11. маха̄каппинасуттаван̣н̣ана̄

245. маха̄каппиноти пӯджа̄вачанаметам̣ йатха̄ ‘‘маха̄моггалла̄но’’ти. татха̄рӯпанти ‘‘буддхо дхаммо’’тиа̄дикам̣ гун̣ависесавантапат̣ибаддхам̣. са̄сананти десантарато а̄гатавачанам̣. джан̇гхава̄н̣иджа̄ти джан̇гхача̄рино ва̄н̣иджа̄. кин̃чи са̄сананти апуббапаваттидӣпакам̣ кин̃чи вачананти пуччхи. пӣти уппаджджи йатха̄ там̣ сучирам̣ ката̄бхинӣха̄рата̄йа парипаккан̃а̄н̣асса. апарима̄н̣ам̣ гун̣асса апарима̄н̣ато саббан̃н̃угун̣апаридӣпанато, сесаратанадвайе ниййа̄никабха̄вадӣпанато дит̣т̣хисӣласа̄ман̃н̃ена сам̣хатабха̄вадӣпанатоти ваттаббам̣. йатха̄нусит̣т̣хам̣ пат̣ипаджджама̄не апа̄йадуккхато сам̣са̄радуккхато ча апатанте дха̄ретӣти дхаммо. супарисуддхадит̣т̣хисӣласа̄ман̃н̃ена сам̣хатоти сан̇гхоти. ратанаттхо пана тин̣н̣ампи садисо ева̄ти.

навасатасахасса̄ни ада̄си девӣ. тумхети ра̄джиним̣ га̄равена бахувачанена вадати. ра̄готи анугаччхантара̄го.

джанитети каммакилесехи ниббаттите. каммакилесехи паджа̄татта̄ паджа̄ти паджа̄саддо джанитасаддена сама̄наттхоти а̄ха – ‘‘джаните, паджа̄йа̄ти аттхо’’ти. ат̣т̣хахи виджджа̄хӣти амбат̣т̣хасутте (дӣ. ни. 1.278) а̄гатанайена. таттха хи випассана̄н̃а̄н̣аманомайиддхӣхи саха чха абхин̃н̃а̄ ‘‘ат̣т̣ха виджджа̄’’ти а̄гата̄. тапати пат̣ипаккхавидхаманена виджджотати, там̣ сӯрийасса вирочананти а̄ха – ‘‘тапатӣти вирочатӣ’’ти. джха̄нам̣ сама̄паджджитва̄ сама̄хитена читтена випассанам̣ вад̣д̣хетва̄ пхаласама̄паттим̣ сама̄паджджитва̄ нисинноти а̄ха – ‘‘дувидхена джха̄нена джха̄йама̄но’’ти. саббаман̇галага̄тха̄ти саббаман̇гала̄виродхӣ га̄тха̄ти ваданти. татха̄ хи ваданти –

‘‘ман̇галам̣ бхагава̄ буддхо, дхаммо сан̇гхо ча ман̇галам̣;

саббесампи ча сатта̄нам̣, са пун̃н̃авитаман̇гала’’нти.

пӯджам̣ ка̄ретва̄ екам̣ ага̄рикадхаммакатхикам̣ упа̄сакам̣ а̄ха. еттха ча ‘‘джха̄йӣ тапатӣ’’ти имина̄ а̄рамман̣ӯпаниджджха̄на̄нам̣ гахитатта̄ дхаммаратанам̣ гахитамева. ‘‘бра̄хман̣о’’ти имина̄ сан̇гхаратанам̣ гахитамева. буддхаратанам̣ пана сарӯпенева гахитанти.

маха̄каппинасуттаван̣н̣ана̄ нит̣т̣хита̄.