5. чан̇камасуттаван̣н̣ана̄

99. маха̄пан̃н̃есӯти випулапан̃н̃есу. нанти са̄рипуттаттхерам̣. кхандхантаранти кхандхавибха̄гам̣, кхандха̄нам̣ ва̄ антарам̣ висесо аттхӣти кхандхантаро. еса найо сесесупи. парикамманти иддхивидха̄дхигамасса пуббабха̄гапарикамман̃чева уттарапарикамман̃ча. а̄нисам̣санти иддха̄нисам̣сан̃чева а̄нисам̣сан̃ча. адхит̣т̣ха̄нам̣ викуббананти адхит̣т̣ха̄навидха̄нан̃чева викуббанавидха̄нан̃ча. вуттанайенева̄ти ‘‘патхавим̣ паттхаранто вийа̄’’тиа̄дина̄.

дхутан̇гапариха̄ранти дхутан̇га̄нам̣ парихаран̣авидхим̣. парихаран̣аггахан̣енева сама̄да̄нам̣ сиддхам̣ хотӣти там̣ на гахитам̣. а̄нисам̣санти там̣там̣дхутан̇гапарихаран̣е дат̣т̣хаббам̣ а̄нисам̣самева. самодха̄нанти ‘‘еттака̄ пин̣д̣апа̄тапат̣исам̣йутта̄, еттака̄ сена̄санапат̣исам̣йутта̄’’ти паччайавасена ан̃н̃аман̃н̃ан̃ча антогадхатта̄. адхит̣т̣ха̄нанти адхит̣т̣ха̄навидхим̣. бхеданти уккат̣т̣ха̄дибхедан̃чева бхинна̄ка̄ран̃ча.

парикамманти ‘‘диббачаккху евам̣ уппа̄детаббам̣, евам̣ висодхетабба’’нтиа̄дина̄ парикаммавидха̄нам̣. а̄нисам̣санти паресам̣ аджджха̄сайа̄нурӯпа̄йатана̄диа̄нисам̣сапабхедам̣. упаккилесанти са̄дха̄ран̣ам̣ аса̄дха̄ран̣ам̣ дувидхам̣ упаккилесам̣. випассана̄бха̄ванупаккилеса̄ хи диббачаккхусса упаккилеса̄ти ведитабба̄.

сан̇кхепавиттха̄рагамбхӣрутта̄навичитракатха̄дӣсӯти сан̇кхепо виттха̄ро гамбхӣрата̄ утта̄ната̄ вичитрабха̄во неййаттхата̄ нӣтаттхата̄ти евама̄дӣсу дхаммасса катхетаббаппака̄ресу там̣ там̣ катхетабба̄ка̄рам̣.

ити-саддо а̄диаттхо, пака̄раттхо ва̄. тена –

‘‘а̄димхи сӣлам̣ десеййа, (дӣ. ни. ат̣т̣ха. 1.190; ма. ни. ат̣т̣ха. 1.291)

маджджхе читтам̣ виниддисе;

анте пан̃н̃а̄ катхетабба̄,

есо дхаммакатха̄видхо’’ти. –

евам̣ катхетабба̄ка̄рам̣ сан̇ган̣ха̄ти.

‘‘ситхилам̣ дханитан̃ча дӣгхарассам̣, гарукам̣ лахукан̃ча ниггахӣтам̣;

самбандхам̣ ваваттхитам̣ вимуттам̣, дасадха̄ бйан̃джанабуддхийа̄ пабхедо’’ти. (дӣ. ни. 1.190; ма. ни. ат̣т̣ха. 1.291; пари. 485) –

евам̣ вуттам̣ дасавидхам̣ бйан̃джанабуддхим̣. ат̣т̣хуппаттинти тасса тасса суттасса джа̄такасса ча ат̣т̣хуппаттим̣. анусандхинти паччха̄нусандхиа̄дианусандхим̣. пубба̄паранти самбандхам̣. идам̣ падам̣ евам̣ ваттаббам̣, идам̣ пубба̄парам̣ евам̣ гахетаббанти.

куласан̇ган̣ханапариха̄ранти ла̄бхуппа̄данаттхам̣ кула̄нам̣ сан̇ган̣ханавидхино парихаран̣ам̣ таннийамитам̣ екантикам̣ куласан̇гахан̣авидхим̣.

чан̇камасуттаван̣н̣ана̄ нит̣т̣хита̄.