1. суддхикасуттаван̣н̣ана̄

471. чатубхӯмака …пе… лаббханти кусала̄бйа̄катабха̄вато тесам̣ тин̣н̣ам̣ индрийа̄нам̣. вӣрийиндрийасама̄дхиндрийа̄ни…пе… саббаттха лаббханти кусалаттикаса̄дха̄ран̣атта̄. чатубхӯмака …пе… васена̄ти чатубхӯмакадхаммапариччхедавасена чева кусала̄дӣхи саббасан̇га̄хакадхаммапариччхедавасена ча вуттанти аттхо.

дутийасаман̣абра̄хман̣асуттаван̣н̣ана̄

477. дуккхасаччавасена̄ти дуккхасаччабха̄вена на паджа̄нанти. тан̃хи парин̃н̃еййата̄йа дуккхасаччасан̇гахам̣. самудайасаччавасена̄ти тан̣ха̄виджджа̄дим̣ саддхиндрийасса самудайасаччабха̄вена на паджа̄нанти. ниродханти саддхиндрийасса анупа̄да̄йа ниродханимиттам̣ нибба̄нам̣. пат̣ипаданти саддхиндрийаниродхага̄миним̣ пат̣ипадам̣ арийамаггам̣. сесесӯти вӣрийиндрийа̄дӣсу.

суккапаккхети ‘‘саддхиндрийам̣ паджа̄нантӣ’’тиа̄динайаппаватте анаваджджапаккхе. адхимоккхавасена а̄ваджджанасамудайа̄ти ‘‘аттхи динна’’нтиа̄динайаппаваттапуббабха̄габхӯтасаддха̄дхимоккхавасена а̄ваджджануппаттийа̄. тасма̄ пат̣хамуппанна̄ саддха̄ ева хеттха ‘‘а̄ваджджана’’нти вутта̄, на манодва̄ра̄ваджджанам̣. еса найо сесесупи. тасма̄ пат̣хамуппанна̄ а̄ваджджана̄ паггахуппаттит̣т̣ха̄на̄нам̣ тиккха̄нам̣ вӣрийиндрийа̄дӣнам̣ пат̣хамуппаттийа̄ а̄ваджджанапарийа̄йена вутта̄ти дат̣т̣хаббам̣. дуббала̄ хи пат̣хамуппанна̄ паггаха̄бха̄вато вӣрийиндрийа̄дӣнам̣ самудайоти балавабха̄ваппаттавӣрийиндрийа̄дикасса а̄ваджджанат̣т̣ха̄нийа̄ни хонтӣти тесам̣ самудайоти вутта̄, пуббе адхимуччана̄дивасена паваттасса а̄ваджджанасса самудайа̄ти аттхо. пуна чхандавасена̄ти каттука̄мата̄кусалаччхандавасена саддха̄дӣнам̣ уппа̄детука̄мата̄ка̄раппаваттасса чхандасса васена. манасика̄равасена а̄ваджджанасамудайа̄ти саддхиндрийа̄дивасена паваттасса дуббаласса тасса ниббаттакайонисоманасика̄равасена а̄ваджджанасса уппаттийа̄. евампӣти ‘‘адхимоккхавасена̄’’тиа̄дина̄ вутта̄ка̄ренапи. чхасу суттесӯти дутийато пат̣т̣ха̄йа чхасу суттесу. чатусаччамева катхитам̣. асса̄даггахан̣ена хи самудайасаччам̣, а̄дӣнаваггахан̣ена дуккхасаччам̣, ниссаран̣аггахан̣ена ниродхамаггасачча̄ни гахита̄нӣти. пат̣хамасутте пана индрийа̄нам̣ сарӯпадассанамева̄ти.