10. пат̣хамасан̇гхабхедасиккха̄падаван̣н̣ана̄

409. ‘‘ваджджам̣ на пхусеййа̄’’ти ча па̄т̣хо.

410. тесам̣ анурӯпа̄джа̄нанато асаббан̃н̃ӯ асса. ‘‘на, бхиккхаве, асена̄саникена вассам̣ упагантабба’’нти (маха̄ва. 204) вуттатта̄ пат̣иккхиттамева. тикот̣ипарисуддханти парасса па̄папасан̇ганива̄ран̣аттхам̣ вуттам̣, на пат̣иччакамманива̄ран̣аттхам̣ кот̣ӣхӣти а̄ка̄рехи. парисуддханти вимуттам̣. дасахи лесехи уддисса катам̣ саман̣а̄ парибхун̃джанти, ассаман̣а̄ имети са̄санасса гарахабха̄во а̄гаччхеййа, гарахапаччайа̄ локо ва̄ апун̃н̃ам̣ арийӯпава̄дам̣ пасавеййа, техи вимуттанти аттхо. ва̄гуранти мигаджа̄лам̣. аттано аттха̄йа ва̄тиа̄дина̄ паресам̣ аттха̄йа кате каппийабха̄вам̣ дассетва̄ бхиккхӯнан̃ча ан̃н̃есан̃ча аттха̄йа кате там̣ дассетум̣ ‘‘мата̄нам̣ петакиччаттха̄йа̄’’тиа̄дима̄ха.

йам̣ йам̣ хӣтиа̄ди тасса ка̄ран̣асса дассанаттхам̣ вуттам̣. пуна пан̃чаннам̣ сахадхаммика̄нам̣ аттха̄йа катам̣ на каппатӣти вуттанти кира дхаммасириттхеро. ган̣т̣хипаде ‘‘бхиккхӯнамева суддха̄нам̣ аттха̄йа катам̣ на ват̣т̣атӣ’’ти ликхитам̣. апарехи пана ‘‘мата̄нам̣ петакиччаттха̄йа̄тиа̄дина̄ вуттепи каппати, бхиккхӯнам̣йева аттха̄йа̄ти имина̄ ‘бхиккхӯнампи датва̄ майам̣ бхун̃джисса̄ма̄’ти катампи вуттам̣. пуна ‘пан̃часу екам̣ уддиссакатам̣ итаресам̣ на каппатӣ’ти дассанаттхам̣ ‘пан̃часу хи сахадхаммикесӯтиа̄ди вутта’нти вадантӣ’’ти вуттам̣. ан̃н̃атарасмим̣ пана ган̣т̣хипаде ‘‘амха̄канти ча ра̄джайутта̄дӣнанти ча вутте ват̣т̣атӣти ватва̄ ‘тумха̄ка’нти аватва̄ ‘петакиччаттха̄йа̄ти вуттепи ват̣т̣атӣ’ти ча дассетва̄ саббаттха вутта̄нам̣, а̄дисаддена сан̇гахита̄нан̃ча лаккхан̣ам̣ т̣хапентена ‘бхиккхӯнам̣йева̄’тиа̄ди вуттам̣. таттха ‘бхиккхӯнам̣ уддит̣т̣хе ева̄ти адхиппа̄йена̄’ти вуттам̣. на ‘тумха̄кам̣, амха̄кан̃ча̄ти вутте ана̄паттӣ’ти дассанаттхам̣. касма̄? миссакава̄расса абха̄ва̄. лаккхан̣ам̣ на̄ма вутта̄нам̣, вуттасадиса̄нан̃ча хоти. ‘саче петакиччаттха̄йа̄ти вуттат̣т̣ха̄не бхиккхӯнам̣ бходжанам̣ сандха̄йа каронтӣ’ти ваданти маха̄ат̣т̣хакатха̄йан̃ча ‘тасмим̣ ва̄ре ча на тумха̄канти вутте ват̣т̣атӣ’ти вуттатта̄. тенева идха̄пи ‘петакиччаттха̄йа, ман̇гала̄дӣнам̣ ва̄ аттха̄йа катепи есева найо’ти пуббе вуттаттхавасена вуттам̣. ‘авадха̄ран̣аттхена миссаке ват̣т̣атӣ’ти че? ‘каппийамам̣сасса хи пат̣иггахан̣е а̄патти наттхӣ’ти вачанена акаппийапат̣иггахан̣е а̄паттӣти а̄паннам̣, ‘тан̃ча гахетаббам̣ сийа̄’ти пат̣иккхипитабба̄’’ти вуттам̣, там̣ сундарам̣ вийа диссати, вича̄ретва̄ гахетаббам̣. йаттха ча̄ти бхиккхӯнам̣ аттха̄йа катепи. таматтхам̣ а̄ви ка̄тум̣ ‘‘саче пана̄’’тиа̄ди вуттам̣. еттха пана ‘‘бхиккхунӣнам̣ дуккат̣ам̣, итаресам̣ дан̣д̣акаммаваттхӯ’’ти ваданти. каппам̣ нирайамхӣти асан̇кхйеййакаппам̣. виват̣т̣ат̣т̣ха̄йика̄лейева сан̇гхабхедо хотӣти. каппанти а̄йукаппам̣.

