2. та̄лапут̣асуттаван̣н̣ана̄

354. ва̄лоти вуччати та̄ло, тасса та̄лапут̣ам̣ на̄ма. йатха̄ а̄малакӣпхаласама̄накам̣, со пана та̄ласадисамукхаван̣н̣атта̄ та̄лапут̣оти евам̣на̄мако. тена̄ха ‘‘тасса кира̄’’тиа̄ди. абхинӣха̄расампанно анекесу каппесу самбхатаса̄вакабодхисамбха̄ро. татха̄ хеса асӣтийа̄ маха̄са̄вакесу аббхантаро джа̄то. сахассам̣ денти наччам̣ пасситука̄ма̄. самаджджавесанти непаччавесам̣. кӣл̣ам̣ катва̄ти наччакӣл̣итам̣ кӣл̣итва̄, наччитва̄ти аттхо.

пуббе татха̄паваттавуттантадассане саччена, таббипарийа̄йе аликена. ра̄гапаччайа̄ти ра̄гуппаттийа̄ ка̄ран̣абхӯта̄. мукхато…пе… дассана̄дайоти а̄ди-саддена мукхато аггиджа̄ланиккхамадассана̄дике сан̇ган̣ха̄ти. ан̃н̃е ча…пе… абхинайа̄ти ка̄масса̄дасам̣йутта̄нам̣ син̇га̄рахассааббхутараса̄нан̃чева ‘‘ан̃н̃е ча̄’’ти вуттасантабӣбхаччхараса̄нан̃ча дассанака̄ абхинайа̄. досапаччайа̄ти досуппаттийа̄ ка̄ран̣абхӯта̄. хаттхапа̄даччхеда̄дӣти а̄ди-саддена сан̇гахита̄нам̣ руддавӣрабхайа̄накараса̄нам̣ дассанака̄ абхинайа̄. мохапаччайа̄ти мохуппаттийа̄ ка̄ран̣абхӯта̄. евама̄дайоти а̄ди-саддена сан̇гахита̄нам̣ карун̣а̄сантабхайа̄накараса̄нам̣ дассанака̄ абхинайа̄. те хи расе сандха̄йа па̄л̣ийам̣ ‘‘йе дхамма̄ раджанӣйа̄, йе дхамма̄ досанӣйа̄, йе дхамма̄ моханӣйа̄’’ти ча вуттам̣.

нат̣авесам̣ гахетва̄ва паччанти каммасариккхавипа̄кавасена. там̣ сандха̄йа̄ти там̣ йатха̄вуттам̣ нирайе паччанам̣ сандха̄йа. етам̣ ‘‘паха̄со на̄ма нирайо, таттха упападжджатӣ’’ти вуттам̣. йатха̄ локе аттхависесавасена сакаммака̄нипи пада̄ни акаммака̄ни бхаванти ‘‘вимуччати пурисо’’ти, евам̣ идха аттхависесавасена акаммакам̣ сакаммакам̣ катва̄ вуттам̣ – ‘‘на̄хам̣, бханте, етам̣ рода̄мӣ’’ти. ко пана со аттхависесо? асаханам̣ аккхаманам̣, тасма̄ на рода̄ми на саха̄ми, на аккхама̄мӣти аттхо. роданака̄ран̣ан̃хи асаханто тена абхибхӯто родати. тамевасса сакаммакабха̄васса ка̄ран̣абхӯтам̣ аттхависесам̣ ‘‘на ассувимочанаматтена̄’’ти вуттам̣. матам̣ ва̄, амма, родантӣти еттха̄пи матам̣ роданти, тасса маран̣ам̣ на саханти, наккхамантӣти па̄кат̣ойаматтхоти.

та̄лапут̣асуттаван̣н̣ана̄ нит̣т̣хита̄.