1. наччагӣтасуттаван̣н̣ана̄

1151. сан̇кхепато ‘‘саббапа̄пасса акаран̣а’’нтиа̄динайаппаваттам̣ (дӣ.ни. 2.90; дха.па. 183) бхагавато са̄санам̣ аччантачхандара̄гапаваттито начча̄дӣнам̣ дассанам̣ на анулометӣти а̄ха ‘‘са̄санасса анануломатта̄’’ти. аттана̄ парехи ча пайоджийама̄нам̣ пайоджа̄пийама̄нан̃ча етенева начча-саддена гахитам̣, татха̄ гӣтава̄дитасаддехи ча̄ти а̄ха – ‘‘наччананачча̄пана̄дивасена̄’’ти. а̄ди-саддена га̄йана-га̄йа̄пана-ва̄дана-ва̄да̄пана̄дӣни сан̇ган̣ха̄ти. дассанена четтха саванампи сан̇гахитам̣ вирӯпекасесанайена. йатха̄сакам̣ висайасса а̄лочанасабха̄вата̄йа ва̄ пан̃чаннам̣ вин̃н̃а̄н̣а̄нам̣ саванакирийа̄йапи дассанасан̇кхепасаббха̄вато ‘‘дассана̄’’иччева вуттам̣. ависӯкабхӯтасса гӣтасса саванам̣ када̄чи ват̣т̣атӣти а̄ха – ‘‘висӯкабхӯта̄ дассана̄ ча̄’’ти. татха̄ хи вуттам̣ параматтхаджотика̄йа кхуддакаат̣т̣хакатха̄йа (кху. па̄. ат̣т̣ха. 2.паччхимапан̃часиккха̄падаван̣н̣ана̄) – ‘‘дхаммӯпасам̣хитам̣ гӣтам̣ ват̣т̣ати, гӣтӯпасам̣хито дхаммо на ват̣т̣атӣ’’ти.