадӣпанаттхам̣ дутийо тико вутто. тадаттхамева ат̣т̣хакатха̄йам̣ дассито еко тико. касма̄ на па̄л̣ийам̣ со вуттоти че? таттха чета̄питаарӯпийе рӯпийачхад̣д̣анакасаммутикичча̄бха̄вато. тасмин̃хи тике вутте каппийаваттхунопи арӯпийачхад̣д̣анакасаммути да̄табба̄ти а̄паджджати, тасса васена рӯпийачхад̣д̣анакасаммути ева на ваттабба̄ти? на, рӯпийассапи саммутикичча̄бха̄ваппасан̇гато, тасма̄ рӯпийе рӯпийасан̃н̃ӣ каппийаваттхум̣ чета̄пети паттачатукке татийапаттам̣ вийа, там̣ сан̇гха̄дӣнам̣ ниссаджджитаббам̣, ниссат̣т̣хам̣ пана ан̃н̃есам̣ каппати татийапатто вийа. атха сампат̣иччхитарӯпийена чета̄питам̣ хоти дутийапатто вийа, там̣ вина̄пи саммутийа̄ йо кочи бхиккху чхад̣д̣ети, ват̣т̣ати. тато парам̣ ‘‘саче таттха а̄гаччхати а̄ра̄мико ва̄’’тиа̄дина̄ вуттанайенева пат̣ипаджджитаббам̣. таттха ‘‘рӯпийе’’ти ва̄ ‘‘арӯпийе’’ти ва̄ саббаттха бхуммаппатте аттано сантакам̣, упайогаппатте парасантаканти ведитаббам̣. еттха̄ха – упатиссаттхеро пуримасиккха̄падена рӯпийапат̣иггахан̣ам̣ ва̄ритам̣, имина̄ суддха̄гамена каппийака̄ракасса хаттхе каппийам̣ нисса̄йа т̣хитена сам̣воха̄ро ва̄ритоти.

589. ниссаггийаваттхуна̄ ниссаггийаваттхум̣…пе… апара̄парапариваттане имина̄ти еттха екасмим̣ ева ваттхусмим̣ двиннам̣ сиккха̄пада̄нам̣ васена екато а̄патти вутта̄, там̣ пана паччхимасса васена ниссаджджитаббам̣. етена ниссаггийам̣ а̄паннампи а̄паджджатӣти еке. парасса рӯпийаггахан̣ам̣ париваттананти рӯпийе аггахите тасса абха̄вато имина̄ва а̄патти, на пуримена омасава̄до вийа. муса̄ва̄дена муса̄ вадантасса̄пи хи омасава̄денева а̄патти. ниссаггийаваттхуна̄ дуккат̣а…пе… есева найоти етасса йуттим̣ дассенто ‘‘йо хи айа’’нти а̄ха.

вад̣д̣хим̣ пайоджентасса̄ти еттха идам̣ гахетва̄ сати ма̄се, сати сам̣ваччхаре ‘‘еттакам̣ дехӣ’’ти че вадати. рӯпийасам̣воха̄ро хоти. вина̄ каппийака̄ракена ‘‘еттака̄ вуд̣д̣хи хоту, еттакам̣ ган̣ха̄’’ти вадато дуккат̣ам̣ кайавиккайалаккхан̣а̄бха̄вато. ‘‘мӯле мӯласа̄мика̄на’’нтиа̄ди каппийакаран̣ӯпа̄йадассанаттхам̣ вуттам̣, на кевалам̣ ниссат̣т̣хам̣ апарибхогам̣ хоти, пуна евам̣ кате парибхун̃джитум̣ ват̣т̣ати. тассапи парибхоге мӯласса каппийакаран̣ӯпа̄йо че на хоти, каппийам̣ а̄чиккхитаббанти йатха̄ па̄л̣ийа̄ четтха каппийакаран̣ӯпа̄йо, со ча татийапаттепи, ‘‘йатха̄ ча аттано аттха̄йа гахите еварӯпупа̄йо, татха̄ сан̇гха̄диаттха̄йа гахитепи есо ва̄’’ти вуттам̣. име кира пат̣хамадутийапатте йа̄ва гахат̣т̣хена париваттети, та̄ва на каппийакаран̣ӯпа̄йо, анекапурисайугампи ‘‘акаппийа̄ ева̄’’ти ат̣т̣хакатха̄йам̣ вуттам̣. ануган̣т̣хипаде пана ‘‘сан̇гхасантакам̣ каппийабхан̣д̣ам̣ виккин̣итва̄ а̄гатакаха̄пан̣а̄нипи пат̣иггахан̣ам̣ мочетва̄ва сампат̣иччхитабба̄ни, тасма̄ каппийака̄рако че има̄ни та̄ни каха̄пан̣а̄нӣти вадати, на ват̣т̣атийева, пат̣иккхипитаббам̣, на вича̄ретаббам̣, вича̄рети че? саббесам̣ на каппати. пат̣иггахан̣ам̣ мочетва̄ сампат̣иччхита̄ни че вича̄рети, тассева на ват̣т̣атӣ’’ти абхиккхан̣ам̣ вуттам̣.

рӯпийасам̣воха̄расиккха̄падаван̣н̣ана̄ нит̣т̣хита̄.