8. тимбарукасуттаван̣н̣ана̄

18. йасма̄ тимбаруко ‘‘ведана̄ атта̄. атта̄ва ведайатӣ’’ти евам̣ладдхико, тасма̄ та̄йа ладдхийа̄ ‘‘сайам̣катам̣ сукхадуккха’’нти вадати, там̣ пат̣исам̣харитум̣ бхагава̄ ‘‘са̄ ведана̄’’тиа̄дим̣ авоча. тена̄ха ‘‘са̄ ведана̄тиа̄ди сайам̣катам̣ сукхадуккханти ладдхийа̄ ниседханаттхам̣ вутта’’нти. еттха̄пӣти имасмимпи сутте. татра̄ти йам̣ вуттам̣ ‘‘са̄ ведана̄…пе… сукхадуккха’’нти, тасмим̣ па̄т̣хе. а̄димхийева̄ти еттха бхуммавачанена ‘‘а̄дито’’ти то-саддо на ниссаккавачане. ева-ка̄рена кхо-саддо авадха̄ран̣ети дассети. йам̣ панеттха ваттаббам̣, там̣ анантарасутте вуттамева. таттха пана ‘‘ведана̄то ан̃н̃о атта̄, ведана̄йа ка̄рако’’ти ладдхикасса дит̣т̣хигатикасса ва̄до пат̣иккхитто, идха ‘‘ведана̄ атта̄’’ти евам̣ладдхикасса̄ти айамева висесо. тена̄ха ‘‘еван̃хи сати ведана̄йа ева ведана̄ ката̄ хотӣ’’тиа̄ди. имисса̄ти йа̄йа ведана̄йа сукхадуккхам̣ катам̣, имисса̄. пуббепӣти сассата̄ка̄рато пуббепи. пуриман̃хи аттханти анантарасутте вуттам̣ аттхам̣. ат̣т̣хакатха̄йанти пора̄н̣ат̣т̣хакатха̄йам̣. танти пуримасутте вуттаматтхам̣. асса̄ти имасса суттасса. йасма̄ тимбаруко ‘‘ведана̄ва атта̄’’ти ган̣ха̄ти, тасма̄ вуттам̣ ‘‘ахам̣ са̄ ведана̄…пе… на вада̄мӣ’’ти.

ан̃н̃а̄ ведана̄тиа̄дӣсупи йам̣ ваттаббам̣, там̣ анантарасутте вуттанайамева. ка̄ракаведана̄ти каттубхӯтаведана̄. ведана̄сукхадуккханти ведана̄бхӯтасукхадуккхам̣ катхитам̣, на ват̣т̣асукхадуккхам̣. ‘‘випа̄касукхадуккхамева ват̣т̣атӣ’’ти вуттам̣ ‘‘сайам̣катам̣ сукхам̣ дуккха’’нтиа̄дивачанато.

тимбарукасуттаван̣н̣ана̄ нит̣т̣хита̄.