4. дутийааниччасуттаван̣н̣ана̄

46. пуббантам̣ атӣтакхандхакот̣т̣ха̄сам̣. анугата̄ти сассата̄дӣни каппетва̄ гахан̣авасена анугата̄. ат̣т̣ха̄раса дит̣т̣хийоти чатассо сассатадит̣т̣хийо, чатассо екаччасассатадит̣т̣хийо, чатассо анта̄нантикадит̣т̣хийо, чатассо амара̄виккхепадит̣т̣хийо, две адхиччасамуппаннадит̣т̣хийоти евам̣ ат̣т̣ха̄раса дит̣т̣хийо на хонти паччайагха̄тена. апарантанти ана̄гатам̣ кхандхакот̣т̣ха̄сам̣ сассата̄дибха̄вам̣ каппетва̄ гахан̣авасена анугата̄. сол̣аса сан̃н̃ӣва̄да̄, ат̣т̣ха асан̃н̃ӣва̄да̄, ат̣т̣ха невасан̃н̃ӣна̄сан̃н̃ӣва̄да̄, сатта уччхедава̄да̄, пан̃ча парамадит̣т̣хадхамманибба̄нава̄да̄ти евам̣ чатучатта̄лӣса дит̣т̣хийо на хонти паччайагха̄тена. сассатадит̣т̣хитха̄масо чева сӣлаббатадит̣т̣хипара̄ма̄со ча на хоти паччайагха̄тена. тена̄ха ‘‘етта̄вата̄ пат̣хамамагго дассито’’ти анавасесадит̣т̣хипаха̄накиттанато. пахӣна̄ виккхамбхита̄. идам̣ пана̄ти ‘‘рӯпасми’’нтиа̄ди.

дутийааниччасуттаван̣н̣ана̄ нит̣т̣хита̄.