8-9. пат̣хамагин̃джака̄васатхасутта̄диван̣н̣ана̄

1004-5. две га̄ма̄ двиннам̣ н̃а̄тӣнам̣ га̄ма̄ти катва̄. н̃а̄тикети евам̣ладдхана̄ме екасмим̣ га̄маке. гин̃джака̄васатхети гин̃джака̄ вуччанти ит̣т̣хака̄, гин̃джака̄хи ева като а̄васатхо, тасмим̣. со кира а̄ва̄со йатха̄ судха̄хи парикаммена пайоджанам̣ наттхи, евам̣ ит̣т̣хака̄хи ева чинитва̄ като. тена вуттам̣ ‘‘ит̣т̣хака̄майе а̄васатхе’’ти. тула̄тхамбхадва̄рабандхакава̄т̣апхалака̄ни пана да̄румайа̄ ева. орам̣ вуччати ка̄мадха̄ту, паччайабха̄вена там̣ орам̣ бхаджантӣти орамбха̄гийа̄ни, орамбха̄гасса ва̄ хита̄ни орамбха̄гийа̄ни. тена̄ха ‘‘хет̣т̣ха̄бха̄гийа̄на’’нтиа̄ди. тӣхи маггехӣти хет̣т̣химехи тӣхи маггехи. техи паха̄таббата̄йа хи тесам̣ сан̃н̃оджана̄нам̣ орамбха̄гийата̄, орам̣ бхан̃джийа̄ни ва̄ орамбха̄гийа̄ни вутта̄ни нируттинайена. ида̄ни бйатирекамукхена несам̣ орамбха̄гийабха̄вам̣ вибха̄ветум̣ ‘‘таттха̄’’тиа̄ди вуттам̣. виккхамбхита̄ни саматтхата̄вигха̄тена путхуджджана̄нам̣, самуччхинна̄ни саббасо абха̄вена арийа̄нам̣ рӯпа̄рӯпабхавӯпапаттийа̄ вибандхана̄йа на хонтӣти вуттам̣ ‘‘авиккхамбхита̄ни маггена ва̄ асамуччхинна̄нӣ’’ти. ниббаттивасена̄ти пат̣исандхиггахан̣авасена гантум̣ на денти. махаггатабхавага̄микамма̄йӯханасса вибандханато сакка̄йадит̣т̣хиа̄дӣни тӣн̣и сан̃н̃оджана̄ни ка̄маччхандабйа̄па̄да̄ вийа махаггатабхавӯпапаттийа̄ висесапаччайатта̄ таттха махаггатабхаве ниббаттампи танниббаттихетукаммапариккхайе ка̄мабхавӯпапаттипаччайата̄йа махаггатабхавато а̄нетва̄ идхева ка̄мабхаве ева ниббатта̄пенти. тасма̄ сабба̄нипи пан̃чапи сам̣йоджана̄ни орамбха̄гийа̄нева. пат̣исандхивасена ана̄гаманасабха̄воти пат̣исандхиггахан̣авасена тасма̄ лока̄ идха на а̄гаманасабха̄во. буддхадассана-тхерадассана-дхаммассавана̄нам̣ пана аттха̄йа асса а̄гаманам̣ анива̄ритам̣.

када̄чи уппаттийа̄ вирал̣а̄ка̄рата̄, парийут̣т̣ха̄намандата̄йа абахалата̄ти дведха̄пи танубха̄во. абхин̣ханти бахусо. бахалабахала̄ти тиббатибба̄. йаттха уппаджджанти, там̣ санта̄нам̣ мадданта̄ пхаранта̄ са̄дхента̄ андхака̄рам̣ каронта̄ уппаджджанти, двӣхи пана маггехи пахӣнатта̄ танукатанука̄ мандаманда̄ уппаджджанти. путтадхӣтаро хонтӣти идам̣ ака̄ран̣ам̣. татха̄ хи ан̇гапаччан̇гапара̄масанаматтенапи те хонти. иданти ‘‘ра̄гадосамоха̄нам̣ танутта̄’’ти идам̣ вачанам̣. бхаватанукавасена̄ти аппакабхававасена. танти маха̄сӣваттхерасса вачанам̣ пат̣иккхиттанти самбандхо. йе бхава̄ арийа̄нам̣ лаббханти, те парипун̣н̣алаккхан̣абхава̄ ева. йе на лаббханти, таттха кӣдисам̣ там̣ бхаватанукам̣. тасма̄ убхайатха̄пи бхаватанукасса асамбхаво ева̄ти дассетум̣ ‘‘сота̄паннасса̄’’тиа̄ди вуттам̣. ат̣т̣хаме бхаве бхаватанукам̣ наттхи ат̣т̣хамассева бхавасса саббассева абха̄вато. сесесупи есева найо.

