8. дутийаа̄макадхан̃н̃апеййа̄лавагго

8. бӣджага̄масуттаван̣н̣ана̄

1148. ‘‘мӯлабӣджа’’нтиа̄дӣсу мӯламева бӣджанти мӯлабӣджам̣, мӯлабӣджам̣ етасса̄типи мӯлабӣджам̣. таттха пуримена бӣджага̄мо вутто ‘‘бӣджа̄нам̣ самӯхо’’ти катва̄, дутийена бхӯтага̄мо. дувидхопесо са̄ман̃н̃аниддесена, ‘‘мӯлабӣджан̃ча мӯлабӣджан̃ча мӯлабӣджа’’нти екасесанайена ва̄ бӣджаттхо ведитаббо. еса найо сесесупи. пхал̣убӣджанти паббабӣджам̣. ба̄хирапаччайантарасамава̄йе садисапхалуппаттийа̄ висесака̄ран̣абха̄вато вируханасаматтхе са̄рапхале нирул̣хо бӣджа-саддо. тадаттхасиддхийа̄ мӯла̄дӣсупи кесучи паваттатӣти тато ниваттанаттхам̣ екена бӣджа-саддена висесетва̄ вуттам̣ ‘‘бӣджабӣджа’’нти ‘‘рӯпарӯпам̣, дуккхадуккха’’нти (сам̣. ни. 4.327) ча йатха̄. нӣлатин̣аруккха̄дикасса̄ти аллатин̣асса чева алларуккха̄дикасса ча. а̄ди-саддена осадхигаччхалата̄дӣнам̣ гахан̣ам̣.

9. вика̄лабходжанасуттаван̣н̣ана̄

1149. арун̣уггаманато пат̣т̣ха̄йа йа̄ва маджджханхико, айам̣ буддха̄диарийа̄нам̣ а̄чин̣н̣асама̄чин̣н̣о бходжанасса ка̄ло, тадан̃н̃о вика̄лоти а̄ха – ‘‘вика̄лабходжана̄ти ка̄ла̄тиккантабходжана̄’’ти.

10. гандхавилепанасуттаван̣н̣ана̄

1150. йам̣ кин̃чи пуппханти гантхимам̣ агантхимам̣ ва̄ йам̣ кин̃чи пуппхаджа̄там̣, татха̄ писита̄дибхедам̣ йам̣ кин̃чи гандхаджа̄там̣.