6. дхануггахасуттаван̣н̣ана̄

228. дал̣хадхануноти тхиратарадхануно. ида̄ни тасса тхиратарабха̄вам̣ париччхедато дассетум̣ ‘‘дал̣хадханӯ’’тиа̄ди вуттам̣. таттха двисахассатха̄манти пала̄нам̣ двисахассатха̄мам̣. вуттамеваттхам̣ па̄кат̣атарам̣ катва̄ дассетум̣ ‘‘йасса̄’’тиа̄дима̄ха. таттха йасса̄ти дхануно. а̄ропитасса̄ти джийам̣ а̄ропитасса. джийа̄баддхоти джийа̄йа баддхо. патхавито муччати, етам̣ ‘‘двисахассатха̄ма’’нти ведитаббам̣. лохасӣса̄дӣнанти ка̄л̣алохатамбалохасӣса̄дӣнам̣. бха̄роти пурисабха̄ро, со пана маджджхимапурисасса васена едисам̣ тасса балам̣ дат̣т̣хаббам̣. уггахитасиппа̄ дхануведасиккха̄васена. чин̣н̣авасӣбха̄ва̄ лаккхесу авираджджханасараккхепавасена. катам̣ ра̄джакула̄дӣсу упагантва̄ асанам̣ сараккхепо етехӣти катӯпасана̄ти а̄ха ‘‘ра̄джакула̄дӣсу дасситасиппа̄’’ти.

‘‘бодхисатто чатта̄ри кан̣д̣а̄ни а̄харӣ’’ти ватва̄ тамева аттхам̣ виттха̄рато дассенто ‘‘тада̄ кира̄’’тиа̄дима̄ха. таттха джависса̄ма̄ти дха̄висса̄ма. агги ут̣т̣хахӣти сӣгхапатанасанта̄пена ча сӯрийарасмисанта̄пасса а̄саннабха̄вена ча усума̄ ут̣т̣хахи. паккхапан̃джарена̄ти паккхаджа̄лантарена.

ниваттитва̄ти ‘‘ниппайоджанамидам̣ джавана’’нти ниваттитва̄. паттакат̣а̄хена оттхат̣апатто вийа̄ти пихитапатто вийа ахоси, вегаса̄ патанена нагарасса упари а̄ка̄сасса нириккхан̣ам̣ ахоси. сан̃ча̄ритатта̄ анекахам̣сасахассасадисо пан̃н̃а̄йи сеййатха̄пи бодхисаттасса дхануггахака̄ле саракӯт̣а̄дидассане.

дуккаранти тасса адассанам̣ сандха̄йа̄ха, на аттано патанам̣. сӯрийаман̣д̣алан̃хи атисӣгхена джавена гаччхантампи пан̃н̃а̄сайоджана̄йа̄мавиттхатам̣ аттано випулата̄йа пабхассарата̄йа ча сатта̄нам̣ чаккхусса гочарабха̄вам̣ гаччхати, джаванахам̣со пана та̄дисена сӯрийена саддхим̣ джавена гаччханто на пан̃н̃а̄йеййа. тасма̄ вуттам̣ ‘‘на сакка̄ тайа̄ пасситу’’нти. чатта̄ро аккхан̣аведхино. гантва̄ гахите сотум̣ гхан̣д̣ам̣ пил̣андха̄петва̄ сайам̣ пураттха̄бхимукхо нисинно. пураттхимадиса̄бхимукхам̣ гатакан̣д̣ам̣ сандха̄йа̄ха ‘‘пат̣хамакан̣д̣енева саддхим̣ уппатитва̄’’ти. те чатта̄ри кан̣д̣а̄ни екаккхан̣ейева кхипим̣су.

а̄йум̣ сан̇кхароти етена̄ти а̄йусан̇кха̄ро. йатха̄ хи каммаджарӯпа̄нам̣ паватти джӣвитиндрийапат̣ибаддха̄, евам̣ аттабха̄васса паватти таппат̣ибаддха̄ти. бахувачананиддесо пана па̄л̣ийам̣ екасмим̣ кхан̣е анекасатасан̇кхасса джӣвитиндрийасса упалаббханато. там̣ джӣвитиндрийам̣. тато йатха̄вуттадевата̄нам̣ джавато сӣгхатарам̣ кхӣйати иттаракхан̣атта̄. вуттан̃хетам̣ –

‘‘джӣвитам̣ аттабха̄во ча, сукхадуккха̄ ча кевала̄;

екачиттасама̄йутта̄, лахусо ваттате кхан̣о’’ти. (маха̄ни. 10);

бхедоти бхан̇го. на сакка̄ пан̃н̃а̄петум̣ татопи ативийа иттаракхан̣атта̄.

дхануггахасуттаван̣н̣ана̄ нит̣т̣хита̄.