ка̄ма̄вачаралокам̣ сандха̄йа вуттам̣ итарасса локасса васена татха̄ ваттум̣ асаккун̣еййатта̄. йо хи сакада̄га̄мӣ девамануссалокесу вомиссакавасена ниббаттати, сопи ка̄мабхававасенева париччхиндитаббо. бхагавата̄ ча ка̄малоке т̣хатва̄ – ‘‘сакидева имам̣ локам̣ а̄гантва̄’’ти вуттам̣. имам̣ локам̣ а̄гантва̄ти ча имина̄ пан̃часу сакада̄га̄мӣсу чатта̄ро ваджджетва̄ екова гахито. екаччо хи идха сакада̄га̄мипхалам̣ патва̄ идхева паринибба̄йати, екаччо идха патва̄ девалоке паринибба̄йати, екаччо девалоке патва̄ таттхева паринибба̄йати, екаччо девалоке патва̄ идхӯпападжджитва̄ паринибба̄йати, име чатта̄ро идха на лаббханти. йо пана идха патва̄ девалоке йа̄вата̄йукам̣ васитва̄ пуна идхӯпападжджитва̄ паринибба̄йати, айамидха адхиппето. ат̣т̣хакатха̄йам̣ пана ‘‘имам̣ локанти ка̄мабхаво адхиппето’’ти имаматтхам̣ вибха̄ветум̣ ‘‘саче хӣ’’тиа̄дина̄ ан̃н̃ам̣йева чатуккам̣ дасситам̣.

чатӯсу…пе… сабха̄воти аттхо апа̄йагаманӣйа̄нам̣ па̄падхамма̄нам̣ саббасо пахӣнатта̄. дхамманийа̄мена̄ти маггадхамманийа̄мена нийато упаримагга̄дхигамасса авассам̣бха̄вибха̄вато. тена̄ха ‘‘самбодхипара̄йан̣о’’ти. тесам̣ тесам̣ н̃а̄н̣агатинти тесам̣ тесам̣ сатта̄нам̣ ‘‘асуко сота̄панно, асуко сакада̄га̄мӣ’’тиа̄дина̄ там̣там̣н̃а̄н̣а̄дхигаманам̣ н̃а̄н̣ӯпапаттим̣. н̃а̄н̣а̄бхисампара̄йанти тато парампи – ‘‘нийато самбодхипара̄йан̣о сакидева имам̣ локам̣ а̄гантва̄ дуккхассантам̣ кариссатӣ’’тиа̄дина̄ н̃а̄н̣асахитам̣ упапаттипаччайабхавам̣. олокентасса н̃а̄н̣ачаккхуна̄ апеккхантасса. кевалам̣ ка̄йакиламатхова, на тена ка̄чи паресам̣ аттхасиддхӣти адхиппа̄йо. читтавихеса̄ читтакхедо, са̄ килесӯпасам̣хитатта̄ буддха̄нам̣ наттхи.

а̄диссати а̄локӣйати атта̄ етена̄ти а̄да̄сам̣, дхаммабхӯтам̣ а̄да̄сам̣ дхамма̄да̄сам̣, арийамагган̃а̄н̣ассетам̣ адхивачанам̣. тена хи арийаса̄вако чатӯсу арийасаччесу виддхастасаммохатта̄ атта̄нам̣ йа̄тха̄вато н̃атва̄ йа̄тха̄вато бйа̄кареййа, таппака̄санато пана дхаммапарийа̄йасса суттасса дхамма̄да̄сата̄ ведитабба̄ти. йена дхамма̄да̄сена̄ти идха пана маггадхаммамева вадати. сесам̣ утта̄наттхатта̄ сувин̃н̃еййамева̄ти.

вел̣удва̄раваггаван̣н̣ана̄ нит̣т̣хита̄.