1. чаккаваттира̄джасуттаван̣н̣ана̄

997. ануггахагарахан̣есу нипа̄тоти анугган̣ханагарахаттхаджотако нипа̄то. киметтха анугган̣ха̄ти, ким̣ ва̄ гарахатӣти а̄ха ‘‘чатунна’’нтиа̄ди. таттха анугган̣ханто ануччхавикам̣ катва̄ ган̣ханто. гараханто нинданто. иссарасӣло иссаро, тасса бха̄во иссарийам̣, пабхута̄. адхӣнам̣ пати адхипати, тасса бха̄во а̄дхипаччам̣, са̄мибха̄воти а̄ха – ‘‘иссарийа̄дхипачча’’нтиа̄ди. анантака̄нӣти антарахита̄ни.

авеччаппаса̄дена̄ти ваттхуттайасса гун̣е йа̄тха̄вато авечча пависитва̄ паса̄до. со пана кеначи чаланарахитоти а̄ха ‘‘ачалаппаса̄дена̄’’ти. маггена̄ти арийамаггена. а̄гатаппаса̄до тасса адхигамена ладдхаппаса̄до. апуббам̣ ачариманти екаджджхам̣. арийаса̄вака̄нан̃хи арийамагго уппаджджантова тӣсу ваттхӯсу авеччаппаса̄дам̣ а̄ваханто ева уппаджджати. тесанти висайабхӯта̄нам̣ тин̣н̣ам̣ ваттхӯнам̣ васена тидха̄ вутто. йасма̄ ча аттхато еко, тасма̄ва нинна̄на̄каран̣о хоти паваттат̣т̣ха̄набхеде сатипи. арийаса̄вакасса хӣтиа̄дина̄ найена таматтхам̣ виварати. паса̄до окаппана̄. пемам̣ бхатти. га̄равам̣ гарукаран̣ам̣. махантам̣ ул̣а̄рам̣. етам̣ вибха̄гена наттхи саббаттха сама̄натта̄.

еванти бхавантарепи акопанӣйата̄йа. садисавасена̄ти ан̃н̃ехи акхан̣д̣а̄дӣхи садисавасена. тена̄ха ‘‘мукхават̣т̣и йан̃хи чхинне’’тиа̄ди. кхан̣д̣а̄ етисса̄ аттхӣти кхан̣д̣а̄. еса найо сесесупи. па̄тимоккхе а̄гата̄нуккамена сӣласса а̄димаджджхавибха̄го ведитаббо. двиннам̣ ва̄ тин̣н̣ам̣ ва̄ти сӣлакот̣т̣ха̄са̄нам̣. екантарам̣ бхиннанти абхиннена екантарам̣ хутва̄ бхиннам̣. тесам̣ кхан̣д̣а̄дӣнам̣. ‘‘бхуджиссехӣ’’ти уттарападалопена ниддесоти а̄ха ‘‘бхуджиссабха̄вакарехӣ’’ти. идам̣ вӣтиккантанти идампи сӣлам̣ вӣтиккантам̣. ‘‘айам̣ сӣласса вӣтиккамо’’ти евам̣ пара̄маситум̣ асаккун̣еййехи.