411. кусаланти кхемам̣. а̄паттибхайа̄ ката̄ ладжджӣхӣти еттха а̄паттибхайена авассам̣ а̄рочентӣти дассанаттхам̣ ‘‘ладжджӣ раккхиссатӣ’’ти (висуддхи. 1.42; па̄ра̄. ат̣т̣ха. 1.45) пора̄н̣авачанасса̄нурӯпато ‘‘ан̃н̃ехи ладжджӣхӣ’’ти вуттам̣. аладжджиссапи ана̄рочентасса а̄паттийева ‘‘йе пассанти йе сун̣антӣ’’ти вачанато.

416. асаманубха̄сантасса̄ти каммака̄раке каттуниддесо, саманубха̄санакаммам̣ акарийама̄насса̄ти аттхо. одисса анун̃н̃а̄то на̄ма умматтакакхиттачиттаведанат̣т̣а̄дико ‘‘ана̄патти а̄дикаммикасса̄’’ти арит̣т̣хасиккха̄паде а̄гататта̄ аттхӣти че? йампӣтиа̄ди. са̄ панеса̄ ана̄патти. со вуччатӣти таттха а̄гатопи сакаммабйа̄ват̣опи евам̣ вуччати. етенупа̄йена̄ти асаманубха̄сантасса ча а̄дикаммикасса ча вуттаттхавасена. т̣хапетва̄ арит̣т̣хасиккха̄паданти таттха а̄дикаммикапада̄бха̄ва̄.

тиван̇гиканти еттха ва̄ча̄йа ева пат̣иниссаджджантасса от̣т̣хачалана̄дика̄йавин̃н̃атти хоти, тасма̄ дувидхампи вин̃н̃аттим̣ катхентасса хоти. вачӣбхедам̣ ка̄тум̣ асакконтасса ка̄йавика̄рам̣ каронтасса ана̄паттийа̄ бхавитаббам̣. касма̄? тиван̇гесу екасса парихӣнатта̄, тасма̄ тиван̇габха̄во а̄паттийа̄, ан̇гаха̄нибха̄во ана̄паттийа̄ти гахетаббам̣. еттха сийа̄ – йади ан̇гаха̄нибха̄вена ана̄патти, евам̣ сантепи вика̄рам̣ акатва̄ читтенева виссаджджентасса ана̄паттийа̄ бхавитаббанти? там̣ на, касма̄? ат̣т̣хакатха̄йам̣ ‘‘ка̄йавика̄рам̣ ва̄ вачӣбхедам̣ ва̄ акаронтассева пана а̄паджджанато акирийа’’нти хи вуттам̣, ‘‘читтам̣ ва̄ ануппа̄дентасса ва̄’’ти на вуттам̣, тасма̄ читтан̃ча на̄ма вин̃н̃аттипат̣ибаддхам̣ ева̄ти висум̣ ан̇габха̄венева вуттатта̄ джа̄нитаббанти че? там̣ на, двиннам̣йева акирийа̄ти, тасма̄ читтена виссаджджентасса̄пи а̄патти вийа диссати, упапариккхитва̄ гахетаббам̣. таттха ‘‘акусалачитта’’нти вуттанти че? ‘‘читтаба̄хуллато вутта’’нти ваданти. тепи кира ба̄хуллато ваданти.

пат̣хамасан̇гхабхедасиккха̄падаван̣н̣ана̄ нит̣т̣хита̄.