12. саха̄йакасуттаван̣н̣ана̄

246. самма̄ сам̣санданавасена ети паваттатӣти самети, самма̄дит̣т̣хиа̄ди. самма̄ чирараттам̣ чирака̄лам̣ самети етесам̣ аттхӣти чирараттам̣саметика̄. тена̄ха ‘‘дӣгхаратта’’нтиа̄ди. ида̄ни имесанти етарахи етесам̣. айам̣ са̄санадхаммо аджджха̄сайато пайогато ча самма̄ сам̣сандати самети, тасма̄ маджджхе бхиннам̣ вийа самамева на висадисам̣. кин̃ча тато ева буддхена бхагавата̄ паведитадхаммавинайе етесам̣ пат̣ипаттиса̄санадхаммо собхати вирочатӣти аттхо. арийаппаведитети арийена самма̄самбуддхена саммадева пака̄сите арийадхамме. саммадева самуччхедапат̣иппассаддхивинайа̄нам̣ васена сут̣т̣ху винӣта̄ саббакилесадаратхапарил̣а̄ха̄нам̣ вӯпасамена.

саха̄йакасуттаван̣н̣ана̄ нит̣т̣хита̄.

са̄раттхаппака̄синийа̄ сам̣йуттаника̄йа-ат̣т̣хакатха̄йа

бхиккхусам̣йуттаван̣н̣ана̄йа лӣнаттхаппака̄сана̄ саматта̄.

нит̣т̣хита̄ ча са̄раттхаппака̄синийа̄

сам̣йуттаника̄йа-ат̣т̣хакатха̄йа нида̄наваггаван̣н̣ана̄.